ព័ត៌មានទាន់ហេតុការណ៍៖

ករណីបាត់នាវាមុជទឹករបស់អាហ្សង់ទីនសាច់ញាតិនាវិកប្តឹងឡើងតុលាការ

ចែករំលែក៖

កាលពីថ្ងៃទី២៩ ខែវិច្ឆិកា សាច់ញាតិ នាវិកនៅក្នុងនាវាមុជទឹក ARA San Juan របស់កម្លាំងទាហានជើងទឹកអាហ្សង់ទីនដែលបាត់ខ្លួននោះ បានចាប់ផ្តើមប្តឹងទៅ តុលាការក្រោយរយៈពេល១៤ថ្ងៃហើយរកមិនទាន់ឃើញទៀត។

មេធាវី Luis Tagliapietra ដែលជាឪពុក របស់វរសេនីយ៍ឯក Alejandro Damian Tagliapietra ដែលជាមនុស្សម្នាក់ ក្នុង ចំណោមមន្ត្រីយោធានៅក្នុងនាវាមុជទឹកដែលបាត់ខ្លួន បានឲ្យដឹងថា លោកនឹងប្តឹងក្រោយពេលប្រមូលឯកសារពាក់ព័ន្ធនឹងការជួសជុលនាវា ក៏ដូចជាទំនាក់ទំនងជា មួយទីបញ្ជាការរួចរាល់។

លោក Luis Tagliapietra បង្ហាញក្តី បារម្ភថា មន្ត្រីយោធាបានលាក់បាំងព័ត៌ មាននៅក្នុងទំនាក់ទំនងជាមួយនាវាមុជ ទឹកដែលបានបាត់ខ្លួនតាំងពីថ្ងៃទី១៥ ខែវិច្ឆិកា ដោយនៅក្នុងនោះមាននាវិក រហូតដល់ទៅ៤៤នាក់។

កន្លងមកប្រធានាធិបតីអាហ្សង់ទីនលោក Mauricio Macri បានប្រកាសស្វែងរកនាវាមុជទឹកដែលបានបាត់ខ្លួន ហើយ ការស្រាវជ្រាវពីមូលហេតុបង្កឲ្យមានគ្រោះថ្នាក់នឹងចាប់ផ្តើមនៅពេលណាដែលរកឃើញនាវា ARA San Juan ។

ក្តីសង្ឃឹមរកឃើញនាវិកនៅរស់បាន រលត់ទៅហើយ ក្រោយពេលដែលអុកស៊ីសែននៅក្នុងនាវាមុជទឹកខាងលើអស់តាំងពីសប្តាហ៍កន្លងមក។

ក្រុមអ្នកឯកទេសបានបញ្ជាក់ថា ប្រព័ន្ធ បច្ចេកវិទ្យាបំបាំងកាយដ៏ទំនើប គឺហេតុ ផលបង្កទុក្ខលំបាកក្នុងការស្វែងរកនាវា មុជទឹក។ មកទល់ពេលនេះគេមិនទាន់ដឹង ថា នាវាមុជទឹក ARA San Juan កំពុងតែ ដំណើរការនៅលើផ្ទៃទឹក បាតសមុទ្រ ឬត្រូវលិចនោះឡើយ ដោយមកទល់ពេលនេះមិនទាន់មានសញ្ញាណាមួយពីនាវា ខាងលើនោះទេ។

នាវាមុជទឹក ARA បានផលិតនៅឆ្នាំ ១៩៨៥ ប៉ុន្តែត្រូវបានជួសជុលកែលម្អ ឡើងវិញនៅឆ្នាំ២០១៤ ដោយបំពាក់ ប្រព័ន្ធបំបាំងកាយ ដ៏ទំនើបគេចផុតពីការចាប់បានរបស់សត្រូវ៕ ម៉ែវ សាធី


ចែករំលែក៖