សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នៅព្រឹកថ្ងៃសៅរ៍ ២កើត ខែទុតិយាសាឍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៤ ខែកក្កដា ឆ្នាំ២០១៨ សមាជិក-សមាជិកាគណបក្សប្រជាជនកម្ពុជា រាប់ពាន់នាក់ បានជួបជុំគ្នាយ៉ាងសប្បាយរីករាយ នៅបរិវេណមជ្ឈមណ្ឌលសន្និបាត និងពិព័រណ៍កោះពេជ្រ ដើម្បីចូលរួមក្បួនយុទ្ធនាការធំលើកទី២ ក្នុងរាជធានីភ្នំពេញ។
ក្បួនយុទ្ធនាការឃោសនារកសំឡេងគាំទ្ររបស់គណបក្សប្រជាជនកម្ពុជា មានការចូលរួមយ៉ាងច្រើនកុះករពីសំណាក់បងប្អូនលោកយាយ លោកតា អ៊ុំ ពូ មីង យុវជន យុវនារី ដែលជាអ្នកស្រលាញ់ និងពេញចិត្តសន្តិភាព ដើម្បីចូលរួមប្រមូលអ្នកចង់បានសន្តិភាព និងការអភិវឌ្ឍ ដោយគ្រាន់តែគាំទ្រគណបក្សប្រជាជនកម្ពុជា ដែលមានលេខរៀងទី២០ នៅក្នុងសន្លឹកឆ្នោត នឹងធានាជូនបងប្អូនបាននូវសន្តិភាព និងការអភិវឌ្ឍបន្តទៅមុខរហូតតទៅ។
ក្រោយការជួបជុំ ក្បួនឃោសនាបោះឆ្នោតរបស់គណបក្សប្រជាជនកម្ពុជា នៅរាជធានីភ្នំពេញ ដឹកនាំដោយលោក អ៊ិត សំហេង លោក ប៉ា សុជាតិវង្ស និងលោក ឃួង ស្រេង បានហែក្បួនតាមផ្លូវនានា ក្នុងរាជធានីភ្នំពេញ។ រីឯសាខាគណបក្សប្រជាជនកម្ពុជា តាមខណ្ឌនីមួយៗ ក៏បានហែក្បួនឃោសនាតាមមូលដ្ឋានរបស់ខ្លួន ដោយមានអ្នកចូលរួមរាប់ពាន់នាក់ នាព្រឹកថ្ងៃសៅរ៍ ទី១៤ ខែកក្កដានេះ។
សូមរម្លឹកថា ដំណើរការឃោសនាបោះឆ្នោត បានចាប់ផ្តើមកាលពីថ្ងៃទី០៧ ខែកក្កដា ឆ្នាំ២០១៨ បន្តរហូតដល់ថ្ងៃទី២៧ ខែកក្កដា ឆ្នាំ២០១៨។ គណបក្សនយោបាយទាំង ២០ ដែលបានចុះឈ្មោះចូលរួមប្រកួតប្រជែងការបោះឆ្នោត បានចេញឃោសនាតាមមណ្ឌលរាជធានីខេត្តទូទាំងប្រទេស តាមរយៈការជួបប្រជុំ ចែកខិត្តប័ណ្ណ ចាក់មេក្រូ បញ្ចាំងវិដេអូ និងហែក្បួនឃោសនាតាមផ្លូវ ជាដើម។
ជារួម គ.ជ.ប បានប្រកាសថា បរិយាកាសសន្តិសុខ សុវត្ថិភាព និងសណ្តាប់ធ្នាប់សាធារណៈ នាឱកាសឃោសនាបោះឆ្នោតរបស់គណបក្សនយោបាយ រហូតដល់ថ្ងៃនេះ ត្រូវបានធានា ហើយការឃោសនាបានប្រព្រឹត្តទៅដោយរលូន គ្មានអំពើហិង្សា នៅក្របខណ្ឌទូទាំងប្រទេស។
ជាមួយគ្នានោះ គ.ជ.ប ក៏បានប្រកាសថា ដំណើរការឃោសនាបោះឆ្នោត ចាប់ពីថ្ងៃទី០៧ ដល់ថ្ងៃទី១៣ ខែកក្កដា ឆ្នាំ២០១៨ គឺគណៈកម្មការឃុំសង្កាត់រៀបចំការបោះឆ្នោត បានទទួលបណ្តឹងចំនួន ៦ករណី ដែលក្នុងនោះ ៤ករណី ផ្សះផ្សាសះជា ( ខេត្តកណ្តាល ១ករណី ខេត្តរតនគិរី ៣ករណី ) និង ១ករណី ដើមបណ្តឹងដកពាក្យបណ្តឹងវិញ ( ខេត្តកែប )។ រីឯ ១ករណីទៀត នៅខេត្តព្រៃវែង កំពុងដោះស្រាយតាមនីតិវិធី៕
