ព័ត៌មានទាន់ហេតុការណ៍៖

ក្រោយអំពាវនាវឲ្យតៃវ៉ាន់រួបរួម ប្រធានាធិបតីចិន​ បញ្ជាឲ្យទាហានត្រៀមលក្ខណៈធ្វើសង្គ្រាម

ចែករំលែក៖

ពេលកន្លងមកថ្មីៗ ប្រធានាធិបតី បានលើកឡើងថា ចិនមិន​អាចធានាបានឡើយថា​​មិនប្រើ​កម្លាំងបាយ បើសិនជា​មាន​បរទេស​ណាមួយ​​ចង់បំបែក​កោះតៃវ៉ាន់ចេញ​ពីចិននោះ។ ការប៉ុនប៉ងឯករាជ្យរបស់តៃវ៉ាន​និងធ្វើឲ្យកោះនេះត្រូវខាតបង់តែប៉ុណ្ណោះ ទាំងទ្រព្យសម្បត្តិនិងអាយុជីវិត ។

ប្រធានាធិបតីចិន លោក ស៊ីជីងពីង​បានបញ្ជាកម្លាំងទាហាន ត្រៀមលក្ខណៈធ្វើសង្គ្រាម​ ការពារប្រទេសជាតិ ។ លោកបន្តទៀតថា​ប្រទេសជាតិកំពុងប្រឈមនៅបញ្ហា ប្រឈមមុខមិនធ្លាប់មានពីមុនមកឡើយ ។

សារព័ត៌មាន south China Morning Post ​បានផ្សាយថា​ ការបញ្ជាខាងលើ​របស់ប្រធានាធិបតីចិន​ធ្វើឡើងនៅក្នុងកិច្ចប្រជុំ មន្ត្រីជាន់ខ្ពស់​មជ្ឈឹមបក្ស កាលពីថ្ងៃទី​៤ខែមករា ត្រូវបានផ្សាយផ្ទាល់តាមបណ្តាញទូរទស្សន៍ជាតិ ។

សារព័ត៌មានខាងលើ​បានដកស្រងសម្តី ប្រធានាធិបតីចិនបានប្រកាសថា​«កម្លាំងទាហាន ត្រូវត្រៀមលក្ខន ជានិច្ច នៅក្នុងការធ្វើសង្គ្រាម​ ពេលមានហេតុការបន្ទាន់»។ ប្រធានាធិបតីចិនបានស្នើរដល់ កម្លាំងទាហាន ត្រូវតែយល់ឲ្យបានច្បាស់​ ពីគោលដៅនៃការអភិវឌ្ឍន៍ និងបញ្ហាសន្តិសុខធំៗរបស់ជាតិ ដែលអាចប្រឈមមុខគ្រប់ពេលវេលា ។

នៅក្នុងកិច្ចប្រជុំកាលពីថ្ងៃទី​៤ខែមករា ប្រធានាធិបតីចិនបានចុះហត្ថលេខាងលើបទបញ្ជា​ នៅក្នុងឆ្នាំ​២០១៩នេះ ជាឆ្នាំដែលកម្លាំងទាហានចិនត្រូវបង្កើនសម្ថភាព​ហ្វឹកហាត់​ ត្រៀមលក្ខណឲ្យបានខ្ពស់បំផុត ។

បណ្តាញទូរទស្សន៍ជាតិចិន CCTV ​ផ្សព្វផ្សាយនៅបទបញ្ជារបស់ប្រធានាធិបតីដោយ​ផ្តល់អាទិភាព នៅក្នុងការហ្វឹកហាត់ ត្រៀមលក្ខណធ្វើសង្គ្រាម ​វាយលុក … បទបញ្ជាទាំងនោះ​ត្រូវបានអនុម័តទៅលើកម្លាំងទាហាន​ គ្រប់ស្ថានប័ន កងពល ទាំងទាហានជើងទឹកជើងគោកនិងជើងអាកាស ។ កម្លាំងទាហានត្រូវបង្កើនស្មារតីខ្ពស់ និងចេះជួយ​ស្វែងរកដំណោះស្រាយ​ឲ្យទាន់ពេលវេលា​នៅពេលមានការខុសឆ្គងណាមួយ។

ក្រុមអ្នកឯកទេសយោធា​ចិនបានលើកឡើងថា សកម្មភាពខាងលើ​ របស់ប្រធានាធិបតី​ ស៊ីជីងពីង គឺជាការផ្ញើសារទៅកាន់ មេដឹកនាំកោះតៃវ៉ាន ក៏ដូចជា ការប្រឈមមុខដាក់គ្នាជាមួយអាមេរិក

ពាក់ព័ន្ធនិងបញ្ហាកោះតៃវ៉ាន សារព័ត៌មាន​ Sputnik ​បានផ្សាយថា ​ប្រធានាធិបតីចិន​លោក ស៊ី ជិនពីង បានលើកឡើងថា ទីក្រុងប៉េកាំងពុំអាច​សន្យានឹងមិនប្រើប្រាស់​កម្លាំងបាយ ដើម្បីទប់ទល់ការ​លូកលាន់​ពីបរទេស ក៏ដូចជាចលនា​ចង់បំបែករដ្ឋ នៅកោះតៃវ៉ាន់​នោះ​ឡើយ។

នាឱកាសខួប ៤០ឆ្នាំ នៃទិវាថ្លែងសារទៅ​កាន់ជនរួមជាតិចិន​ ដែលកំពុងរស់នៅកោះតៃវ៉ាន់ លោក ស៊ី បានថ្លែងថា រដ្ឋាភិបាលទីក្រុង​​ប៉េកាំង​ស្វាគមន៍ជានិច្ច​ ក្នុងការ​​បង្កើតចន្លោះទំនេរ សម្រាប់ការចូល​មករួបរួមគ្នាដោយ​សន្តិវិធីរវាងទឹកដី​ទាំងពីរ ប៉ុន្តែនឹងពុំ​អនុញ្ញាត​ឲ្យមានទម្រង់​នៃចលនាបំបែក​រដ្ឋ​ណាមួយ​ កើតឡើងជា​ដាច់ខាតនៅ​កោះតៃវ៉ាន់។

ក្រៅពីនេះ​លោក ស៊ី បានបន្ថែម​ទៀតថា ដោយសារប្រជាជន​ដែលរស់នៅចិនដីគោក​ និងតៃវ៉ាន់ គឺជាគ្រួសារ​តែមួយ ​បញ្ហា​តៃវ៉ាន់គឺ​ជាកិច្ចការ​ផ្ទៃក្នុង​ដែលគួរដោះ​ស្រាយ​តាមរយៈការ​ពិភាក្សា និងពិគ្រោះយោបល់​រវាងភាគី​ទាំងពីរ និងពុំគួរមាន​ការ​ជ្រៀត​ជ្រែកពីបរទេស​ឡើយ។ លោកប្រធានាធិបតី​ចិន ក៏បានប្រកាស​ផងដែរថា តៃវ៉ាន់នឹង​ទទួលបានការធានា​សន្តិភាព​​យ៉ាងយូរអង្វែង​ប្រសិនបើសុខចិត្តមក​រួបរួមគ្នា​ ដោយសន្តិវិធី​ជាមួយប្រទេសចិន។

គួរជម្រាបថា ទំនាក់ទំនងរវាងចិនដីគោក និងកោះតៃវ៉ាន់បានផ្ទុះភាពតាន​តឹងជាលើក​ដំបូង ចាប់តាំង​ពីឆ្នាំ១៩៤៩មក នៅ​ពេលចលនា​ដែលដឹកនាំដោយគណបក្សជាតិ​និយមចិន បានកាន់កាប់ដែនដី​កោះនេះ ក្រោយពីពួកគេទទួល​បរាជ័យ​ក្នុង​​សង្រ្គាម​ស៊ីវិលចិន ហើយបានបង្កើត​ជាសាធារណរដ្ឋចិន​នៅតៃវ៉ាន់។

ទីក្រុងប៉េកាំងមិនទទួល​ស្គាល់តៃវ៉ាន់ជារដ្ឋឯករាជ្យ​ឡើយ ដោយត្រឹមចាត់​ទុកកោះនេះថា ជាខេត្តស្វយ័ត​មួយប៉ុណ្ណោះក្នុង​ដែនដីចិន​​​ ដោយស្រប​ទៅ​តាមគោលនយោបាយចិនតែមួយ ដែលប្រទេស​ភាគច្រើនបំផុត​នៅក្នុងពិភពលោក រួមទាំង​សហរដ្ឋអាមេរិកផងដែរ​ទទួលស្គាល់នោះ។

ក៏ប៉ុន្តែការថ្លែងសារ​ទៅកាន់ជនរួមជាតិចិនទាំងអស់កាលពី​ ៤០ឆ្នាំមុន បានប្រកាស​​បិទ​បញ្ចប់​នៃ​​សកម្មភាព​ផ្លោង​​គ្រាប់​របស់​ទីក្រុង​​​ប៉េកាំង ទៅលើ​បណ្តាកោះ​គ្រប់គ្រង​ដោយតៃវ៉ាន់​ ដែលនៅកៀក​នឹងចិន ហើយចាប់ពីពេលនោះ​ទំនាក់ទំនង​មិន​ផ្លូវការរវាង​ចិននិងតៃវ៉ាន់ក៏បាន​បន្តឡើងវិញ។ បច្ចុប្បន្ននេះ​​កោះតៃវ៉ាន់មាន​​ផ្ទៃដីសរុប ៣៦,១៩៧គីឡូម៉ែត្រក្រឡា ជាមួយ​ប្រទេសជន​សរុបជាង ២៣.៥លាននាក់ (៩៥ភាគរយភាពដើមកំណើត​ជាជនជាតិហាន)។

ជាមួយគ្នានេះ រដ្ឋាភិបាលទីក្រុង​ប៉េកាំងនា​ថ្ងៃពុធនេះ បានសម្តែង​ការតវ៉ាជាខ្លាំងចំពោះ​សហរដ្ឋអាមេរិក ជុំវិញការ​ចុះហត្ថលេ​ខា​​លើច្បាប់មួយ ស្តីពី​ការផ្តល់ទំនុកចិត្ត​ឲ្យអាស៊ី (Asia Reassurance Initiative Act)។

នាដើម​សប្តាហ៍​ប្រធានាធិបតី​អាមេរិក លោក ដូណាល់ ត្រាំ បានចុះហត្ថលេខា​ឲ្យច្បាប់ខាងលើចូលជាធរមាន​ពេញលេញ​ ដែលជំរុញឲ្យ​អាមេរិកបង្កើនសកម្មភាព​ចូលរួមពាក់ព័ន្ធ​ នៅក្នុងកិច្ចការតំបន់ឥណ្ឌូ-ប៉ាស៊ីហ្វិក ក៏ដូចជាពង្រឹង​ការគាំទ្រ​ដល់​តំបន់នេះ​ ដោយរួមមាន​ទាំងការលក់សព្វាវុធ​ ដល់បណ្តាសម្ព័ន្ធមិត្ត​របស់ទីក្រុង​វ៉ាស៊ីនតោន ក្នុងនោះក៏មានកោះតៃវ៉ាន់​​ផងដែរ។

អ្នកនាំពាក្យ​ក្រសួងការបរទេសចិន លោក លូ កាង (Lu Kang) បានលើកឡើងថា ច្បាប់ផ្តល់ទំនុកចិត្ត​ឲ្យអាស៊ីនេះ បំពានលើ​គោលនយោ​បាយ​ចិនតែមួយ និងប៉ះពាល់​ដល់​កិច្ចការផ្ទៃក្នុង​របស់ចិន។ បើតាម​លោក Lu ទីក្រុងប៉េកាំង​​ទទូចឲ្យ​អាមេរិកបញ្ឈប់​ការអនុវត្តច្បាប់នេះ ហើយដោះស្រាយបញ្ហា​តៃវ៉ាន់ឲ្យ​បានត្រឹមត្រូវ ដើម្បីចៀសវាង​​​ការបំផ្លិចបំផ្លាញ​ដល់ទំនាក់ទំនង​​ទ្វេភាគី ព្រមទាំង​សុខសន្តិភាព និងស្ថិរភាព​នៅតំបន់​ច្រកសមុទ្រ​តៃវ៉ាន់។

គួរជម្រាបថា ក្នុងថ្ងៃជា​មួយគ្នានេះ ប្រធានាធិបតីចិន​លោក ស៊ី ជិនពីង បានកត់សង្កត់ធ្ងន់ថា បញ្ហាតៃវ៉ាន់គឺជា​រឿងផ្ទៃ​ក្នុង​​​របស់ចិន ហើយមិនអនុញ្ញាត​ឲ្យមានការលូកលាន់ពី​ខាងក្រៅដាច់ខាត។ បន្ថែមពីនេះប្រធានាធិបតីចិនក៏បានអំពាវនាវឲ្យកោះតៃវ៉ាន់ មករួបរួម​ជាមួយទីក្រុងប៉េកាំង ដើម្បីទទួលបានការធានាសន្តិភាពយូរអង្វែង ខណៈចិនក៏បាន​ព្រមាន​ផងដែរថា ការប្រើប្រាស់កម្លាំងបាយនៅតែអាចកើតមាន ក្នុងករណីមានបរទេសណាមួយ​ចង់បំបែកកោះតៃវ៉ាន់ពីចិនដីគោកនោះ៕ ម៉ែវ សាធី

 


ចែករំលែក៖