ព័ត៌មានទាន់ហេតុការណ៍៖
New Peace Studio

រដ្ឋមន្ត្រីក្រសួងយុត្តិធម៌អាមេរិកគំរាមលាលែងពីតំណែងបើប្រធានាធិបតី ត្រាំ ដកតំណែងមន្ត្រីក្រោមឱវាទ

រដ្ឋមន្ត្រីក្រសួងយុត្តិធម៌អាមេរិក លោក Jeff Sessions ពេលថ្មីៗនេះបាននិយាយទៅកាន់សេតវិមានថា លោកនឹងចុះចេញពីតំណែង ប្រសិនបើប្រធានាធិបតី ត្រាំ ដកតំណែងមន្ត្រីក្រោមឱវាទរបស់លោក គឺរដ្ឋលេខាធិការក្រសួងយុត្តិធម៌លោក Rod Rosenstein ។

កាលពីចុងសប្តាហ៍កន្លងមកលោក Jeff Sessions បានផ្តល់ព័ត៌មានទៅទីប្រឹក្សាសេតវិមាន Donald Mc Gahn ថា លោកនឹងលាលែងចេញពីតំណែង ប្រសិនបើប្រធានាធិបតី ដូណាល់ ត្រាំ ដកតំណែងលោក Rosenstein អ្នកទទួលបន្ទុកតាមដានការស្រាវជ្រាវរបស់ក្រសួងយុត្តិធម៌អាមេរិក ទៅលើករណីរុស្ស៊ីជ្រៀតជ្រែកចូលកិច្ចការបោះឆ្នោតអាមេរិក កាលពីឆ្នាំ២០១៦។

ហេតុការណ៍ខាងលើ កើតឡើងក្រោយពេលប្រធានាធិបតី ត្រាំ បង្ហាញការខឹងសម្បាយ៉ាងខ្លាំង ដល់រដ្ឋលេខាធិការក្រសួងយុត្តិធម៌ Rosenstein ក្រោយពេលដែលលោកអនុញ្ញាតឲ្យទៅត្រួតពិនិត្យការិយាល័យរបស់លោក Michael Cohen មេធាវីផ្ទាល់របស់ប្រធានាធិបតី ត្រាំ។ ក្រសួងយុត្តិធម៌បានប្រកាសថា មេធាវីលោក ត្រាំ គឺជាគោលដៅស្រាវជ្រាវជាច្រើនខែកន្លងមក។

រដ្ឋមន្ត្រីក្រសួងយុត្តិធម៌បានបញ្ជាក់ថា ប្រសិនបើលោក ត្រាំ ដកតំណែង លោក Rosenstein នឹងបង្កឲ្យមានការលាលែងចេញពីតំណែង របស់មន្ត្រីជាន់ខ្ពស់មួយចំនួនទៀត នៅក្នុងរដ្ឋាភិបាល ដែលអាចបង្កឲ្យមានភាពចលាចលនៅក្នុងជួរដឹកនាំអាមេរិក។

លោក Rosenstein ត្រូវបានប្រធានាធិបតី ដូណាល់ ត្រាំ ជ្រើសរើសដោយខ្លួនឯង ហើយតែងតាំងឲ្យកាន់តំណែងរដ្ឋលេខាធិការក្រសួងយុត្តិធម៌ នៅឆ្នាំ២០១៧៕ ម៉ែវ សាធី