សារព័ត៌មាន នគរវត្ត តែងតែនាំមុខគេជានិច្ច
កាលពីថ្ងៃទី២៥ ខែកញ្ញា ឆ្នាំ២០១៧ គោយន្តកន្ត្រៃ(សែកាង) ប្រភេទជារថយន្តកែច្នៃត្រូវបាននាំចូលពីទឹកដីវៀតណាម តាមប៉ុស្តិ៍៧៥១ ច្រកណាំលៀ-ប៉ុស្តិ៍៧ ដើម្បីចូលទៅដឹកឈើនៅចំណុចប៉ុស្តិ៍៤ ប៉ុស្តិ៍៥ ត្រូវបានបែកការណ៍ហើយនៅរសៀលថ្ងៃទី២៦ ខែកញ្ញា ឆ្នាំ២០១៧ លោកស្នងការនគរបាលខេត្ត ក៏បានទទួលដំណឹងនេះ និងបញ្ជាទៅកាន់ស្នងការរងទទួលបន្ទុកព្រំដែន ស្នងការរងទទួលបន្ទុកសន្តិសុខ មេបញ្ជាការនគរបាលវរៈព្រំដែន អធិការនគរបាលស្រុកក្នុងដែនដីពាក់ព័ន្ធ ត្រូវទប់ស្កាត់ និងចុះប្រមូលព័ត៌មាន ស៊ើបអង្កេត តាមដានរកឲ្យឃើញជុំវិញនឹងសកម្មភាពអនុញ្ញាតឲ្យរថយន្តកន្ត្រៃ (សែកាង)ចូលមកដឹកឈើក្នុងទឹកដីខ្មែរ។ ក្នុងនោះលោកស្នងការថែមទាំងស្តីបន្ទោសទៅកាន់មន្ត្រីរបស់ខ្លួនថា អាចនឹងមានអំពើឃុបឃិតគ្នា ដូច្នេះ ត្រូវទទួលខុសត្រូវតាមតួនាទី ភារកិច្ច។
នៅព្រឹកថ្ងៃទី២៧ ខែកញ្ញា ឆ្នាំ២០១៧ ឃើញថា មានអាជ្ញាធរ សមត្ថកិច្ចបានយកចិត្តទុកដាក់ក្នុងរឿងនេះ បន្ទាប់ពីថ្នាក់លើដាក់ភាពសង្ស័យ និងទទួលស្គាល់ថា សកម្មភាពបទល្មើសដឹកជញ្ជូនឈើនៅតែមាន។ មិនត្រឹមតែប៉ុណ្ណោះ លោកស្នងការនគរបាលខេត្ត ទន្ទឹមនឹងចេញបញ្ជាទៅកាន់ស្នងការរងទទួលបន្ទុក នគរបាលវរៈព្រំដែន និងនគរបាលស្រុកពាក់ព័ន្ធរួចមក លោកក៏បានដឹកនាំកម្លាំងចុះចូលទៅក្នុងព្រៃនោះដោយផ្ទាល់ ប៉ុន្តែពុំទាន់មានព័ត៌មានជាក់លាក់ណាមួយទម្លាយឲ្យដឹងថា អាចចាប់បានចំពោះបទល្មើសនោះនៅឡើយទេ។
គេបានលួចទម្លាយថា ករណីរថយន្តកន្ត្រៃសែកាង ដែលចូលមកទឹកដីខេត្តមណ្ឌលគីរីតាមតំបន់អូរតាំកន និងចន្លោះប៉ុស្តិ៍៧រវាងប៊ូស្រាជិត៥០គ្រឿងនោះ គឺមានឈ្មោះមន្ត្រីយោធាព្រំដែនមួយរូបឈ្មោះ ម៉ៅ ជាដៃស្តាំលោកផ្កាយ១ ឃឹន ម៉េងស្រេង មេបញ្ជាការតំបន់ប្រតិបត្តិការសឹករងខេត្ត និងអតីតជាតៃកុងឡានព្រះរាជអាជ្ញា គាត់ជាអ្នកចេញមុខធ្វើកិច្ចការនាំគោយន្តកន្ត្រៃសែកាងវៀតណាមមកដឹកឈើនៅតំបន់ប៉ុស្តិ៍៤ ប៉ុស្តិ៍៥ ។ បើទោះជាពាក់ព័ន្ធ ឬមិនពាក់ព័ន្ធជាមួយលោកផ្កាយ១ ឃឹន ម៉េងស្រេងក៏ដោយ ប្រភពនៅទីនោះបានបង្ហើបថា ឈ្មោះ ម៉ៅ នេះគេចខ្លួនទៅប្រទេសវៀតណាម ហើយក៏កំពុងរង់ចាំមើលពីលទ្ធផល តើសមត្ថកិច្ចដែលកំពុងបង្កើតក្រុមចុះទៅបង្ក្រាប ឈានដល់ដឹងមុខសញ្ញាអ្នកនាំមធ្យោបាយដឹកបទល្មើសឈើនេះជានរណាពិតប្រាកដនោះទេ? ដើម្បីខ្លួនរកច្រកចេញ។
គួររំលឹកថា មុនពេលភ្ជុំបិណ្ឌ លោកសំរិទ្ធ ណយ មេនគរបាលប៉ុស្តិ៍៧ បានអនុញ្ញាតឲ្យរថយន្តឡង់គ្រីសឺកែច្នៃដឹកឈើឆ្លងទៅវៀតណាមតាមប៉ុស្តិ៍ខ្លួនគ្រប់គ្រងក្នុងមួយយប់មាន៧ទៅ១៥គ្រឿង ក្រោយមកក៏បែកការណ៍ និងផ្អាកមួយរយៈ។ ទន្ទឹមនោះកាលពីថ្ងៃទី២៥ ខែកញ្ញា ឆ្នាំ២០១៧ ឮថា សំរិទ្ធ ណយ ដែលញៀននឹងការបើកភ្លើងខៀវឲ្យរថយន្តដឹកឈើឆ្លងកាត់ទៅវៀតណាមតាមប៉ុស្តិ៍ដែលខ្លួនកាន់កាប់មានពាក់ព័ន្ធទៅនឹងការបែងចែកកញ្ចប់ ទើបឈ្មួញវៀតណាមបានបង្វែទិសដៅតាមគម្រោងដែលចូលមកដឹកឈើនៅប៉ុស្តិ៍៤ប៉ុស្តិ៍៥ តាមច្រក៧៥១របស់វៀតណាម ប្តូរទិសដៅ ខណៈបែកការណ៍ ក៏អនុញ្ញាតឲ្យគោយន្តកន្ត្រៃសែកាងចូលជិត៥០គ្រឿងតាមតំបន់អូរតាំកន ជិតប៉ុស្តិ៍៧ ចន្លោះប៊ូស្រា ដើម្បីគេចវេះពីការទទួលខុសត្រូវចំពោះច្រកទ្វេភាគីប៉ុស្តិ៍៧។
សមត្ថកិច្ចបានបញ្ជាក់ថា លោកស្នងការដែលទើបនឹងឡើងកាន់តំណែងថ្មីជិត៣ខែមកនេះ បានយកចិត្តទុកដាក់ក្នុងរឿងនេះរហូតដឹកនាំកម្លាំងចុះទៅក្នុងព្រៃដើម្បីប្រមាញ់ចាប់។ ក្នុងនោះគេទទួលស្គាល់ថា ស្នងការរង ស្នងការរងទទួលបន្ទុកអាចនឹងពាក់ព័ន្ធជាមួយនឹងមន្ត្រីរបស់ខ្លួនតាមបណ្តាប៉ុស្តិ៍ ទើបឈានដល់ការអនុញ្ញាតឲ្យវៀតណាមចូលមកដឹកឈើក្នុងទឹកដីខ្មែរ ប៉ុន្តែត្រូវបរាជ័យ។ ដូច្នេះ ក្នុងរឿងនេះ គេក៏បានទម្លាយថា អាចជាការបើកភ្លើងខៀវ ឬជំរុញណាមួយពីលោកផ្កាយ១ ឃឹន ម៉េងស្រេង ដើម្បីឲ្យមន្ត្រីយោធាឈ្មោះ ម៉ៅ ដៃស្តាំរបស់ខ្លួននាំរថយន្តកន្ត្រៃសែកាងចូលមកដឹកឈើ សម្រាប់ជាតំណែងចុងក្រោយរបស់ខ្លួន ដែលប្រឈមនឹងការពិន័យពីថ្នាក់លើ ជាប់ពាក់ព័ន្ធនឹងបទល្មើសព្រៃឈើ និងព្យាយាមរកប្រាក់សារជាថ្មីដើម្បីប្រើប្រាស់ទៅលើបញ្ហារបស់ខ្លួនទាំងផ្នែកផ្លូវច្បាប់ និងមុខតំណែង។ ករណីនេះ ក៏ពុំទាន់មានប្រភពច្បាស់ការណ៍នៅឡើយថា តើលោកឃឹន ម៉េងស្រេងពិតជាបានពាក់ព័ន្ធមែនឬមួយយ៉ាងណានោះទេ ដោយមជ្ឈដ្ឋានមួយចំនួនកំពុងតែតាមដានក្នុងរឿងនេះ បន្ទាប់ពីសកម្មភាពអនុញ្ញាតឲ្យវៀតណាមចូលមកដឹកឈើនៅតំបន់អូរហ៊ុចត្រូវបានបង្ក្រាបក្នុងបទល្មើសជាក់ស្តែងដោយកម្លាំងកងរាជអាវុធហត្ថលើផ្ទៃប្រទេស និងជោគជ័យ។ ចំពោះសកម្មភាពនៅប៉ុស្តិ៍៤ប៉ុស្តិ៍៥ ឬប៉ុស្តិ៍៧៥១របស់វៀតណាម ប៉ុស្តិ៍៧ តំបន់ទ្វេភាគី ប្រសិនបើមិនមានវិធានការទប់ស្កាត់ទាន់ពេលវេលាទេនោះ សកម្មភាពដឹកឈើចេញពីប៉ុស្តិ៍៤ ប៉ុស្តិ៍៥ ក្នុងស្រុកពេជ្រាដា ខេត្តមណ្ឌលគិរីមានទ្រង់ទ្រាយធំជាងតំបន់អូរហ៊ុច ខណៈកន្លងទៅឈ្មួញវៀតណាមបានខាតប្រាក់យ៉ាងច្រើនសម្រាប់យកមកចាយរត់ការណ៍ដើម្បីយកត្រាក់ទ័រ និងរថយន្តបាកុងមកដឹកឈើនៅតំបន់ប៉ុស្តិ៍៤ប៉ុស្តិ៍៥ ត្រូវបរាជ័យ។ លើកនេះ ខាងឈ្មួញវៀតណាម ក៏ខាតប្រាក់មួយចំនួនធំក្នុងករណីគោយន្តកន្ត្រៃសែកាងចូល ហើយត្រូវបានបែកការណ៍ និងមានសមត្ថកិច្ចជាច្រើនស្ថាប័នចុះទៅស៊ើបអង្កេតស្រាវជ្រាវដើម្បីបង្ក្រាប ។ ប៉ុន្តែឈ្មួញវៀតណាមមិនបោះបង់លុយរបស់ខ្លួនដែលបានចំណាយនោះចោលទេ នឹងព្យាយាមរកឱកាស ក៏ដូចជាសហការជាមួយនឹងយោធាព្រំដែន នគរបាលព្រំដែនដើម្បីមានឱកាសប្រមូលឈើនៅតំបន់ប៉ុស្តិ៍៤ប៉ុស្តិ៍៥បន្តទៀត៕
