សារព័ត៌មាន នគរវត្ត តែងតែនាំមុខគេជានិច្ច
តាមប្រភពព័ត៌មានពីប្រជានេសាទនៅក្នុងឃុំសំព្រោជ ឃុំម្សាក្រង និងឃុំចំណារក្រោម ស្រុកស្ទោង ខេត្តកំពង់ធំ បានឲ្យដឹងថា បច្ចុប្បន្នបទល្មើសនេសាទប្រើឧបករណ៍ខុសច្បាប់ ជាពិសេសឧបករណ៍ឆក់ត្រីកំពុងកើតឡើងយ៉ាងរាលដាលនៅតាមអូរព្រែក ត្រពាំងបឹងបួ ហើយគ្មានមន្ត្រីជំនាញឬសមត្ថកិច្ចពាក់ព័ន្ធណាចាត់វិធានការបង្ក្រាបនោះទេ។ ប្រភពពីប្រជានេសាទបានឲ្យដឹងទៀតថា ការដែលបទល្មើសនេសាទប្រើឧបករណ៍ខុសច្បាប់កើតឡើងយ៉ាងពេញបន្ទុក គឺមានការឃុបឃិតបើកដៃពីសំណាក់លោក កន ចន្ទសីហា នាយសង្កាត់រដ្ឋបាលជលផលស្ទោង ដែលល្បីល្បាញខាងប្រព្រឹត្តអំពើពុករលួយជាយូរមកហើយ។ ចំណែកលោក ប៉ែន វណ្ណរឹទ្ធ នាយខណ្ឌរដ្ឋបាលជលផលខេត្តកំពង់ធំ បានរក្សាភាពស្ងៀមស្ងាត់ទុកឲ្យមន្ត្រីក្រោមឱវាទធ្វើអ្វីៗស្រេចតែអំពើចិត្ត ក្នុងខណៈដែលធនធានមច្ឆជាតិត្រូវប្រឈមនឹងសេចក្ដីវិនាស។
មន្ត្រីអាជ្ញាធរមូលដ្ឋានក្នុងឃុំចំណារក្រោម ឃុំម្សាក្រង និងឃុំសំព្រោជ បានឲ្យដឹងថាលោក កន ចន្ទសីហា មិនត្រឹមតែឃុបឃិតឲ្យជនល្មើសប្រើឧបករណ៍ឆក់ត្រីតាមបឹងព្រែក អូរត្រពាំង យ៉ាងរាលដាលប៉ុណ្ណោះទេគឺសូម្បីតែនៅក្នុងតំបន់បឹងទន្លេសាបក៏លោក កន ចន្ទសីហា បណ្ដោយឲ្យមានបទល្មើសប្រើឧបករណ៍ខុសច្បាប់កើតឡើងយ៉ាងពេញបន្ទុកដែរ។ សេចក្ដីរាយការណ៍ពីប្រជានេសាទក្នុងតំបន់បឹងទន្លេសាប នៃស្រុកស្ទោង ខេត្តកំពង់ធំ បានឲ្យដឹងថា អ្នកប្រព្រឹត្តបទល្មើសប្រើឧបករណ៍ខុសច្បាប់ត្រូវតែបង់លុយតាមការកំណត់របស់លោក កន ចន្ទសីហា នាយសង្កាត់រដ្ឋបាលជលផលស្ទោង ទើបអាចគេចផុតពីការបង្ក្រាប។ គ្មានជនល្មើសណាម្នាក់ដែលមិនបង់លុយឲ្យលោក កន ចន្ទសីហា នោះទេប្រសិនបើពួកគេចង់ប្រើឧបករណ៍ខុសច្បាប់ចាប់ត្រីក្នុងបឹងទន្លេសាប និងតាមបឹងបួអូព្រែកត្រពាំងនៅក្នុងស្រុកស្ទោង ខេត្តកំពង់ធំ។
កន្លងមកប្រជាពលរដ្ឋក្នុងឃុំសំព្រោជ ឃុំចំណារក្រោម និងឃុំម្សាក្រង បានអំពាវនាវឲ្យលោក សុខ លូ អភិបាលខេត្តកំពង់ធំ ចាត់វិធានការបង្ក្រាបបទល្មើសនេសាទក្នុងស្រុកស្ទោង ខេត្តកំពង់ធំ ប្រកបដោយប្រសិទ្ធភាពព្រោះរយៈពេលប្រមាណ២ខែចុងក្រោយនេះ បទល្មើសនេសាទប្រើឧបករណ៍ខុសច្បាប់រាលដាលកាន់តែខ្លាំងជាងមុន។ ក៏ប៉ុន្តែជាក់ស្ដែងលោក សុខ លូ អភិបាលខេត្តកំពង់ធំ ក៏ដូចជាលោក ធីវ វណ្ណធី ប្រធានមន្ទីរកសិកម្មខេត្តកំពង់ធំ មិនចាត់វិធានការទប់ស្កាត់បទល្មើសប្រើឧបករណ៍ខុសច្បាប់ដែលកំពុងកើតឡើងយ៉ាងរាលដាលនៅក្នុងស្រុកស្ទោង នោះទេ។ ប្រការនេះហើយដែលធ្វើឲ្យលោក កន ចន្ទសីហា នាយសង្កាត់រដ្ឋបាលជលផលស្ទោង មានសិទ្ធិអំណាចកាន់តែធំធេងក្នុងការឃុបឃិតឲ្យជនល្មើសប្រើឧបករណ៍ខុសច្បាប់ចាប់ត្រីដើម្បីជាថ្នូរនឹងផលប្រយោជន៍។ ដូច្នេះលោក វេង សាខុន រដ្ឋមន្ត្រីក្រសួងកសិកម្ម និងលោក អេង ជាសាន អគ្គនាយករដ្ឋបាលជលផល គួរចាត់វិធានការទប់ស្កាត់បទល្មើសនេសាទក្នុងស្រុកស្ទោង ជាបន្ទាន់ហើយមិនត្រូវបណ្ដោយឲ្យមន្ត្រីពុករលួយធ្វើអ្វីៗតាមអំពើចិត្តទៀតទេ៕
