សារព័ត៌មាន នគរវត្ត តែងតែនាំមុខគេជានិច្ច
បើទោះបីថ្នាក់ដឹកនាំក្រសួងមហាផ្ទៃ ព្រមានដកហូតតំណែងអភិបាលខេត្តនៅតំបន់ជុំវិញបឹងទន្លេសាប ដែលបណ្ដោយឲ្យបទល្មើសនេសាទកើតឡើងច្រើនជាងគេក៏ដោយ ក៏រហូតមកដល់ពេលនេះលោក សុខ លូ អភិបាលខេត្តកំពង់ធំ ធ្វើមិនដឹងមិនឮអ្វីទាំងអស់។ ជាក់ស្ដែងបច្ចុប្បន្នបទល្មើសនេសាទប្រើឧបករណ៍ខុសច្បាប់នៅក្នុងតំបន់បឹងទន្លេសាប ស្រុកស្រុកស្ទោង ខេត្តកំពង់ធំ កំពុងកើតឡើងយ៉ាងពេញបន្ទុក ហើយលោក សុខ លូ អភិបាលខេត្តកំពង់ធំ និងលោក ប៉ែន វណ្ណរឹទ្ធ នាយខណ្ឌរដ្ឋបាលជលផលខេត្តកំពង់ធំ មិនចាត់វិធានការបង្ក្រាបបទល្មើសឡើយ។ ហេតុនេះហើយទើបមានការសង្ស័យថា លោក សុខ លូ អភិបាលខេត្តកំពង់ធំ ទទួលបានផលប្រយោជន៍ពីបទល្មើសនេសាទមួយផ្នែកណានោះផងដែរ ទើបបណ្ដោយឲ្យបទល្មើសនេសាទប្រើឧបករណ៍ខុសច្បាប់ក្នុងស្រុកកំពង់ស្វាយ ខេត្តកំពង់ធំ រាលដាលកាន់តែខ្លាំងថែមទៀត។
តាមសេចក្ដីរាយការណ៍ពីប្រជានេសាទក្នុងស្រុកស្ទោង បានឲ្យដឹងថា លោក កនចន្ទសីហា នាយផ្នែករដ្ឋបាលជលផលស្ទោង និងបក្ខពួកគឺជាអ្នកឃុបឃិតឲ្យមានបទល្មើសនេសាទប្រើឧបករណ៍ខុសច្បាប់យ៉ាងពេញបន្ទុកដើម្បីជាថ្នូរនឹងផលប្រយោជន៍។ ការដែលលោក កនចន្ទសីហា ហ៊ានធ្វើអ្វីៗស្រេចតែអំពើចិត្តគឺមានការឃុបឃិតបើកដៃពីសំណាក់លោក ធីវ វណ្ណធី ប្រធានមន្ទីរកសិកម្មខេត្តកំពង់ធំ និងលោក ប៉ែន វណ្ណរឹទ្ធ នាយខណ្ឌរដ្ឋបាលជលផលខេត្តកំពង់ធំ ផងដែរទើបអ្វីៗអាចប្រព្រឹត្តទៅដោយរលូន។ អ្វីដែលធ្វើឲ្យប្រជាពលរដ្ឋក្នុងស្រុកស្ទោង រិះគន់នោះគឺលោក សុខ លូ អភិបាលខេត្តកំពង់ធំ បានរក្សាភាពស្ងៀមស្ងាត់ ក្នុងខណៈដែលបទល្មើសនេសាទនៅក្នុងស្រុកស្ទោង នៅតែបន្តកើតឡើងយ៉ាងពេញបន្ទុក។
ប្រភពពីមន្ត្រីនៃមន្ទីរកសិកម្មខេត្តកំពង់ធំ បានលើកឡើងថា បទល្មើសនេសាទប្រើឧបករណ៍ខុសច្បាប់ដែលកំពុងកើតឡើងយ៉ាងគគ្រឹកគគ្រេងនៅតំបន់បឹងទន្លេសាបស្រុកស្ទោងខេត្តកំពង់ធំ គឺជាប្រភពចំណូលរបស់មន្ត្រីរដ្ឋបាលជលផលនិងសមត្ថកិច្ចពាក់ព័ន្ធដទៃទៀត។ បញ្ហានេះគឺជារឿងដែលថ្នាក់ដឹកនាំក្រសួងមាហាផ្ទៃ មិនគួរមើលរំលងតទៅទៀតទេព្រោះបទល្មើសនេសាទប្រើឧបករណ៍ខុសច្បាប់ក្នុងបឹងទន្លេសាប នៃខេត្តកំពង់ធំ កំពុងកើតឡើងយ៉ាងរាលដាល ហើយលោក សុខ លូ អភិបាលខេត្តកំពង់ធំ មិនចាត់វិធានការបង្ក្រាបទាល់តែសោះ ៕
លោកសុខ លូ អភិបាលខេត្តកំពង់ធំ
លោកកង ចន្ទសីហា
