សារព័ត៌មាន នគរវត្ត តែងតែនាំមុខគេជានិច្ច
ប្រភពពីប្រជាសហគមន៍នៅក្នុងស្រុកពេជ្រាដា ខេត្តមណ្ឌលគិរី បានឲ្យដឹងថាថ្មីៗនេះមានសមត្ថកិច្ច២នាក់ ដែលមានតួនាទីការពារនៅប៉ុស្ដិ៍ច្រករបៀងក្បាលដំរី ស្រុកពេជ្រាដា កំពុងឃុបឃិតឲ្យជនជាតិវៀតណាមចូលមកកាប់ឈើក្នុងទឹកដីខ្មែរតាមព្រំដែនយ៉ាងគឃ្លើន។ ប្រជាសហគមន៍និងមន្ត្រីអង្គការក្រៅរដ្ឋាភិបាលបានអំពាវនាវឲ្យអាជ្ញាធរខេត្តមណ្ឌលគិរី ចាត់វិធានការទប់ស្កាត់ជាបន្ទាន់កុំឲ្យបទល្មើសកាប់ឈើកើតឡើងយ៉ាងអនាធិបតេយ្យតទៅទៀត។ ដោយហេតុថា បទល្មើសកាប់ឈើនៅចំណុចច្រកក្បាលដំរីនាពេលនេះ មិនចាញ់បទល្មើសដែលកើតឡើងនៅតំបន់អូរហ៊ុច កាលពីដើមឆ្នាំ២០១៧នោះឡើយ។
មន្ត្រីអាជ្ញាធរមូលដ្ឋានក្នុងស្រុកពេជ្រាដា បានឲ្យដឹងថា សមត្ថកិច្ចទាំង២នាក់ដែលជាប់ពាក់ព័ន្ធបទល្មើសកាប់ឈើនៅចំណុចក្បាលដំរីនោះ ទី១មានឈ្មោះ មុន ភីនី ជាមេប៉ុស្ដិ៍ស្ដីទីនគរបាលការពារព្រំដែនក្បាលដំរី និងទី២ឈ្មោះ កែវ សុភ័ក្រ មានតួនាទីជាមេបញ្ជាការកងអនុសេនាតូចលេខ១។ សមត្ថកិច្ចទាំង២នាក់នេះបានឃុបឃិតបើកដៃឲ្យជនជាតិវៀតណាមចូលមកកាប់ឈើនៅចំណុចដែនជម្រកសត្វព្រៃស្រែពក ហើយដឹកចេញទៅប្រទេសវៀតណាមតាមច្រករបៀងក្បាលដំរីជាញឹកញាប់ដោយមិនឃើញមានមន្ត្រីជំនាញឬសមត្ថកិច្ចពាក់ព័ន្ធណាចាត់វិធានការទប់ស្កាត់នោះទេ។ សូម្បីតែប្រធានមន្ទីរបរិស្ថានខេត្តមណ្ឌលគិរី ដែលមានលោកព្រំ សុវណ្ណា ជានាយកដែនជម្រកសត្វព្រៃស្រែពក ក៏រក្សាភាពស្ងៀមស្ងាត់ទុកឲ្យសមត្ថកិច្ចទាំង២នាក់ខាងលើធ្វើអ្វីៗស្រេចតែអំពើចិត្ត ក្នុងខណៈដែលព្រៃឈើនៅតំបន់ដែនជម្រកសត្វព្រៃស្រែពក កំពុងប្រឈមនឹងការបំផ្លាញយ៉ាងពេញបន្ទុក។
សេចក្ដីរាយការណ៍ពីសមត្ថកិច្ចតូចតាចនៅស្រុកពេជ្រាដា បានឲ្យដឹងថាកាលពីដើមខែកញ្ញា ឆ្នាំ២០១៧ លោក មុន ភីនី និងលោក កែវ សុភ័ក្រ បានបើកដៃឲ្យជនជាតិវៀតណាមចូលមកកាប់ឈើនិងដឹកជញ្ជូនឈើចេញចំនួន២រថយន្តកែច្នៃ ហើយនៅសល់ឈើហ៊ុបចំនួន១៥ដើមសម្រាប់ត្រៀមដឹកចេញបន្តទៀត។ ប្រការនេះហើយដែលប្រជាពលរដ្ឋអំពាវនាវឲ្យអាជ្ញាធរខេត្តមណ្ឌលគិរី ក៏ដូចជាលោក កែវ សុភគ៌ ប្រធានមន្ទីរបរិស្ថានខេត្តមណ្ឌលគិរី ចាត់វិធានការទប់ស្កាត់ជាបន្ទាន់កុំឲ្យបទល្មើសកាប់ឈើនៅក្នុងដែនជម្រកសត្វព្រៃស្រែពក ដឹកជញ្ជូនទៅវៀតណាមបន្តកើតឡើងយ៉ាងអនាធិបតេយ្យតទៅទៀត៕
