ព័ត៌មានទាន់ហេតុការណ៍៖

ខួបអនុស្សាវរីយ៍លើកទី៤០ នៃទិវាជ័យជំនះ ៧ មករា លើរបបប្រល័យពូជសាសន៍ ប៉ុល ពត នៅគណបក្ស សង្កាត់ព្រៃអង្គុញ ក្រុងបាវិត

ចែករំលែក៖

ខេត្តស្វាយរៀង៖ នាព្រឹកថ្ងៃទី៧ ខែមករា ឆ្នាំ២០១៩ លោក លឹម សៀងហេង អនុប្រធានក្រុមការងារគណបក្សប្រជាជនកម្ពុជា ចុះជួយសង្កាត់ព្រអង្គុញ ក្រុងបាវិត បានអញ្ជើញចូលរួមជាអធិបតីក្នុងពិធីខួបអនុស្សាវរីយ៍លើកទី៤០ នៃទិវាជ័យជំនះ៧មករា លើរបបប្រល័យពូជសាសន៍ ប៉ុល ពត ៧ ខែមករា ២០១៩នៅគណបក្សសង្កាត់ព្រៃអង្គុញក្រុងបាវិត។

លោកលឹម សៀងហេង បានលើកឡើងថា ដោយសារគោលនយោបាយឈ្នះឈ្នះ របស់សម្ដេចតេជោ ហ៊ុន សែន ប្រមុខរាជរដ្ឋាភិបាលកម្ពុជា បាននាំមកនូវសន្ដិភាព និងការអភិវឌ្ឍលើគ្រប់វិស័យ ហើយបានគៀងគរអ្នកវិនិយោគទុន មករកស៊ីនៅប្រទេស​កម្ពុជា បង្កើតឱ្យមានរោងចក្រសហគ្រាស យ៉ាងច្រើនធ្វើឱ្យប្រជាពលរដ្ឋមានការងារធ្វើ។

លោកលឹម សៀងហេង ​បានសង្កត់ធ្ងន់ថា «យើងប្រារព្ធពិធីនេះឡើង ក្នុងស្មារតីចងចាំជានិច្ច នូវគុណណូបការៈដ៏ឧត្តុងឧត្តមរបស់វីរកម្មាភិបាល យុទ្ធជន យុទ្ធនារី នៃរណសិរ្សសាមគ្គី សង្គ្រោះជាតិកម្ពុជា និងវីរកងទ័ពស្ម័គ្រចិត្តវៀតណាម ដែលបានលះបង់យ៉ាងធំធេងក្នុងការប្រយុទ្ធ ដើម្បីផ្តួលរំលំរបបប្រល័យពូជសាសន៍ ប៉ុល ពត និងការពារការរស់នៅរបស់ប្រជាជនកម្ពុជា​ ជ័យជម្នះ​ ៧​មករា​ បាន​សង្រ្គោះ​អាយុ​ជីវិត​ប្រជាជន​ឱ្យ​រស់​រាន​ឡើង​វិញ ​ទាន់​ពេលវេលា​ផុត​ពី​ការ​សម្លាប់​រង្គាល​ នៃ​របប​ប្រល័យ​ពូជសាសន៍​ ប៉ុល​ ពត»​ ។ជ័យជម្នះ​ ៧​មករា​ បាន​បិទ​ទំព័រ​សករាជ​ដ៏ខ្មៅ​ងងឹត​បំផុត​នៃ​កម្ពុជា ​ហើយ​បើក​ឡើង​នូ​វ​ទំព័រ​សករាជ​ថ្មី​ គឺ​ឯករាជ្យ​ សេរីភាព​ ប្រជាធិបតេយ្យ​ និង​វឌ្ឍនភាព​។ ប្រជាជន​បាន​ទទួល​មកវិញ​នូវ​សិទ្ធិ​សេរីភាព​ កិត្តិយស​ សេចក្ដី​ថ្លៃថ្នូរ​ ដែល​បាន​បាត់បង់​ទាំងស្រុង​ក្នុង​របប​ ប៉ុល​ ពត​ ប្រែក្លាយ​ជា​ម្ចាស់ ​លើ​ជោគវាសនា​របស់​ខ្លួន​ពិត​ប្រាកដ​ ​ហើយ​មាន​អ្វី​ៗ ទាំង​អស់​ដូច​បច្ចុប្បន្ន​ និង​បន្ត​ទៅ​អនាគត​។

លោកបន្ថែមទៀតថា រាជរដ្ឋាភិបាល បានដោះស្រាយជូនប្រជាពលរដ្ឋ ដូចជា បន្តមិនយកពន្ធលើដីស្រែចម្ការ, ​បញ្ចុះតម្លៃអគ្គិសនី, តម្លើងប្រាក់ខែជូនដល់មន្ត្រីរាជការ គ្រូបង្រៀន កងកម្លាំងប្រដាប់អាវុធ ​កម្មការីនីរោងចក្រ, មិនយកតម្លៃក្នុងការធ្វើសំបុត្រកំណើត សំបុត្រអាពាហ៍ពិពាហ៍ សំបុត្រមរណៈភាព អត្តសញ្ញាណបណ្ណសញ្ជាតិខ្មែរ, សម្រេចលុបចោលការបង់ភាស៊ី និងបង់ថ្លៃផ្សេងៗទៀត ចំពោះការលក់ដូររបស់ប្រជាពលរដ្ឋតាមកញ្ច្រែង កញ្ជើ ល្អី នៅតាមទីផ្សារទូទាំងប្រទេស ព្រមទាំងបន្តកំណែទម្រង់ស៊ីជម្រៅលើគ្រប់វិស័យ ការប្រយុទ្ធ​ប្រឆាំងអំពើពុករលួយ ការបង្ក្រាបចោរកម្ម ឃាតកម្មគ្រឿងញៀន ការកាប់ឈើខុសច្បាប់ ការទន្រ្ទានដីធ្លីខុសច្បាប់ បទល្មើសនេសាទ អាជីវកម្មរ៉ែខុសច្បាប់ និងដាក់កុងត្រូលយកលុយជាដើម​។

បន្ទាប់មកលោកអនុប្រធានក្រុមការងារសង្កាត់ក៏បានសំណូមពរឲ្យប្រជាពលរដ្ឋទាំងអស់បន្តគាំទ្រ បោះឆ្នោតជូនគណបក្សប្រជាជនកម្ពុជា និងផ្តាំផ្ញើឲ្យប្រជាពលរដ្ឋទាំងអស់ គោរពច្បាប់ចរាចរាណ៍ផ្លូវគោក និងជៀសឲ្យឆ្ងាយអំពីគ្រឿងញៀន​។

ជាមួយគ្នានោះដែរ លោកលឹម សៀងហេង ក៏បាននាំអំណោយជាថវិការ ជូនដល់សមាជិកសមាជិការបក្សដែលបានចូលរួមក្នុងម្នាក់ៗ ទទួលបាន១ម៉ឺនរៀល និងពិសាអាហារសាមគ្គីយ៉ាងសប្បាយរីករាយនិងភាពស្និតស្នាលផងដែរ៕ យឹម សុថាន


ចែករំលែក៖