សារព័ត៌មាន នគរវត្ត តែងតែនាំមុខគេជានិច្ច
អ្នកភូមិកូនថ្មាត ឃុំអញ្ចើម ស្រុកត្បូងឃ្មុំ ខេត្តត្បូងឃ្មុំ កំពុងរស់នៅក្នុងសេចក្តីភ័យខ្លាច ដោយសារក្រុមចោរលួច ចោរឆក់ បាននិងកំពុងកើតឡើង ។ ចោរលួច ចោរឆក់កើតឡើង ដោយសារតែល្បែងស៊ីសងសង្វៀនជល់មាន់មួយកន្លែងត្រូវបានបើកជាចំហរនៅឃុំអញ្ចើម ស្រុកត្បូងឃ្មូំ ។ អាជ្ញាធរមានសមត្ថកិច្ចត្រូវអ្នកភូមិអះអាងថា បានត្រឹមលូកដៃសុំលុយពីថៅកែវង់ល្បែង ឈ្មោះ សាន និងឈ្មោះ ថុន តែប៉ុណ្ណោះ ។ ដូច្នេះការរំពឹងទៅលើអាជ្ញាធរមានសមត្ថកិច្ចថា អាចនឹងបង្ក្រាបវង់ល្បែងស៊ីសងសង្វៀនជល់មាន់ នេះគឺគ្មានប្រយោជន៍ទេ ។
បើតាមសេចក្តីរាយការណ៍បានឲ្យដឹងថា ក្រុមអ្នកញៀនល្បែងជល់មាន់ហ៊ោកញ្ជ្រៀវផ្អើលអ្នកភូមិកូនថ្មាត ដោយបានបើកលេងជារៀងរាល់ថ្ងៃ ។ ផលចំណេញពីសង្វៀនជល់មាន់នេះត្រូវបានលោក ថុន និងលោក សាន ចែករំលែកឲ្យអាជ្ញាធរមូលដ្ឋាន ក៏ដូចជាអាជ្ញាធរមានសមត្ថកិច្ចគ្រប់លំដាប់ថ្នាក់ ។ វប្បធម៌ចែករំលែករបស់ថៅកែសង្វៀននេះទើបធ្វើឲ្យពួកគាត់អាចដំណើរការបានដោយរលូន ។ សមត្ថកិច្ចជិះរថយន្ត ឬម៉ូតូចូលទៅមើលសង្វៀនជល់មាន់នោះគឺដើម្បីបានប្រាក់គ្រាន់គុយទាវកាហ្វេប៉ុណ្ណោះ ។ រីឯមេៗថ្នាក់លើ ទទួលបានលាភសក្ការច្រើនបង្គួរ ។
គេរាយការណ៍ថា សង្វៀនជល់មាន់មួយនេះ មិនមែនថ្នាក់ដឹកនាំខេត្តត្បូងឃ្មុំមិនដឹងនោះទេ ប៉ុន្តែសមត្ថកិច្ចព្យាយាមបិទបាំង និងរាយការណ៍ឲ្យថ្នាក់ដឹកនាំខេត្តថា ជារឿងតូចតាច យូរៗលេងម្តងតែប៉ុណ្ណោះ ។ ប៉ុន្តែការពិតវាជាវង់ល្បែងស៊ីសងដុះស្លែ រាប់ខែ រាប់ឆ្នាំមកហើយ ។ ពួកថៅកែវង់ល្បែងទាំងនោះ មិនញញើតការរិះគន់របស់ប្រជាពលរដ្ឋ នៅក្នុងមូលដ្ឋានឡើយ ក៏ព្រោះតែពួកគេបានបោះលុយឲ្យមេៗថ្នាក់ខេត្តពេញហោប៉ៅអស់ទៅហើយ ។ ប្រជាពលរដ្ឋនៅក្នុងមូលដ្ឋានឃុំអញ្ចើម យល់ឃើញថា ការរំពឹងទៅលើថ្នាក់ដឹកនាំខេត្តឲ្យបង្ក្រាបសង្វៀនជល់មាន់មួយនេះ មិនអាចទៅរួចទេ ទាល់តែថ្នាក់ជាតិ ទើបមានសង្ឃឹមខ្លះ ៕
