ព័ត៌មានទាន់ហេតុការណ៍៖

ក្រសួងកសិកម្មក្រឡេកមើលក្រុមមន្ត្រីរដ្ឋបាលជលផលខេត្តកំពង់ធំចងក្រងប្រព័ន្ធខ្សែចង្វាក់កសាងបទល្មើសនៅបឹងទន្លេសាបនោះផង

ចែករំលែក៖

ខេត្តកំពង់ធំ៖ បទល្មើសនេសាទនៅខេត្តកំពង់ធំកំពុងរីករាលដាលយ៉ាងធ្ងន់ធ្ងរ ហើយប្រសិនបើគ្មានចំណាត់ការបង្ក្រាបទេនោះ វានឹងក្លាយទៅជាជំងឺមួយដែលពិបាកព្យាបាល។ ក្រុមមន្ត្រីជលផលគឺជាអ្នកឃុបឃិតជាមួយឈ្មួញរួមគ្នាកសាងបទល្មើស ដើម្បីផលប្រយោជន៍បក្ខពួកខ្លួន។ រីឯប្រជាពលរដ្ឋនេសាទតួចតាច ដែលមិនបង់ប្រាក់ឲ្យពួកគេត្រូវក្រុមមន្ត្រីជលផលទាំងនោះចាប់យកស្នាដៃបង្ហាញថ្នាក់លើ ដែលល្ងឹតល្ងង់។

នៅខេត្តកំពង់ធំ លោកយ៉ាន់ វិសាក់ ហៅសែ មានតួនាទីជានាយផ្នែករដ្ឋបាលផាត់សណ្តាយ ត្រូវគេចាត់ទុកថាជាមេក្លោងក្នុងការចុះអនុវត្តផ្ទាល់ប្រព្រឹត្តល្មើស ក្រោមក្រសែភ្នែកលោកប៉ែន វណ្ណរិទ្ធ នាយខណ្ឌរដ្ឋបាលជលផលកំពង់ធំ។ បទល្មើសនេសាទកើតមានគ្រប់ទីកន្លែង គ្រប់រដូវកាលបាននិងកំពុងបំផ្លិចបំផ្លាញធនធានជលផលជារៀងរាល់ថ្ងៃក្នុងកម្រិតប្រកាសអាសន្នដ៏ធ្ងន់ធ្ងរគួរឲ្យកត់សម្គាល់ ក្រោមអំណាចរបស់ពួកមន្ត្រីជលផលទាំងនេះ ។ បទល្មើសជលផលទ្រង់ទ្រាយធំទាំងនោះរួមមាន៖

១ ការបើកឲ្យនេសាទត្រីដោយប្រើឧបករណ៍ឆក់ក្តៅ, ត្រជាក់ នៅតំបន់អភិរក្សជលផលអតីតឡូត៍លេខ២ ដែលកំពុងកើតមានជារៀងរាល់ថ្ងៃនេះ។

២ អនុញ្ញាតឲ្យជនសង្ស័យកាប់ព្រៃលិចទឹក ដែលជាកន្លែងសម្រាប់ឲ្យមច្ឆជាតិជ្រកនៅ ជាពិសេសវាបង្កឲ្យទៅជាការហូរច្រោះ, កំណកបាតបឹង ស្ទឹងព្រែករីងរាក់។

៣ បើកឲ្យឈ្មួញនេសាទដោយឧបករណ៍ណរ៉ាវ សាច់អួនក្រឡាញឹកទ្រង់ទ្រាយធំទាំងក្នុងរដូវបិទនេសាទ ក៏ដូចជាបើកនេសាទ។ ពួកគេអាចចាប់យកមេពួជត្រីក្នុងឱកាសត្រីពងកូន និងបម្លាស់ទីស្វែងរកចំណីនៅក្នុងភូមិសាស្ត្រឃុំពាមបាង និងឃុំបាត់សណ្តាយ។

៤ អនុញ្ញាតឲ្យឈ្មួញអូសលៀស ឬកៅលៀសចេញពីក្នុងភក់ ដោយប្រើម៉ាស៊ីនដែលច្បាប់ហាមឃាត់។

៥ អនុញ្ញាតឲ្យឈ្មួញរុញជន(លៀស) ដោយប្រើកម្លាំងម៉ាស៊ីន។

៦ បើកឲ្យអ្នកនេសាទដាក់ធ្នក់ស្រូបទាញយកផលប្រយោជន៍ពីធនធានជលផល ដែលឈ្មួញបែងចែកផលប្រយោជន៍ឲ្យក្នុងនោះមានឈ្មោះ ង្វៀង យ៉ាំងឡាំង, ផាន់ ផាន(អតីតមេឃុំពាមបាង), អ្នកទិញត្រីឈ្មោះ ពត សិកា… ដែលពួកឈ្មួញទាំងនេះបានបង់លុយឲ្យមន្ត្រីជលផលរាប់រយលានរៀល។

៧ អនុញ្ញាតឲ្យឈ្មួញអូសអួនគូ(យ៉ាំងកាវ) ចំនួន៧វង់ដែលកំពុងធ្វើសកម្មភាពនេសាទក្នុងបឹងទន្លេសាប ជាពិសេសក្នុងតំបន់អភិរក្សជលផលលេខ៤ទាំងយប់ ទាំងថ្ងៃ។ នៅទីនោះមានជនជាតិវៀតណាមចំនួន៥នាក់ ដែលមកពីឃុំកំពង់លួង ស្រុកក្រគរ៤នាក់ និងមកពីឃុំឆ្នុកទ្រូ(ខេត្តកំពង់ឆ្នាំង)ម្នាក់ ។

៨ ចាប់ជំរិតទារប្រាក់ពីជនសង្ស័យ ក្រោមហេតុផលពិន័យជាប្រាក់ដោយគ្មានតម្លាភាព។

ទាំងអស់នេះជាអំពើពុករលួយ ដែលប្រជាពលរដ្ឋបានបង្ហាញជាបឋម ពីព្រោះថា នៅមានចំណុចអវិជ្ជមានទៀត ដែលក្រុមមន្ត្រីជលផល ខេត្តកំពង់ធំ ដឹកនាំដោយលោកប៉ែន វណ្ណរិទ្ធ នាយខណ្ឌរដ្ឋបាលជលផល ហែហមដោយមន្ត្រីដៃជើងមួយចំនួនដូចជា លោកហួន ផល, លោកប៉ែន សារ៉ាត និងលោកយ៉ាន់ វិសាក់ ជាដើម៕ ហេង សូរិយា

លោកយ៉ាន់ វិសាក់

លោកប៉ែន សារាត

លោកហួន ផល

លោកប៉ែន វណ្ណរិទ្ធ


ចែករំលែក៖