សារព័ត៌មាន នគរវត្ត តែងតែនាំមុខគេជានិច្ច
បទល្មើសនេសាទនៅតំបន់បឹងទន្លេសាបក្នុងស្រុកកំពង់ស្វាយ ស្ថិតក្រោមការទទួលខុសត្រូវរបស់លោកសៅ វណ្ណសេរីវុធ នាយសង្កាត់រដ្ឋបាលជលផលកំពង់ស្វាយ ។ រីឯបទល្មើសនៃការកាប់ទន្ទ្រានដីព្រៃលិចទឹក ក៏ស្ថិតក្រោមការទទួលខុសត្រូវ របស់លោក សៅ វណ្ណសេរីវុធ ដែរ ។ ទាំងពីរករណីនេះ អាជ្ញាធរខេត្តកំពង់ធំ ក្រោមការដឹកនាំរបស់លោក សុខ លូ មិនដែលខ្វល់ និងមានចំណាត់ការចំពោះជនពុករលួយខាងលើនេះឡើយ ។ ហេតុនេះបានជាបទល្មើសនៅតែកើតឡើង ទាំងបទល្មើសនេសាទ ក៏ដូចជាបទល្មើសនៃការកាប់បំផ្លាញព្រៃលិចទឹក ។
ប្រភពរាយការណ៍ថា បទល្មើសនេសាទ បានកើតឡើងយ៉ាងគគ្រឹកគគ្រេង ដោយគ្រាន់តែឈ្មួញល្បីឈ្មោះនៅតំបន់បឹងទន្លេសាប បង់ប្រាក់ឲ្យលោក សៅ វណ្ណសេរីវុធ ជាការស្រេច ។ ឈ្មួញធំៗ ដែលធ្វើសកម្មភាព ដោយសេរីនៅតំបន់បឹងទន្លេសាប មានឈ្មោះ រ៉ូ, ហឿន, គន និង អាម៉ង់ ជាដើម ពួកអ្នកនេសាទទាំងនេះ ជាអ្នកបោះលុយឲ្យលោក សៅ វណ្ណសេរីវុធ ទើបអាចប្រព្រឹត្តល្មើសបាន ។ ឧបករណ៍នេសាទល្មើសច្បាប់រាប់ពាន់ម៉ែត្របានធ្វើសកម្មភាពជាចំហរនៅលើផ្ទៃទឹក នៅចំណុចភូមិសានគរ ស្រុកកំពង់ស្វាយ ។ ពួកឈ្មួញទាំងនេះនិយាយជាចំហរថា «ខ្ញុំបង់លុយឲ្យបង វុធ រួចហើយ ទើបអាចនេសាទបានដោយសេរី» ។
រីឯបទល្មើសនៃការកាប់ទន្ទ្រានព្រៃលិចទឹកនៅតំបន់៣ ស្ថិតក្នុងឃុំកំពង់គោ ស្រុកកំពង់ស្វាយ ក៏កំពុងកើតមានយ៉ាងគគ្រឹកគគ្រេងក្រោមដែនសមត្ថកិច្ចរបស់លោក សៅ វណ្ណសេរីវុធ នោះដែរ ។ ប្រភពពីប្រជាពលរដ្ឋដែលស៊ីឈ្នួលកាប់ព្រៃលិចទឹក បានឲ្យដឹងថា សកម្មភាពឈូសឆាយដីព្រៃលិចទឹក នៅតំបន់ព្រះស្នែង ដែលកំពុងប្រព្រឹត្តទៅយ៉ាងគគ្រឹកគគ្រេងសព្វថ្ងៃនេះមានការឃុបឃិតពីមន្ត្រីរដ្ឋបាលជលផលឈ្មោះ សៅ វណ្ណសេរីវុធ ។ ពួកមន្ត្រីជំនាញទាំងនេះត្រូវបានគេអះអាងថា មិនដែលខ្វល់នឹងការចុះបង្ក្រាបបទល្មើសអ្វីទេ គឺគិតតែប្រមូលប្រាក់ពី អ្នកប្រព្រឹត្តល្មើសតែប៉ុណ្ណោះ ។ ពួកមន្ត្រីជលផលទាំងនេះក្លាយទៅជាអ្នកចាំផ្លូវឲ្យអ្នកប្រព្រឹត្តល្មើសទៅវិញ ។
ក្រុមមន្ត្រីនៃមន្ទីរកសិកម្មខេត្តកំពង់ធំបានឲ្យដឹងថា លោក សៅ វណ្ណសេរីវុធ អាងខ្នងលោក ប៉ែន វណ្ណរិទ្ធ នាយខណ្ឌរដ្ឋបាលជលផលកំពង់ធំ គួបផ្សំនឹងភាពព្រងើយកន្តើយរបស់ថ្នាក់ដឹកនាំខេត្តទៀតផងនោះ ទើបធ្វើឲ្យបទល្មើសនេសាទនៅក្នុងបឹងទន្លេសាប ក៏ដូចជាសកម្មភាពនៃការកាប់ទន្ទ្រានដីព្រៃលិចទឹក នៅក្នុងស្រុកកំពង់ស្វាយកើតឡើងយ៉ាងគគ្រឹកគគ្រេង បទល្មើសទាំងនេះ គឺវាស់ស្ទង់សមត្ថភាពដឹកនាំរបស់លោកសុខ លូ អភិបាលខេត្តកំពង់ធំនោះឯង ។ ការព្រងើយកន្តើយសមត្ថភាពខ្សោយៗរបស់លោកអភិបាលខេត្ត ទើបធ្វើឲ្យបទល្មើសកើតឡើងយ៉ាងគគ្រឹកគគ្រេងនិងជាចំហរ ៕
