ក្លិបចិន Shanghai Shenhua ដាក់ឱសានវាទដល់ Carlos Tevez ឲ្យវិលវិញ

ក្លិបបាល់ទាត់ Shanghai Shenhua បានប្រកាសឲ្យខ្សែប្រយុទ្ធអាហ្សង់ទីន Carlos Tevez វិលត្រឡប់មកកាន់ប្រទេសចិនវិញឲ្យបានមុនថ្ងៃទី២៦ ខែធ្នូនេះប្រសិនបើរូបគាត់ចង់ បន្តលេងឲ្យក្លិបមួយនេះទៀត។

កីឡាករវ័យ៣៣ឆ្នាំ Tevez បានចាកចេញពីក្លិប Boca Juniors មកលេងឲ្យ Shanghai ក្នុងតម្លៃខ្លួន615.000 ផោនក្នុងមួយសប្តាហ៍។ ប៉ុន្តែអតីតកីឡាករក្លិប Manchester United និងManchester Cityនេះលេងមិនបានល្អសោះដោយរកបានតែ៤គ្រាប់ ក្នុងការបង្ហាញខ្លួន១៦ប្រកួតនៅក្របខ័ណ្ឌកំពូលរបស់ចិន។

Carlos Tevez បានចាកចេញពីប្រទេសចិនទៅកាន់ប្រទេសអាហ្សង់ទីន វិញដើម្បីទៅសម្រាកព្យាបាលរបួសកំភួនជើង។ បច្ចប្បន្នគាត់ពុំទាន់បានវិលត្រឡប់ទៅកាន់ ទីក្រុងសៀងហៃវិញនៅឡើយទេ ខណៈមានព័ត៌មានលេចឮថាគាត់អាចនឹងផ្លាស់ប្តូរក្លិបថ្មី។

នៅពេលជាមួយគ្នានេះអ្នកនាំពាក្យរបស់ក្លិប Shanghai Shenhuaបានបញ្ជាក់ថា “ពួកយើងបានប្រាប់គាត់ឲ្យមកកាន់ក្លិបវិញនៅមុនថ្ងៃទី២៦ ខែធ្នូ ប៉ុន្តែគាត់មកឬមិនមកនោះ គឺជាការសម្រេចចិត្តរបស់គាត់” ៕ ដេវីត