សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ស្ត្រីម្នាក់រួមដំណើរជាមួយកូនប្រុសតូចដោយជិះម៉ូតូកង់បីតាមផ្លូវ ត្រូវក្រុមចោរឆក់កាបូបបានសម្រេច រួចបើកម៉ូតូគេចខ្លួនដោយសុវត្ថិភាព។ ដែលហេតុការណ៍នេះបានកើតឡើងកាលពីម៉ោង១០យប់ ថ្ងៃសៅរ៍ ៨កើត ខែចេត្រ ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី២៤ ខែមីនា ឆ្នាំ២០១៨ តាមបណ្តោយផ្លូវទំនប់៧០ នៅចំណុចក្បែរផ្លូវរថភ្លើង ស្ថិតក្នុងសង្កាត់ស្រះចក ខណ្ឌដូនពេញ ។
បើតាមសម្តីជនរងគ្រោះបានឲ្យដឹងថា មុនពេលកើតហេតុ គាត់បានជិះម៉ូតូកង់បីពណ៌សពីនាក់កូនប្រុសចេញពីម្តុំ ផ្សារ៧មករា សង្កាត់បឹងកក់២ ខណ្ឌទួលគោក សំដៅទៅផ្ទះ ។ ខណៈធ្វើដំណើរមកដល់ចំណុចកើតហេតុ ស្រាប់តែលេចមុខជនសង្ស័យ២នាក់ជិះតូមួយគ្រឿងម៉ាកហុងដាឌ្រីម ពណ៌ខ្មៅ មិនចាំស្លាកលេខ ជិះមកជិតរួចក៏ធ្វើសកម្មភាពឆក់យកកាបូបបានសម្រេច ហើយបើកម៉ូតូគេចខ្លួនបាត់ស្រមោល ។ ខណៈពេលឆក់ភ្លាមៗ រូបគាត់ក៏បានស្រែកថា «ចោរៗ» ប៉ុន្តែគ្មាននរណាម្នាក់គេជួយដេញនោះឡើយ ។ ប្រភពពីជនរងគ្រោះបានឲ្យដឹងទៀតថា នៅក្នុងកាបូបដែលចោរឆក់នោះមានខ្សែ.កទម្ងន់១តម្លឹង៥ជី ខ្សែដៃ ខ្សែជើងប្លាក់ទីនមួយឈុត រួមនឹងលុយ1500ដុល្លារ ។
បន្ទាប់ពីកើតហេតុរួចជនរងគ្រោះគាត់មិនបានដាក់ពាក្យបណ្តឹងនោះទេ ក៏ជិះម៉ូតូកង់បីចេញទៅបាត់ ៕ ជ្រោយពេជ្រ
