សារព័ត៌មាន នគរវត្ត តែងតែនាំមុខគេជានិច្ច
ប្រជាពលរដ្ឋតាមបណ្ដាស្រុកមួយចំនួនក្នុងខេត្តកំពង់ចាម បានឲ្យដឹងថា ក្នុងមូលដ្ឋានពួកគាត់ល្បែងស៊ីសងខុសច្បាប់បៀអាប៉ោង និងបញ្ជល់មាន់កំពុងកើតឡើងយ៉ាងអនាធិបតេយ្យ ហើយលោក ឯម កុសល ស្នងការនគរបាលខេត្តកំពង់ចាម និងលោក គួច ចំរើន អភិបាលខេត្តកំពង់ចាម មិនចាត់វិធានការបង្ក្រាបល្បែងស៊ីសងដើម្បីពង្រឹងសន្តិសុខសង្គមឡើយ។ បញ្ហានេះគឺជារឿងដែលថ្នាក់ដឹកនាំក្រសួងមហាផ្ទៃ ក៏ដូចជានាយឧត្តមសេនីយ៍ នេត សាវឿន អគ្គស្នងការនគរបាលជាតិ មិនគួរមើលរំលងតទៅទៀតនោះទេ ព្រោះសេចក្ដីរាយការណ៍ខ្លះបានឲ្យដឹងថា មន្ត្រីអាជ្ញាធរនិងសមត្ថកិច្ចក្នុងមូលដ្ឋានគឺជាអ្នកឃុបឃិតឲ្យជនល្មើសបើកល្បែងស៊ីសងដើម្បីជាថ្នូរនឹងផលប្រយោជន៍។
ប្រភពពីប្រជាពលរដ្ឋនៅក្នុងឃុំមានជ័យ ស្រុកស្រីសន្ធរ ខេត្តកំពង់ចាម បានឲ្យដឹងថា កាលពីថ្ងៃទី១៤ ខែមេសា កន្លងទៅថ្មីៗនេះសមត្ថកិច្ចបានចុះបង្ក្រាបសង្វៀនបញ្ជល់មាន់មួយកន្លែងនៅភូមិមាន់ដប់លើ ឃុំមានជ័យ ស្រុកស្រីសន្ធរ ហើយបង្ក្រាបបានតែកៅអីជ័រចំនួន១២៨ តុដែកចំនួន៤, ស៊ុមក្រុងមាន់ចំនួន៤៤ និងតុឈើមូលដែលមានក្រាលកម្រាលហាន់តោអាប៉ោងមួយផ្ទាំងផងដែរ ចំណែកអ្នកលេងល្បែងនិងម្ចាស់សង្វៀនបញ្ជល់មាន់គេចខ្លួនចេញពីកន្លែងកើតហេតុអស់។ ករណីនេះត្រូវប្រជាពលរដ្ឋបង្ហើបឲ្យដឹងថា មានសមត្ថកិច្ចមូលដ្ឋានជាអ្នកផ្ដល់ព័ត៌មានឲ្យម្ចាស់សង្វៀនបញ្ជល់មាន់និងអ្នកលេងល្បែងបញ្ជល់មាន់បានដឹងជាមុនទើបពួកគេអាចគេចខ្លួនពីកន្លែងកើតហេតុយ៉ាងស្រួលៗ។
តាមការអះអាងរបស់ប្រជាពលរដ្ឋក្នុងភូមិមាន់ដប់លើ ឃុំមានជ័យ ស្រុកស្រីសន្ធរ បានឲ្យដឹងថា ប្រសិនបើគ្មានការឃុបឃិតបើកដៃពីសំណាក់មេនគរបាលប៉ុស្ដិ៍រដ្ឋបាលមានជ័យ ក៏ដូចជាអធិការនគរបាលស្រុកស្រីសន្ធរ ទេនោះគឺគ្មាននរណាហ៊ានបើកល្បែងបញ្ជល់មាន់និងល្បែងអាប៉ោងស្រេចតែអំពើចិត្តទេ។ ទន្ទឹមនឹងនេះសេចក្ដីរាយការណ៍ពីប្រជាពលរដ្ឋនៅស្រុកស្ទឹងត្រង់ ក៏បានឲ្យដឹងដែរថា មានសង្វៀនបញ្ជល់មាន់ធំមួយត្រូវគេបើកលេងយ៉ាងរលូនដែរ គឺនៅក្នុងភូមិអូរប្រាំ ឃុំអូរម្លូ ដោយមានឈ្មោះ វ៉ាន់ ជាអ្នករត់ការជាមួយសមត្ថកិច្ច ហើយមិនទាន់ឃើញមានការបង្ក្រាបនៅឡើយទេ។ ចំណែកនៅជិតផ្សារបែកអន្លូង ស្រុកស្ទឹងត្រង់ ក៏មានសង្វៀនបញ្ជល់មាន់ដ៏ធំមួយផងដែរដោយមានអ្នកកាងឈ្មោះ អាតា និងមានការឃុបឃិតបើកដៃពីសំណាក់មន្ត្រីអាជ្ញាធរនិងសមត្ថកិច្ចមូលដ្ឋានដែលគិតតែពីរឿងផលប្រយោជន៍ផ្ទាល់ខ្លួន ៕
