សារព័ត៌មាន នគរវត្ត តែងតែនាំមុខគេជានិច្ច
សង្គ្រាមនៅក្នុងប្រទេសអាហ្វហ្គានីស្ថាន និងអ៊ីរ៉ាក់បានធ្វើឲ្យអាមេរិកត្រូវចំណាយប្រាក់និងអាយុជីវិតទាហានជាច្រើន ។ ទាំងនោះហើយបានជាអាមេរិក មិនអាចដកទាហានចេញពីប្រទេសទាំងពីរខាងលើ កន្លងមកអាមេរិកបានប្រកាស បន្តរក្សាទាហាននៅក្នុងប្រទេសអ៊ីរ៉ាក់ ដោយ បញ្ជូនសម្ភារយោធា ទៅកាន់អ៊ីរ៉ាក់ ។
នៅពេលនេះ អាមេរិកក៏បានប្រកាសបន្តរក្សាទាហាន នៅក្នុងប្រទេសអាហ្វហ្គានីស្ថាន ៥ឆ្នាំខាងមុខទៀត។ អាមេរិកបានបញ្ជូនកម្លាំងទាហាន ទៅកាន់ប្រទេស អាហ្វហ្គានីស្ថានក្រោយថ្ងៃទី១១ខែកញ្ញាឆ្នាំ២០០១ ។ តាំងពីពេលនោះមក អាមេរិកបានបើកការវាយប្រហារទៅលើទីតាំងក្រុមភេរវកម្មអាលកៃដានៅក្នុងប្រទេស អាហ្វហ្គានីស្ថាន និងផ្តួលរំលំរបបតាលីបង់។ តាំងពីឆ្នាំ២០០១មកទល់ពេលនេះ មានរយៈជិត២០ឆ្នាំហើយ ដោយអាមេរិកនឹងបន្តរក្សាទាហានបន្ថែម៥ឆ្នាំទៀត។
សារព័ត៌មាន The New York Times នៅថ្ងៃទី១ខែមីនា បានផ្សាយថា អាមេរិកនឹងដកកងទ័ពរបស់ខ្លួន ចេញពីប្រទេសអាហ្វហ្គានីស្ថាន ក្នុងចន្លោះពេលពី ០៣ឆ្នាំ ទៅ ០៥ឆ្នាំខាងមុខ។ ទាំងនោះជាផែនការថ្មី របស់ក្រសួងការពារជាតិអាមេរិក ក៏រួមមាននូវគោលដៅកាត់បន្ថយចំនួនកងទ័ពអាមេរិកប្រមាណ ១៤,០០០នាក់ ដែលកំពុងឈរជើងនៅអាហ្វហ្គានីស្ថាន ចេញពាក់កណ្តាលផងដែរ ក្នុងពេលប៉ុន្មានខែខាងមុខនេះ។
បើតាមផែនការដដែលនេះ កងកម្លាំងអឺរ៉ុប និងអន្តរជាតិប្រមាណ ៨,៦០០នាក់ ដែលមានវត្តមាននៅអាហ្វហ្គានីស្ថាន នឹងផ្តោតទៅលើការហ្វឹកហាត់សមត្ថភាពដល់យោធាអាហ្វហ្គានីស្ថាន ខណៈទ័ពអាមេរិកត្រូវបង្វែរទៅផ្តោតលើ ប្រតិបត្តិការបង្រ្កាបភេរវកម្មវិញ។
ផែនការថ្មីខាងលើរបស់ក្រសួងការពារជាតិអាមេរិក ត្រូវបានគេរាយការណ៍ថា មានគោលដៅជួយដល់កិច្ចខិតខំចរចា រវាងទីក្រុងវ៉ាស៊ីនតោន និងក្រុមឧទ្ទាមតាលីបង់នៅអាហ្វាហ្គានីស្ថាន។
គួរជម្រាបថា បច្ចុប្បន្នកងទ័ពអាមេរិកសរុប ១៤,០០០នាក់ ត្រូវបានដាក់ពង្រាយនៅអាហ្វហ្គានីស្ថាន ហើយមកទល់ពេលនេះតួលេខនៃកងទ័ពអាមេរិកដែលបានបាត់បង់ជិវិតនៅអាហ្វហ្គានីស្ថានបានកើនលើសពី ២,៤០០នាក់ គិតចាប់តាំងតែពីអាមេរិកបានលើកទ័ពចូលប្រទេសអាស៊ីខាងត្បូងនេះ កាលពីឆ្នាំ២០០១៕
