សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប៖ ក្មេងប្រុសអាយុ២០ឆ្នាំម្នាក់បានគាំងបេះដូងស្លាប់ ខណៈឈប់សម្រាកពីការងារ នៅកន្លែងធ្វើការ ក្នុងហាងកូរ៉េ បង្កឱ្យមានការភ្ញាក់ផ្អើល ឆោ ឡោ ពេញហាង និងសមត្ថកិច្ច រួចត្រូវបានបុគ្គលិក និង អ្នកគ្រប់គ្រប់បាន ហៅរថយន្តសង្គ្រោះបន្ទាន់របស់មន្ទីរពេទ្យឯកជន រស្មី អង្គរ មកដឹកយកទៅសង្គ្រោះ ប៉ុន្តែអកុសលក្មេងប្រុសនោះបានដាច់ខ្យល់ស្លាប់នៅកន្លែងធ្វើការបាត់ទៅហើយ ហេតុការណ៍នេះបានកើតឡើង នៅវេលាម៉ោង១៤និង៥៥នាទីរសៀល ថ្ងៃទី៧មិថុនាឆ្នាំ២០១៧ ស្ថិតនៅខាងត្បូងស្តុបមុខអនុវិទ្យាល័យគ្រួស ក្នុងភូមិគ្រួស សង្កាត់ស្វាយដង្គំ ក្រុងសៀមរាប។
តាមប្រភពពត័មានពីសមត្ថកិច្ចនគរបាលប៉ុស្តិ៍សង្កាត់ស្វាយដង្គំ បានប្រាប់នៅវេលាម៉ោង២ និង៣០នាទី រសៀលថ្ងៃទី៨ ខែមិថុនា ឆ្នាំ២០១៧ថា មុនពេលកើតហេតុ កម្លាំងសមត្ថកិច្ចមូលដ្ឋានរបស់យើង បានទទួលព័ត៌មានតាមទូរស័ព្ទ ពីឈ្មោះ ឡុង ឈុន លី ភេទប្រុស ជាបុគ្គលិកនៅក្នុងហាងកូរ៉េ ថាមានបុគ្គលិកបានគាំងបេះដូងស្លាប់។ប្រភពបានបន្តថា ក្រោយមក កម្លាំងជំនាញក៏បានសហការជាមួយកម្លាំងនគរបាលបច្ចេកទេស ខេត្ត និង កម្លាំងនគរបាលព្រហ្មទណ្ឌកំរិតធ្ងន់ ចុះទៅដល់កន្លែងកើតហេតុ រួចនាំគ្នាធ្វើកោសល្យវិច្ឆ័យ ទៅលើដងខ្លួននៃសព ហើយបានសន្និដ្ឋានថា ជនរងគ្រោះពិតជាស្លាប់ដោយសារគាំងបេះដូង ពិតប្រាកដមែន មិនមែនករណីឃាតកម្ម ឬ ឆក់ខ្សែភ្លើងស្លាប់ ដូចគេនិយាយនោះទេ។
ប្រភពបានបញ្ជាក់ថា ជនរងគ្រោះមានឈ្មោះ យ៉ា ចែត្រ ហៅ ចិត្ត ភេទប្រុស អាយុ២០ឆ្នាំមានមុខរបរបុគ្គលិកនៅហាងកូរ៉េ មានទីលំនៅបច្ចុប្បន្ន ភូមិបឹង សង្កាត់ក្របីរៀល ក្រុង/ខេត្តសៀមរាប។បច្ចុប្បន្នសពជនរងគ្រោះ ត្រូវបានសមត្ថកិច្ចមូលដ្ឋានបានធ្វើការប្រគល់សាកសបឱ្យក្រុមគ្រួសារយកទៅធ្វើបុណ្យតាមប្រពៃណី៕ ប៊ុន រិទ្ធី
