ព័ត៌មានទាន់ហេតុការណ៍៖

ម្ចាស់​ការដ្ឋាន​បូម​ខ្សាច់​យល់សប្តិ​ឃើញ​ទូក​បុរាណ​ លុះដល់​ពេល​ទៅ​បូម​ខ្សាច់​ ស្រាប់តែ​ប្រទះ​ឃើញ​ទូក​បុរាណ​ពិត​ដូច​ក្នុង​ការ​យល់សប្តិ​មែន​

​ខេត្តសៀមរាបៈ​ ម្ចាស់​ការដ្ឋាន​បូម​ខ្សាច់​បាន​យល់សប្តិ​ឃើញ​ទូក​បុរាណ​រួច​ក៏​បាន​បូម​ខ្សាច់​ ប្រទះ​ឃើញ​ទូក​បុរាណ​ពិត​ដូច​ក្នុង​ការ​យល់សប្តិ​មែន​ដែល​កប់​នៅ​ក្នុង​ដី​ជម្រៅ​ជាង​៧​ម៉ែត្រ​ មាត់​លើ​៧​តឹក​ ជម្រៅ​ទូក​ ៥​តឹក​ មាន​ប្រវែង​១២,៨៣​ម៉ែត្រ​ ជា​ប្រភេទ​ទូក​ឃ្លោង​ ត្រូវ​បាន​គេ​សន្និដ្ឋាន​បឋម​ថា​ ធ្វើ​ពី​ដើម​គគីរ​ និង​ជា​ប្រភេទ​ទូក​ដែល​ធ្វើ​ពី​ដើមឈើ​តែ​មួយ​ដើម​គត់​ធ្វើ​ឱ្យ​មានការ​ភ្ញាក់ផ្អើល​នៅ​វេលា​ម៉ោង​១៧​និង​២៥​នាទី​ ថ្ងៃ​ទី​៨​ ខែមេសា​ ឆ្នាំ​២០១៦​ នៅ​ក្នុងភូមិ​បំពេញរាជ្យ​ ឃុំ​លាងដៃ​ ស្រុង​អង្គរធំ​ ខេត្ត​ សៀមរាប​ ដឹក​ដល់​សមត្ថកិច្ច​ និង​អាជ្ញាធរ​ជាតិ​អប្សរា​ រួច​ទទួលយក​មក​រក្សា​ទុក​ក្នុង​កសិណ​អង្គរវត្ត​ហើយ​ ។​

​អ្នកជំនាញ​ពុំ​ទាន់​ហ៊ាន​សន្និដ្ឋាន​ថា​ ទូក​នេះ​ត្រូវ​បាន​គេ​ធ្វើ​ឡើង​ក្នុង​សម័យ​កាលណា​ មាន​អាយុ​ប៉ុន្មាន​នៅឡើយ​ គេ​គ្រាន់តែ​ដឹង​ថា​ ទូក​ប្រភេទ​នេះ​ ជា​ទូក​កម្រ​ដែល​អ្នក​ស្រាវជ្រាវ​មិន​ងាយ​បាន​ប្រទះ​ឃើញ​ ។​

​លេខាធិការ​វិទ្យាសាស្ត្រ​នៃ​គណៈកម្មការ​ធិ​ការ​អាយ​ស៊ី​ស៊ី​-​អង្គរ​ ដែល​បាន​ទៅ​ពិនិត្យ​មើល​ទូក​នៅ​ទីតាំង​រក​ឃើញ​ផ្ទាល់​ បាន​បញ្ជាក់​ថា​ យោង​តាម​កំណក​ដី​ដែល​កប់​ពីលើ​ទូក​មាន​ជម្រៅ​បែប​នេះ​ វា​បញ្ជាក់​ប្រាប់​ថា​ ទូក​នេះ​មាន​អាយុកាល​យូរ​មក​ហើយ​ ។​

​លោក​សាស្ត្រាចារ្យ​បាន​បន្ត​ថា​ទូក​នេះ​ ជា​ប្រភេទ​ទូក​ដែល​គេ​លែង​ប្រទះ​ឃើញ​ប្រើប្រាស់​ ក្នុង​ប្រទេស​កម្ពុជា​បន្ត​ទៀត​ដែរ​ ។​ នេះ​ពិតជា​សំណាង​ណាស់​ដែល​យើង​បាន​ប្រទះ​ឃើញ​វត្ថុ​បុរាណ​ ដែល​ជា​បេតិកភណ្ឌ​ដ៏​មាន​តម្លៃ​បែប​នេះ​ ។​

​លោក​សាស្ត្រាចារ្យ​បន្ថែម​ថា​ លោក​នឹង​យក​បំណែក​តូច​នៃ​ទូក​នេះ​ទៅ​ធ្វើការ​វិភាគ​តាម​បច្ចេកវិទ្យា​វិទ្យាសាស្ត្រ​ ដើម្បី​កំណត់​កាលបរិច្ឆេទ​ជាក់លាក់​នៃ​ទូក​នេះ​។​

​ចំណែក​ លោក​ ហង់​ ពៅ​ អគ្គនាយករង​ទទួល​បន្ទុក​នាយកដ្ឋាន​គ្រប់គ្រង​ទឹក​បញ្ជាក់​ថា​ ក្រោយ​ពី​ទទួល​បាន​ដំណឹង​ពី​ប្រជាពលរដ្ឋ​ដែល​ថា​ គេ​បាន​ប្រទះ​ ឃើញ​ទូក​បុរាណ​នៅ​ក្នុង​ការដ្ឋាន​បូម​ខ្សាច់​មក​ លោក​បាន​បញ្ជូន​ក្រុមការងារ​ធ្វើការ​ជាមួយ​អាជ្ញាធរ​មូលដ្ឋាន​ ដើម្បី​ទទួល​បាន​ព័ត៌មាន​ជាក់លាក់​តាំងពី​ថ្ងៃ​ទី​១៧​ ខែមីនា​ មក​ម្ល៉េះ​ តែ​រក​មិនឃើញ​ ដោយសារ​ម្ចាស់​ការដ្ឋាន​មិន​ព្រម​សហការ​ជាមួយ​។​ ប៉ុន្តែ​ ដោយ​ក្រុមការងារ​នៅ​តែ​បន្ត​សហការ​ជិត​ស្និទ្ធ​ជាមួយ​អាជ្ញាធរ​ភូមិ​ឃុំ​ និង​ព្យាយាម​ពន្យល់​ម្ចាស់​ការដ្ឋាន​ឱ្យ​បាន​យល់​ដឹង​ អំពី​តម្លៃ​នៃ​បេតិកភណ្ឌ​និង​ច្បាប់​នៃ​ការ​គ្រប់​ គ្រង​នេះ​ជា​ច្រើន​លើក​ច្រើន​សា​ ទើប​នៅ​ព្រឹក​ថ្ងៃ​ទី​៨​ខែមេសា​នេះ​គាត់​យល់ព្រម​សហការ​ជាមួយ​ ខាង​ជំនាញ​ ហើយ​កាយ​យក​ទូក​ដែល​កប់​ទៅ​ក្នុង​ភក់​នោះ​ឡើង​មក​វិញ​។​

​លោក​ គឹ​ម​ ឆ​ន​ មេឃុំ​លាងដៃ​បាន​លើក​ឡើង​ថា​ លោក​បាន​ទទួល​ដំណឹង​នៃ​ការ​ឃើញ​ទូក​បុរាណ​នេះ​ជាង​ពី​រស​ប្តា​ហ៍​មក​ហើយ​ ព្រមទាំង​បាន​បញ្ជូន​ក្រុមប្រឹក្សា​ឃុំ​ទៅ​តាមដាន​ទៀត​ផង​ តែ​ក្រោយមក​ ម្ចាស់​ការដ្ឋាន​បែរជា​និយាយ​ថា​ មិន​បានឃើញ​ទូក​បុរាណ​នោះ​ទៅ​វិញ​ ប្រហែលជា​ដោយសារ​តែ​គាត់​បារម្ភ​ពី​ការ​បិទ​ការដ្ឋាន​បូម​ខ្សាច់​របស់​គាត់​ ទើប​គាត់​ព្យាយាម​លាក់​ពី​ពួក​យើង​។​ ប៉ុន្តែ​ ដោយ​ក្រុមការងារ​ចេះ​តែ​តាមដាន​ជា​ប្រចាំ​ និង​ពន្យល់​គាត់​សព្វគ្រប់​ទើប​គាត់​ព្រម​បង្ហាញ​ការ​ពិត​ដល់​ពួក​យើង​។​

​អ្នកស្រី​ សំ​ យិ​ន​ រស់នៅ​ភូមិ​ប្រដាក​ និង​ជា​ម្ចាស់​ការដ្ឋាន​បូម​ខ្សាច់​ ដែល​បាន​ប្រទះ​ឃើញ​ទូក​បុរាណ​នេះ​រៀបរាប់​ថា​អ្នកស្រី​បាន​ប្រទះ​ឃើញ​ទូក​នេះ​មែន​ តាំង​តែ​ពី​ជាង​១០​ថ្ងៃមុន​តែ​អ្នកស្រី​បានឱ្យ​គេ​ពន្លិច​ទៅ​វិញ​។​ អ្នកស្រី​បញ្ជាក់​ថា​ការ​ដែល​អ្នកស្រី​ចេះ​តែ​លាក់​រឿង​ទូក​នោះ​មក​ គឺ​ដោយសារ​អ្នកស្រី​បាន​យល់សប្តិ​ឃើញ​ម្ចាស់​ទូក​គេ​មក​ប្រាប់​ថា​ ត្រូវ​រៀបចំ​ទូក​ជា​តំណាង​ឱ្យ​គេ​ ព្រមទាំង​រៀបចំ​បាយសី​ លេងភ្លេង​ជូន​គេ​ទើប​អាច​យក​ទូក​ចេញ​បាន​។​ ឥឡូវនេះ​ អ្នកស្រី​បាន​រៀបចំ​ទូក​តំណាង​ដែល​ធ្វើ​ពី​ដើម​ខ្លែង​គង់​ប្រវែង​២​ចំអាម​កន្លះ​ និង​រៀបចំ​បាយសី​១២​ថ្នាក់​បាន​រួចរាល់​ហើយ​ ទើប​អ្នកស្រី​សម្រេច​ប្រាប់​ដល់​អាជ្ញាធរ​នៅ​ពេល​នេះ​។​

​សូម​បញ្ជាក់​ថា​ ក្នុង​ពិធី​ទទួល​ទូក​បុរាណ​នេះ​ អាជ្ញាធរ​ជាតិ​អប្សរា​ក៏​បាន​ឧបត្ថម្ភ​ថវិកា​ដល់​ ម្ចាស់​ការដ្ឋាន​ក្នុង​ការ​រៀបចំ​បាយសី​ និង​ធ្វើ​ពិធី​តំឡើង​នៅ​ថ្ងៃ​ទី​១៣​ ខែមេសា​ខាង​មុខ​ចំ​នឹង​ថ្ងៃ​ចូល​ឆ្នាំ​ប្រពៃណី​ខ្មែរ​និង​ថ្ងៃ​អង្គ​រស​ង្គ្រា​ន្ត​ផង​ដែរ​ ព្រមទាំង​បាន​ឧបត្ថម្ភ​ដល់​កម្មករ​ទាំង​២៥​នាក់​ និង​អាជ្ញាធរ​មូលដ្ឋាន​ ដែល​បាន​ផ្តល់​កិច្ចសហការ​ជ្រោមជ្រែង​នាំ​យក​ទូក​មក​រក្សា​ទុក​នៅ​កសិណ​អង្គរវត្ត​ ដែល​នេះ​ជា​គំរូ​ល្អ​មួយ​ ក្នុង​កិច្ចសហការ​ល្អ​លើ​ការងារ​អភិរក្ស​បេតិកភណ្ឌ​ដូនតា​ខ្មែរ​របស់​យើង​ ៕​ ប៊ុ​ន​ រិ​ទ្ធី​

ses (8)

ses (7)

ses (6)

ses (5)

ses (4)

ses (3)

ses (2)

ses (1)