ព័ត៌មានទាន់ហេតុការណ៍៖

រថយន្ត​ធុន​ធំ​បុក​ជាមួយ​ម៉ូតូ​ម៉ាក​គ្លិ​ក​ បណ្តាល​ឲ្យ​មនុស្ស​ម្នាក់​បាត់បង់ជីវិត

​ភ្នំពេញ​ ៖​ យុវជន​ម្នាក់​ ជិះ​ម៉ូតូ​មួយ​គ្រឿង​ម៉ាក​គ្លិ​ក​ ពណ៌​.​ស​ លាយ​ខ្មៅ​ ពាក់​ស្លាក​លេខ​ភ្នំពេញ​1AD5194​ ត្រូវ​រថយន្ត​ធំ​បុក​ស្លាប់​នៅ​កំណាត់​ផ្លូវ​៣៧១​ ក្រុម​ទី​១៥​ ភូមិ​ត្នោត​ជុំ​៤​ សង្កាត់​បឹង​ទំពុន​ ខណ្ឌមានជ័យ​ ភ្នំពេញ​ កាលពី​វេលា​ម៉ោង​៩​និង​៣០​នាទី​ព្រឹក​ ថ្ងៃ​ទី​៥​ ខែមិថុនា​ ឆ្នាំ​២០១៥​។​

​សាក្សី​នៅ​កន្លែង​កើតហេតុ​បាន​ឲ្យ​ដឹង​ថា​ មុន​ពេល​មាន​គ្រោះថ្នាក់​ ជន​រង​គ្រោះ​បាន​ធ្វើ​ដំណើរ​ដោយ​ម៉ូតូ​របស់​ខ្លួន​ តាម​បណ្តោយ​ផ្លូវ​៣៧១​ ក្នុង​ទិស​ដៅ​ពី​ស្ពានដែក​ចំការ​ដូង​ មក​គ្លីនិក​បញ្ញា​ស័ក្តិ​ លុះ​ធ្វើ​ដំណើរ​មក​ដល់​ចំណុច​កើតហេតុ​ ក៏​ស្រាប់តែ​មាន​រថយន្ត​ធុន​ធំ​មួយ​គ្រឿង​ម៉ាក​ហ្វុ​យ​ហ្សូ​ ពណ៌​លឿង​ ពាក់​ស្លាក​លេខ​ ឃ​1440​ ភព​3​ បើក​ក្នុង​ទិស​ដៅ​ស្របគ្នា​ រួច​ជែង​នឹង​ម៉ូតូ​ជន​រង​គ្រោះ​ប៉ះ​ដៃចង្កូត​ បណ្ដាល​ឲ្យ​ជន​រង​គ្រោះ​ខ្ទាត​ចូល​កង់​រថយន្ត​កិន​ស្លាប់​តែ​ម្តង​។​

​សមត្ថកិច្ច​ បាន​ចុះ​ទៅ​ដល់​ចំណុច​កើតហេតុ​ ពុំ​ទាន់​បញ្ជាក់​ពី​អត្តសញ្ញាណ​ជន​រង​គ្រោះ​ដែល​ស្លាប់​នៅឡើយ​ទេ​ ដោយ​គ្រាន់តែ​គេ​ប្រាប់​ថា​ ជន​រង​គ្រោះ​បើកបរ​ម៉ូតូ​ដូច​មាន​ភិនភាគ​នឹង​ស្លាក​លេខ​ខាងលើ​។​ ចំណែក​រថយន្ត​បង្កហេតុ​ក៏​ត្រូវ​បាន​សមត្ថកិច្ច​ឃាត់​ចាប់​បាន​ រួម​ទាំង​តៃកុង​រថយន្ត​ទៀត​ផង​៕​ ហេង​ សូ​រិ​យា​

11328792_514289652056076_598728542_n
11328792_514289662056075_117269750_n