ព័ត៌មានទាន់ហេតុការណ៍៖
New Peace Studio

ខ្សឹបដាក់ត្រចៀក៖ លោក ភេម សុខុន នាយសង្កាត់ជលផលបាកាន ចាត់ចែងឲ្យឈ្មោះ គុយ តាំងលី ប្រមូលប្រយោជន៍ ពីបទល្មើសនេសាទ តាមទំនើងចិត្ត

ប្រជានេសាទ រស់នៅ ស្រុកបាកាន ខេត្តពោធិ៍សាត់ បានឲ្យដឹងថា ក្នុងមូលដ្ឋានពួកគាត់ កំពុងកើតមាន បទល្មើសនេសាទ ប្រើឧបករណ៍ ខុសច្បាប់ទ្រង់ទ្រាយធំ យ៉ាងរាលដាល ពេញផ្ទៃបឹងទន្លេសាបហើយមិនទាន់ឃើញ មន្ត្រីរដ្ឋបាលជលផល និងសមត្ថកិច្ច ពាក់ព័ន្ធ ចាត់វិធានការ បង្ក្រាបនោះទេ។ គេដឹងថា តាំងលី ដែលមានទំនាក់ទំនង យ៉ាងជិតស្និទ្ធ ជាមួយមន្ត្រី រដ្ឋបាលជលផល និងសមត្ថកិច្ច ជាអ្នករត់ការបើកដៃ ឲ្យជនជាតិយួន អាចប្រើឧបករណ៍ ខុសច្បាប់ចាប់ត្រី ក្នុងបឹងទន្លេសាប យ៉ាងមហន្តរាយ។

ការដែលឈ្មួញឈ្មោះ គុយ តាំងលី អាចធ្វើអ្វីៗ តាមអំពើចិត្ត គឺមានការឃុបឃិត សម្របសម្រួលពីសំណាក់ លោក ភេម សុខុន ដែលគិតតែ ពីរឿងប្រមូលលុយ ធ្វើមានធ្វើបានផ្ទាល់ខ្លួន យ៉ាងសុខស្រួល។ បច្ចុប្បន្ន នៅតំបន់ អតីតឡូត៍នេសាទលេខ២ កំពុងកើតមាន បទល្មើសនេសាទ ប្រើឧបករណ៍ខុសច្បាប់ យ៉ាងអនាធិបតេយ្យ ហើយឈ្មួញឈ្មោះ គុយ តាំងលី ជាអ្នកគ្រប់គ្រង ក្រុមជនល្មើស ទាំងនោះ។ ប្រជានេសាទ ជាលក្ខណៈគ្រួសារ នៅតំបន់បឹងទន្លេសាប នៃឃុំមេទឹក បានឲ្យដឹងថា បទល្មើស ប្រើឧបករណ៍ខុសច្បាប់ ដូចជាដាយ, ប, ឧបករណ៍ឆក់ កំពុងរាលដាល កាន់តែខ្លាំង ព្រោះលោក ភេម សុខុន នាយសង្កាត់ រដ្ឋបាលជលផលបាកាន គឺជាអ្នកឃុបឃិត បើកដៃឲ្យឈ្មួញ ឈ្មោះ តាំង លី និងក្រុមជនល្មើសធ្វើអ្វីៗ ស្រេចតែអំពើចិត្ត។

ប្រភពបានឲ្យដឹងថា ការដែលលោក ភេម សុខុន នាយសង្កាត់ រដ្ឋបាលជលផលបាកាន ហ៊ានបើកដៃឲ្យឈ្មួញ ឈ្មោះ គុយ តាំងលី ធ្វើអ្វីៗតាមអំពើចិត្ត គឺមានការឃុបឃិត ពីសំណាក់លោក ភុំ វិមល នាយខណ្ឌ រដ្ឋបាលជលផល ខេត្តពោធិ៍សាត់ និងលោក ឡាយ វិសិទ្ធ ប្រធានមន្ទីរកសិកម្ម ខេត្តពោធិ៍សាត់ តែម្តង។ ប្រសិនបើ គ្មានការឃុបឃិត បើកដៃពីសំណាក់ លោក ភុំ វិមល និងលោក លាយ វិសិទ្ធ ទេនោះគឺលោក ភេម សុខុន នាយសង្កាត់ រដ្ឋបាលជលផលបាកាន មិនហ៊ានធ្វើអ្វីៗ ដូចសព្វថ្ងៃនេះទេ។ ប្រភពខ្លះ បានឲ្យដឹងថាលោក ភេម សុខុន តែងផ្ដល់ផលប្រយោជន៍ ទៅឲ្យលោក ភុំ វិមល និងលោក ឡាយ វិសិទ្ធ ជាប្រចាំ ទើបអាចរក្សាតំណែង ជានាយសង្កាត់ រដ្ឋបាលជលផល បាកាន ហើយបណ្ដោយ ឲ្យបទល្មើសនេសាទកើតឡើង កាន់តែខ្លាំងក្លា ជាងមុនទៅទៀត៕