សារព័ត៌មាន នគរវត្ត តែងតែនាំមុខគេជានិច្ច
ខេត្តប៉ៃលិន៖ បុរសម្នាក់ជាកម្មករស៊ីឈ្នួល ចាំចំការស្វាយគេ បានរងរបួសធ្ងន់ដល់បាត់បង់ជីវិត នៅក្នុងចំការស្វាយ ខណៈបុរសរូបនោះបានយកម៉ាស៊ី ទៅកាត់ស្មៅក្នុងចំការស្វាយរបស់ថៅកែម្នាក់ឈ្មោះ រ៉ា, ពេលនោះស្រាប់តែផ្លែកាំបិតម៉ាស៊ីកាត់ បានដាច់ ត្រូវនឹងថ្មបណ្ដាលឲ្យដាច់ផ្លែកាំបិតម៉ាស៊ីកាត់ស្មៅ ចំកំភួនជើងខាងឆ្វេងបណ្ដាលឲ្យដាច់សរសៃឈាមធំរងរបួសធ្ងន់, រហូតដល់ហូរឈាមដាច់ខ្យល់ស្លាប់នៅនិងចំការស្វាយម្នាក់ឯង ក្រោយមកទើបតែម្ចាស់ចំការដឹង។
បើតាមមន្ត្រីជំនាញនគរបាលក្រុងប៉ៃលិនបាឲ្យដឹងថា៖ ក្នុងករណីកើតហេតុដោយខ្លួនឯងនេះបានកើតឡើង កាលពីវេលាម៉ោង ១០:០០នាទីព្រឹក ថ្ងៃចន្ទ ១៥រោច ខែពិសាខ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៤ ខែឧសភា ឆ្នាំ២០១៨ មានករណីបុរសម្នាក់បានមុតផ្លែកាំបិតម៉ាស៊ីកាត់ស្មៅបាន ស្លាប់ នៅក្នុងចំការស្វាយ ស្ថិតក្នុងភូមិពេជ្រគីរី សង្កាត់ប៉ៃលិន ក្រុងប៉ៃលិន ខេត្តប៉ៃលិន។
នគរបាលជំនាញក្រុងបានបន្តថា៖ ជនរងគ្រោះមានឈ្មោះ យ៉ន យ៉ូ ភេទប្រុស អាយុ ៤៦ឆ្នាំ ជនជាតិខ្មែរ សញ្ជាតិខ្មែរ មានស្រុកកំណេីតនៅភូមិចុងព្រែក ឃុំព្រែកស្ដី ស្រុះកោះធំ ខេត្តកណ្ដាល មុខរបរ កម្មករចាំចំការស្វាយឲ្យឈ្មោះ ឡៃ រ៉ា ភេទប្រុស អាយុ ៣៨ឆ្នាំ រស់នៅភូមិតាង៉ែនក្រោម ឃុំស្ទឹងកាច់ ស្រុកសាលាក្រៅ ខេត្តប៉ៃលិន។
បើតាមការរៀបពីម្ចាស់ចំការបានឲ្យដឹងថាកាលពី កាលពីថ្ងៃទី១១ ខែឧសភា ឆ្នាំ២០១៨ លោកបានឲ្យលុយចំនួន ១០ម៉ឺនរៀល ទៅឲ្យជនរងគ្រោះ ដើម្បីទិញប្រេងសាំង ម្ហូបអាហារ និងសម្ភារមួយចំនួន ដើម្បីកាត់ស្មៅចំការ តែរហូតដល់ថ្ងៃទី១៤នេះ ទើបគាត់បានដឹងពីដំណឹងរបស់ជនរងគ្រោះបានស្លាប់ទៅហើយ ។
តាមការធ្វើកោសល្យវិច័យរបស់ផ្នែកជំនាញនៃអធិការដ្ឋាននគរបាលក្រុងប៉ៃលិនបានឲ្យដឹងថា សាកសពបានមុតនឹងផ្លែម៉ាស៊ីនកាត់ស្មៅ ចំកំភួនជើងឆ្វេងផ្នែកខាងក្រោយ មុនពេលស្លាប់ នឹងបានដាច់សរសៃឈាមធំ បណ្ដាលឲ្យឈាមហូរហូតដាច់ខ្យល់ស្លាប់។
ចំណែកសាកសពបុរសម្នាក់ខាងលើ ក្រោយពីសមត្ថកិច្ចបានពិនិត្យរួចសពក៏បាន ប្រគល់ឲ្យម្ចាស់ចំការនិងក្រុមគ្រូសារយកទៅធ្វើបុណ្យតាមប្រពៃណី៕ ស សារ៉េត
