សារព័ត៌មាន នគរវត្ត តែងតែនាំមុខគេជានិច្ច
ប្រជាពលរដ្ឋរកស៊ីកាប់ឆ្ការព្រៃស៊ីឈ្នួលគេបានឲ្យដឹងថា ពួកគាត់ក្លាយទៅជាជនរងគ្រោះដោយសារតែក្រុមមន្ត្រីបរិស្ថាននៃមន្ទីរបរិស្ថានខេត្តកំពង់ធំចាប់សង្កត់កយកលុយ ព្រោះតែថា បានប្រព្រឹត្តល្មើសច្បាប់ក្នុងការកាប់រានព្រៃ ក្នុងដែនសមត្ថកិច្ចបរិស្ថាន ។ ប៉ុន្តែពួកឈ្មួញថៅកែធំៗ កាប់រានព្រៃដីរាប់រយហិកតា មិនឃើញលោកបរិស្ថានចាប់បង្ក្រាបនោះទេ ។ ក្រៅពីនោះ បទល្មើសនៃការកាប់បំផ្លាញព្រៃឈើ និងដឹកជញ្ជូនឈើបានកើតឡើងយ៉ាងគគ្រឹកគគ្រេងក្នុងដែនសមត្ថកិច្ចរបស់បរិស្ថាន ប៉ុន្តែមិនឃើញពួកមន្ត្រីបរិស្ថានបង្ក្រាបនោះឡើយ ។
ជាក់ស្តែងប្រជាពលរដ្ឋមួយគ្រួសារដែលស៊ីឈ្នួលកាប់រានដីព្រៃត្រូវបានពួកមន្ត្រីបរិស្ថានចាប់ផាកពិន័យជាប្រាក់២លានរៀល នៅគ្រាដែលគ្រួសារក្រីក្រនេះស៊ីឈ្នួលកាប់ឆ្ការព្រៃទំហំមួយហិកតាមិនបាន៥០ម៉ឺនរៀលផងនោះ ។ ថ្វីបើរឿងនេះបានចប់ក៏ពិតមែន ប៉ុន្តែប្រជាពលរដ្ឋនៅតែរិះគន់ក្រុមមន្ត្រីបរិស្ថាន ក្រោមអំណាចបញ្ជាលោកតុប កក្កដា ដែលគាបសង្កត់លើប្រជាពលរដ្ឋក្រីក្រតូចតាច ផ្ទុយទៅវិញ បែរជាត្រូវរ៉ូវជាមួយឈ្មួញអ្នកមានអំណាចមានលុយ ប្រព្រឹត្តបទល្មើស កាប់បំផ្លាញ និងដឹកជញ្ជូនព្រៃឈើយ៉ាងគគ្រឹកគគ្រេងនៅតំបន់ទំរីង ក្នុងស្រុកសណ្តាន់ ។ សកម្មភាពកាប់ និងដឹកជញ្ជូនឈើនៅតែបន្តកើតមានជារៀងរាល់ថ្ងៃក្នុងដែនសមត្ថកិច្ចបរិស្ថាន ហើយពេលខ្លះ ពួកគេចាប់បានឈើមិនព្រមប្រគល់ឲ្យស្ថាប័នជំនាញនោះទេ បែរជាដោះលែងយកប្រាក់ងាយៗទៀតផង ។
លោក តុប កក្កដា ត្រូវគេអះអាងថា កំពុងកាក់កបយ៉ាងសម្បើមក្នុងបញ្ហាបទល្មើសព្រៃឈើ ក៏ដូចជាបញ្ហាបទល្មើសនេសាទក្នុងខេត្តកំពង់ធំ ។ ដោយសារភាពទន់ជ្រាយរបស់លោកសុខ លូ អភិបាលខេត្តកំពង់ធំ ទើបជាហេតុធ្វើឲ្យប្រធានមន្ទីរបរិស្ថានខេត្តនេះ ហ៊ានធ្វើអី្វៗតាមអំពើចិត្ត ។ ប្រជាពលរដ្ឋនិយាយថាបទល្មើសនៃការកាប់បំផ្លាញព្រៃឈើ និងការដឹកជញ្ជូននៅតំបន់ការពារ ក្រោមដែនសមត្ថកិច្ចបរិស្ថាន បានកើតមានយ៉ាងសកម្ម ។ ការដឹកជញ្ជូនឈើ ក៏កំពុងកើតមានយ៉ាងខ្លាំងក្លាដែរ ។ កម្លាំងបរិស្ថានរបស់លោកតុប កក្កដា ចាំយកប្រាក់ពីបទល្មើសទាំងការកាប់បំផ្លាញ និងដឹកជញ្ជូនយ៉ាងត្រជាក់ចិត្ត ។ ភាពស្ងៀមស្ងាត់របស់អាជ្ញាធរខេត្តកំពង់ធំ ធ្វើឲ្យលោកតុប កក្កដា កាន់តែបានដៃ ។ យ៉ាងណាប្រជាពលរដ្ឋរំពឹងថា ក្រសួងបរិស្ថានមិនបណ្តោយឲ្យតុប កក្កដា ជិះសេះលែងដៃដូចសព្វថ្ងៃនេះឡើយ ៕
