សារព័ត៌មាន នគរវត្ត តែងតែនាំមុខគេជានិច្ច
គេរាយការណ៍ថា បទល្មើសនេសាទ ដែលកើតមានព្រោងព្រាត នៅក្នុងស្រុកបុរីជលសា និងស្រុកអង្គរបុរី ក៏ដូចជាបណ្តាស្រុកផ្សេងទៀតក្នុងខេត្តតាកែវ ជាប់ព្រំដែនប្រទេសវៀតណាម គឺកើតឡើងដោយមេខ្យល់ឈ្មោះ ណុប សំណាង ហៅវណ្ណា ជាមន្ត្រីរដ្ឋបាលជលផល ទទួលបន្ទុកគ្រប់គ្រងសហគមន៍នេសាទ ។ សហគមន៍នេសាទ នៅទូទាំងខេត្តតាកែវ គាត់ជាអ្នកគ្រប់គ្រង ហើយបញ្ចុះបញ្ចូលឲ្យសហគមន៍ លក់ដែននេសាទទៅឲ្យជនជាតិវៀតណាម ។ នៅពេលមានការលើកឡើងអំពីបទល្មើសនេសាទ ពួកមន្ត្រីជលផល អះអាងថា គឺពួកសហគមន៍ជាអ្នកលក់ដែននេសាទទៅឲ្យជនជាតិវៀតណាម ។ ប៉ុន្តែនៅពីក្រោយសហគមន៍នោះ គឺលោកណុប សំណាង ជាអ្នកសម្របសម្រួលខាងសហគមន៍, ខាងជលផល និងអាជ្ញាធរដែនដី ។
បើទោះបីជាពេលនេះ ទឹកទន្លេនៅតាមតំបន់នានាក្នុងស្រុកអង្គរបុរី ក៏ដូចជាស្រុកបុរីជលសា ឬស្រុកកោះអណ្តែត ស្រកស្ទើរតែផុតហើយក៏ដោយ ប៉ុន្តែបទល្មើសនៅតែកើតមានជាហូរហែ ។ កឺបទល្មើសនៃការអនុញ្ញាតឲ្យបណ្តាជនជាតិវៀតណាមចូលមកនេសាទនៅក្នុងទឹកដីខ្មែរ ។ ពួកគេចូលមកនេសាទដោយសេរី តាមរយៈប័ណ្ណពណ៌លឿងមួយ ។ រីឯការដាក់ដាយ អួន សៃយ៉ឺន តាមមាត់ព្រែក តាមទន្លេ នៅតែបន្តជារៀងរាល់ថ្ងៃ ដោយជនជាតិវៀតណាមទាំងនោះអះអាងថា គេបានទិញ ព្រែក ទិញទន្លេពីសហគមន៍ខ្មែររួចហើយ ។ ពលរដ្ឋខ្មែរម្ចាស់ស្រុក មិនត្រូវបានអនុញ្ញាតឲ្យចូលនេសាទនោះទេ គឺពួកមន្ត្រីជលផល និងអាជ្ញាធរដែនដីជាអ្នកចាំបង្ក្រាបប្រជាពលរដ្ឋខ្មែរដើម្បីទុកឱកាសឲ្យអ្នកនេសាទវៀតណាមធ្វើសកម្មភាពតាមអំពើចិត្ត ។
លោកណុប សំណាង ត្រូវបានពួកមន្ត្រីជលផលនៅខេត្តតាកែវអះអាងថា ជាមេខ្យល់ធំក្នុងការសាងបទល្មើសនេសាទជារៀងរាល់ឆ្នាំកន្លងមក ។ គាត់ជាអ្នកទាក់ទង អ្នកនេសាទវៀតណាមដែលរកស៊ីធំៗឲ្យចូលមកនេសាទក្នុងស្រុកខ្មែរ ហើយក៏ជាអ្នកសម្របសម្រួលខាងសហគមន៍ ក៏ដូចជាថ្នាក់ដឹកនាំអាជ្ញាធរតាមបណ្តាស្រុកនិងខេត្ត ជាពិសេសគឺគាត់ជាអ្នកបោះមេឲ្យទៅស្ថាប័នពាក់ព័ន្ធនានា រួមទាំងថ្នាក់ដឹកនាំខេត្ត ។ ដោយសារតែឥទ្ធិពលនៃការសម្របសម្រួល របស់លោក ណុប សំណាងនោះហើយ ទើបថ្នាក់ដឹកនាំខេត្តតាកែវ ដែលទទួលបានលាភសក្ការពីលោកណុប សំណាង មិនដែលក្អកគ្រហែម ឬមានប្រតិកម្មចំពោះបញ្ហាជនជាតិវៀតណាមចូលមកនេសាទក្នុងដីខ្មែរនោះទេ ។ គេមិនដែលឮ លោក អ៊ួច ភា អភិបាលខេត្តតាកែវបញ្ចេញប្រតិកម្មម្តងណាឡើយ ចំពោះករណីបទល្មើសនេសាទបង្កឡើងដោយជនជាតិវៀតណាមនៅក្នុងដីខ្មែរ បើទោះបីជាប្រជាពលរដ្ឋខ្មែរម្ចាស់ស្រុក នៃស្រុកអង្គរបុរី និងស្រុកបុរីជលសា ប្រតិកម្មយ៉ាងណាក៏ដោយ ៕
