សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ក្មេងប្រុសម្នាក់ជាក្មេងកំព្រាឪពុកម្តាយ ទៅរស់នៅក្នុងអង្គការមិត្តសម្លាញ់ ហើយបានមកចុះលេងទឹក ក្នុងវត្តជម្ពូវ័ន បណ្តាឲ្យលង់ស្លាប់ ក្រោយពីដឹកបញ្ជូនទៅដល់មន្ទីរពេទ្យ ។
ហេតុការណ៍នេះ បានកើតឡើង កាលពីវេលាម៉ោង២រសៀល ថ្ងៃទី៣០ ខែមេសា ឆ្នាំ២០១៩ នៅស្រះវត្តជម្ពូវ័ន សង្កាត់ចោមចៅ៣ ខណ្ឌពោធិសែនជ័យ ។
ក្មេងរងគ្រោះឈ្មោះ ឡាយ វ៉ាន់ណាត ភេទប្រុស អាយុ១៣ឆ្នាំ ជាក្មេងកំព្រា រស់នៅអង្គការមិត្តសម្លាញ់ នៅឯក្រុងព្រះសីហនុ ខេត្តព្រះសីហនុ តែមកលេង ជាមួយក្មេងនៅ អង្គការមិត្តសម្លាញ់ ភូមិព្រៃជីសាក់ សង្កាត់ចោមចៅ៣ ខណ្ឌពោធិសែនជ័យ បាន២ថ្ងៃហើយ តែមានក្មេង២នាក់ ទាំងក្មេងរងគ្រោះ ស្នាក់នៅចិញ្ចើមផ្លូវមុខវត្តជម្ពូវ័ន ។
តាមប្រភពពីក្មេង រួមដំណើរជាមួយគ្នា ដែលមកលេងទឹកស្រះ បានឲ្យដឹងថា ពួកគេមានគ្នា៣នាក់ មុនកើតហេតុ បានមកចុះងូតទឹកស្រះហែលលេង នៅវេលាម៉ោងខាងលើ ជនរងគ្រោះ ផុតជើង មិនចេះហែលទឹក លង់លិច ឈ្លក់ទឹក ត្រូវបាន ពលរដ្ឋជួយស្រង់ឡើងគោក ។
តាមប្រជាពលរដ្ឋបានឲ្យដឹងថា មុនកើតហេតុ ក្រុមក្មេងទាំង៣នាក់ចុះងូតទឹកស្រះលេង ហើយមានក្មេងម្នាក់ក្នុងចំណោម៣នាក់ បានលង់ទឹក ឆោឡោនាំគ្នាជួយស្រង់ឡើងគោក ដោយឃើញសភាពមិនស្រួល អស់រយៈពេលជិត១ម៉ោង មិនដឹងខ្លួន ក៏បានហៅរថយន្តសង្គ្រោះមកដឹក បញ្ជូនទៅមន្ទីរពេទ្យ ។
តាមក្រុមសង្គ្រោះបានឲ្យដឹងថា គួរឲ្យសោកស្តាយ ក្រោយពីក្មេងរងគ្រោះលង់ទឹក អស់រយៈពេលជិតមួយម៉ោង ទើបរករថយន្តសង្គ្រោះជាក្រោយ ជាអកុសល ក្មេងរងគ្រោះ ក្រោយពីដឹកបញ្ជូនដល់មន្ទីរពេទ្យគន្ធបុប្ផា បានស្លាប់បាត់ជីវិត ។
ក្រោយពីស្លាប់ ក្មេងរងគ្រោះ ត្រូវបានដឹកវិលត្រឡប់មកតម្កល់ទុកនៅវត្តជម្ពូវ័នវិញ រង់ចាំជំនាញពិនិត្យ កោសល្យវិច័យ រួចទំនាក់ទំនងទៅខាងអង្គការ ដើម្បីចាត់ចែងធ្វើបុណ្យតាមប្រពៃណី ៕ សុខាសែនជ័យ
