ព័ត៌មានទាន់ហេតុការណ៍៖

ចោរលួចបូមប្រេងពីរថយន្ត តៃកុងវាយរបួសធ្ងន់នគរបាលស្រុកសំរោងទងឃាត់ទាំង២នាក់

ខេត្តកំពង់ស្ពឺ៖ បុរសជាជនសង្ស័យម្នាក់បានរងរបួសធ្ងន់ធ្ងរ ហើយត្រូវបានដឹកបញ្ជូនយកទៅសងញគ្រោះនៅមន្ទីរពេទ្យបង្អែកខេត្តកំពង់ស្ពឺ ចំណែកបុរស២នាក់ទៀត ជាតៃកុងរថយន្តត្រូវបានកម្លាំងនគរបាលស្រុកសំរោងទង ឃាត់ខ្លួនដោយសារតែយកកូនសោរទៅវាយលើបុរសម្នាក់ ដែលលួចបូមប្រេងពីរថយន្តរបស់ខ្លួន កាលពីវេលាម៉ោង៣និង៥០នាទីទៀបភ្លឺ ឈានចូលថ្ងៃសៅរ៍​ ៨កើត ខែចេត្រ ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី២៤ ខែមីនា ឆ្នាំ២០១៨ នៅតាមផ្លូវជាតិលេខ៤ (មុខរោងចក្រសាប្រ៊ីណា) ចន្លោះគីឡូម៉ែត្រ ៣២-៣៣ ស្ថិតនៅភូមិត្រពាំងឬស្សីឃុំសំបូរ ស្រុកសំរោងទង ខេត្តកំពង់ស្ពឺ។

តាមសម្តីរបស់មន្ត្រីនគរបាលស្រុកបាននិយាយអោយដឹងថាបុរសជាជនសង្ស័យដែលរងរបួសបែកក្បាលនោះ មានឈ្មោះ ឡេង គីមសាន ភេទប្រុស អាយុ៣៥ឆ្នាំមុខរបរមិនពិតប្រាកដ រស់នៅភូមិព្រៃផ្ដៅ ឃុំត្រពាំងគង ស្រុកសំរោងទង ខេត្តកំពង់ស្ពឺ។

នគរបាលស្រុកបានបន្តថានៅមុនពេលកើតហេតុនោះគឺបុរសជាជនសង្ស័យខាងលើបានធ្វើសកម្មភាពលួចបូមប្រេងពីរថយន្ត របស់បុរស២នាក់ដែលឈប់ចតសម្រាក(ដេក)ចំណុចខាងលើ បន្ទាប់មកឈ្មោះស៊ឹម ធី ភេទប្រុស អាយុ ៣៥ឆ្នាំ (តៃកុងឡាន) រស់នៅភូមិអណ្ដូង ឃុំសំរោងទងស្រុកសំរោងទង ខេត្តកំពង់ស្ពឺ និងឈ្មោះ រ៉ៃ ឆុង ភេទប្រុស (តៃកុងឡាន) អាយុ២៥ឆ្នាំ រស់ភូមិពោធិឬស្សី ឃុំត្រប់ ស្រុកបាធាយ ខេត្តកំពង់ចាមបានយកកូនសោរវាយទៅលើឈ្មោះ ឡេង គីមសាន បណ្ដាលអោយរងរបួសបែកក្បាលហូរឈាមជោគខ្លួន ។ ក្រោយមកកម្លាំងនគរបាលស្រុកបានឃាត់ខ្លួន ទាំងអស់គ្នាកសាងសំណុំរឿងបញ្ជូនបន្តដើម្បីចាត់ការតាមផ្លូវច្បាប់តែម្តង។

មជ្ឈដ្ឋានប្រជាពលរដ្ឋមានការងឿងឆ្ងល់ថាបុរសជាជនសង្ស័យបានទៅលួចប្រេងគេម្ចាស់ត្រូវតែវាយចឹងហើយ ចុះហេតុអ្វីបានជាកម្លាំងសមត្ថកិច្ចត្រូវឃាត់ខ្លួនម្ចាស់ ដែលនេះគ្រាន់តែជាចម្ងល់របស់ប្រជាពលរដ្ឋប៉ុណ្ណោះ បើទោះបីជាយ៉ាងណា រឿងរ៉ាវខាងលើនេះ ទុកឲ្យស្ថាបន័មានសមត្ថកិច្ចជាអ្នកវិនិច្ឆ័យចុះ៕ សេនា សក្តិ