ព័ត៌មានទាន់ហេតុការណ៍៖

ក្រោយចម្រូងចម្រាសរឿង“ប៊ីអាយជីនិងខ្មោចយក្សធំ”ត្រៀមចេញទៅបាត់ដំបង និងបន្ទាយមានជ័យ

ភ្នំពេញ៖ ក្រោយពីទម្លាក់ពីរោងដោយមិនអស់ចិត្តភាពយន្តខ្មែររឿង “ប៊ីអាយជីនិងខ្មោចយក្សធំ” ត្រៀមចេញចាក់បញ្ចាំងនៅតាមបណ្តាខេត្តជាច្រើន ។ ពេលនេះផលិតករបានសម្រេចចិតបញ្ចេញភាពយន្តទៅចាក់បញ្ចាំងនៅរោងភាពយន្តនាខេត្តបាត់ដំបង និងបន្ទាយមានជ័យមុនពេលចេញទៅខេត្តផ្សេងទៀត ។

កន្លងមកផលិតកម្មស៊ីស្ដាបានសម្ពោធខ្សែភាពយន្តខ្នាតធំ របស់ខ្លួនគឺរឿង “ប៊ីអាយជីនិងខ្មោចយក្សធំ” លើកដំបូងកាលពីពាក់កណ្តាលខែកុម្ភៈ បន្ទាប់ពីផលិតអស់ជាច្រើនខែ និងចំណាយដើមទុនក្នុងការផលិតជិត១០ម៉ឺនដុល្លារអាមេរិក ។ ក្រោយចាក់បញ្ចាំងមិនបានប៉ុន្មានថ្ងៃផងលេចចេញប្រតិកម្មពីផលិតករ សិល្បករក្រោយពីភាពយន្តទម្លាក់ម៉ោងបញ្ចាំងភាពយន្តនេះដាក់ភាពយន្តបរទេសជំនួ គ្រាដែលភាពយន្តនេះនៅមានអ្នកទស្សនាច្រើននិងទើបចាក់បញ្ចាំងមិនបានប៉ុន្មានថ្ងៃផងនោះ។

ទោះជាយ៉ាងណាផលិតករភាពយន្តនេះនៅបន្តជំន្នះការលំបាកដោយជំរុញឲ្យនាំភាពយន្តបែបភ័យរន្ធត់នេះទៅដល់តំបន់ខេត្តមួយចំនួន ហើយបើកឆាកនៅខេត្តដំបងចាប់ពីថ្ងៃទី១៥ខែមីនានេះគឺខេត្តបាត់ដំបង និងបន្ទាយមានជ័យ ។ នេះបើតាមការលើកឡើងរបស់តំណាងផលិតកម្ម។ ប្រភពបន្តថាការចេញចាក់បញ្ចាំងភាពយន្តរឿង“ប៊ីអាយជីនិងខ្មោចយក្សធំ”នេះគឺដើម្បីរកប្រាក់ចំណូល និងស្របតាមការសំណូមពររបស់អ្នកគាំទ្ររឿងនេះ។ ផលិតករ និងសិល្បករបានអំពាវនាវឲ្យទស្សនិកជនគាំទ្រភាពយន្តខ្មែរបន្តជួយលើកទឹកចិត្ត គាំទ្រស្នាដៃផលិតដោយកូនខ្មែរនិងខិតខំសម្រិតសម្រាំងខ្លាំង និងបន្តចេញផលិតភាពយន្តថ្មីរបន្តទៀត។

គួរបញ្ជាក់ដែរថារឿង “ប៊ីអាយជីនិងខ្មោចយក្សធំ” គឺជាខ្សែភាពយន្តខ្មោចភ័យរន្ធត់លងបន្លាចជាមួយឈុតឆាកកំប្លែងស្នេហាអូនបងនិងបង្កប់ទៅដោយអត្ថន័យអប់រំជាច្រើនមានការចូលរួមសម្ដែងដោយលោកឈីរដ្ឋាអ្នកនាងសុខសោម៉ាវត្តីលោកBIG នាយក្រូចនិងតារាសម្ដែងប្រុសស្រីជាច្រើនផងដែរ៕ វឌ្ឍនា