ព័ត៌មានទាន់ហេតុការណ៍៖

ភរិយា​ក្លាហាន​ ចាក់សោ​បង្ខាំង​ប្ដី​ ក្នុង​ផ្ទះ​ ត្រូវ​នគរបាល​ចាប់ខ្លួន​

​ខេត្ដកំពង់ចាម​ ៖​ ស្ដ្រី​ម្នាក់​ត្រូវ​បាន​ នគរបាល​ស្រុក​បា​ធា​យ​ឃាត់ខ្លួន​បញ្ជូន​ ទៅ​សាលាដំបូង​ខេត្ដ​កាលពី​ថ្ងៃ​ទី​៣១​ ខែ​ មីនា​ ឆ្នាំ​២០១៥​ ពី​បទ​បង្ខាំង​ប្ដី​ទុក​ក្នុងផ្ទះ​។​

​ស្ដ្រី​ដែល​នគរបាល​ឃាត់ខ្លួន​ឈ្មោះ​អៀ​ក​ ហួង​ អាយុ​៣៦​ឆ្នាំ​ រីឯ​ប្ដី​ឈ្មោះ​ម៉ាត់​ ទ្រី​ អាយុ​៤០​ឆ្នាំ​ ។​
​លោក​ សំ​ ណា​ល់​ អធិការ​នគរបាល​ ស្រុក​បា​ធា​យ​បានឱ្យ​ដឹង​ថា​ ការ​នាំ​ខ្លួន​ស្ដ្រី​ សង្ស័យ​ខាងលើ​ គឺ​ធ្វើ​ឡើង​តាម​ដីកា​បង្គាប់​ ឱ្យ​នាំ​ខ្លួន​លេខ​ ៣៧៩​ ត​.​ព​ ចុះ​ថ្ងៃ​ទី​២៩​ ខែ​ មក​រា​ ឆ្នាំ​២០១៥​ ដោយ​លោក​ ថា​ន់​ ឡេ​ង​ ចៅក្រម​ស៊ើបសួរ​សាលាដំបូង​ខេត្ដ​កំពង់​ ចាម​ដែល​បាន​បង្គាប់​ឱ្យ​នាំ​ខ្លួន​ស្ដ្រី​ឈ្មោះ​ អៀ​ក​ ហួង​ ពី​បទ​បង្ខាំង​មនុស្ស​ខុសច្បាប់​ កាលពី​ថ្ងៃ​ទី​១៦​ ខែកុម្ភៈ​ ឆ្នាំ​២០០៥​ នៅ​ ភូមិ​-​ឃុំ​ផ្អាវ​ ស្រុក​បា​ធា​យ​ ខេត្ដកំពង់ចាម​។​

​តាម​ប្រភព​ព័ត៌មាន​ពី​នគរបាល​មូលដ្ឋាន​បានឱ្យ​ដឹង​ថា​ កាលពីដើម​ឆ្នាំ​២០០៥​ ស្ដ្រី​សង្ស័យ​ពិតជា​បាន​ចាក់សោ​បង្ខាំង​ មនុស្ស​(​ប្ដី​)​ទុក​នៅ​ក្នុងផ្ទះ​មិន​ឱ្យ​ចេញ​ ទៅ​ណា​ប្រាកដ​មែន​។​ រហូត​ដល់​ថ្ងៃ​ទី​១៨​ ខែមីនា​ ឆ្នាំ​២០០៥​ ព្រះរាជអាជ្ញា​អម​ សាលាដំបូង​ខេត្ដកំពង់ចាម​បាន​សម្រេច​ ចោទប្រកាន់​ស្ដ្រី​សង្ស័យ​ពី​បទ​បង្ខាំង​ មនុស្ស​ខុសច្បាប់​ ។​

​ក្រោយមក​នៅ​ថ្ងៃ​ទី​៩​ ខែកញ្ញា​ ឆ្នាំ​ ២០១៣​ ចៅក្រម​សាលាដំបូង​ខេត្ដ​កំពង់​ ចាម​បាន​ចេញ​ដីកា​បង្គាប់​ឱ្យ​ស្ដ្រី​សង្ស័យ​ចូលខ្លួន​មក​បំភ្លឺ​នៅ​ចំពោះ​មុខ​តុលាការ​ ចំពោះ​បណ្ដឹង​ពាក់ព័ន្ធ​នឹង​ការ​បង្ខាំង​ មនុស្ស​ខុសច្បាប់​ ប៉ុន្ដែ​ក្រោយ​ពី​ទទួល​ បាន​ដីកា​បង្គាប់​ឱ្យ​ចូលខ្លួន​ហើយ​ស្ដ្រី​សង្ស័យ​ មិន​បាន​ចូលខ្លួន​តាម​ការ​កោះហៅ​របស់​ ចៅក្រម​ឡើយ​។​ ដោយ​យល់​ឃើញ​ថា​ ស្ដ្រី​ ជាប់ចោទ​មិន​ព្រម​ចូលខ្លួន​មក​បំភ្លឺ​ទើប​ ចៅក្រម​ស៊ើបសួរ​សម្រេច​ចេញ​ដីកា​ឱ្យ​នាំ​ខ្លួន​មក​សាកសួរ​តែ​ម្ដង​ ។​

​មជ្ឈដ្ឋាន​ជា​ច្រើន​បាន​លើក​ឡើងជា​ ច​ម្ង​ល់​ចំពោះ​ចំណាត់ការ​សាលាដំបូង​ ខេត្ដកំពង់ចាម​ ថា​ ហេតុ​អ្វី​រឿង​ក្ដី​ខាងលើ​ នេះ​ត្រូវ​អូស​បន្លាយ​ដល់​ទៅ​រយៈពេល​១០​ ឆ្នាំ​ ពោល​គឺ​បន្ទាប់​ពី​កើតហេតុ​រហូត​ដល់​ ១០​ឆ្នាំ​ក្រោយ​ ទើប​មាន​ដីកា​បង្គាប់​ឱ្យ​នាំ​ ខ្លួន​ ព្រោះ​ករណី​នេះ​ មិន​គួរ​អូស​បន្លាយ​ រយៈពេល​ដ៏​យូរ​បែប​នេះ​ឡើយ​ ព្រោះ​ស្ដ្រី​ សង្ស័យ​ក៏​មិន​បាន​រត់គេច​ទៅ​ណា​ចោល​ ផ្ទះ​នោះ​ដែរ​ ឬ​មួយ​ក៏​តុលាការ​មានរឿង​ ក្ដី​គរ​ដូច​ភ្នំ​ដោះស្រាយ​មិន​អស់​ ?

​ជុំវិញ​ច​ម្ង​ល់​ខាងលើ​នេះ​មិន​ទាន់​អាច​ ទាក់ទង​សុំ​ការ​បំភ្លឺ​ពី​ស្ថាប័ន​តុលាការខេត្ដ​ កំពង់ចាម​បាន​នៅឡើយ​កាលពី​ថ្ងៃ​ទី​៣១​ ខែមីនា​ ឆ្នាំ​២០១៥​ ។​ យ៉ាងណា​រង់ចាំ​ការ​ បង​ស្រាយ​បំភ្លឺ​ពី​គ្រប់​ភាគី​ពាក់ព័ន្ធ​ក្នុង​ ករណី​ខាងលើ​នេះ​ជា​និច្ច​ ៕​ ហេង​ ន​រិ​ន្ទ្រ​

Narin