សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ សកម្មភាពចាប់ដើមអំពិលបារាំង ដែលដឹកតាមរថយន្តបាកុង កាលពីវេលាម៉ោង៨យប់ ថ្ងៃទី២២ ខែមេសា ឆ្នាំ២០១៩ នៅចំណុចប៉ុស្តិ៍នគរបាលរដ្ឋបាលរកាត ស្រុកភ្នំក្រវាញ ខេត្តពោធិ៍សាត់ បង្កឲ្យមានការជ្រួលច្របល់ជាខ្លាំងនៅក្នុងចំណោមសមត្ថកិច្ច ជាពិសេសនគរបាល និងរដ្ឋបាលព្រៃឈើ ។ ពីព្រោះថា ការចាប់ដើមអំពិលបារាំងនេះ សមត្ថកិច្ចនគរបាលប៉ងថា ម្ចាស់ដើមអំពិលបារាំង នឹងគិតគូរលុយកាក់ ប៉ុន្តែដោយសារម្ចាស់ដើមអំពិលបារាំង គិតថាមិនខុសច្បាប់ ហើយមិនចំណាយប្រាក់ឲ្យនគរបាលនោះ ធ្វើឲ្យមន្ត្រីនគរបាលខកចិត្ត ហើយប្រុងបញ្ជូនឲ្យទៅជំនាញរដ្ឋបាលព្រៃឈើ ។ ប៉ុន្តែមេព្រៃថា មិនទទួលទេ ។
រឿងរ៉ាវដែលនាំឲ្យវែងឆ្ងាយនេះ ក៏ព្រោះតែមន្ត្រីនគរបាលខ្សោយផ្នែកច្បាប់ចាប់ដើមអំពិលបារាំង គិតថាដើម្បីយកប្រាក់ ប៉ុន្តែម្ចាស់គេយល់ច្បាប់ និងមានលិខិតស្នាមត្រឹមត្រូវពីការទិញ-លក់ដើមឈើក្នុងស្រុក ក៏ដូចជាលិខិតដឹកជញ្ជូនយល់ព្រមដោយអភិបាលខេត្ត ដូច្នេះ អ្នកចាប់ដើមអំពិលបារាំងខកចិត្តជាខ្លាំង ។ ដើមអំពិលបារាំងប្រហែល៥ទៅ៦កំណាត់ នៅលើរថយន្តបាកុង គ្រោងនឹងដឹកចូលមកខេត្តពោធិ៍សាត់ ដើម្បីច្នៃជាគ្រឿងសង្ហារឹមផ្សេងៗ ។ រហូតមកដល់យប់ថ្ងៃទី២៧ ខែមេសា ឆ្នាំ២០១៩ មន្ត្រីនគរបាលស្រុកភ្នំក្រវាញ ថានឹងបញ្ជូនរថយន្តបាកុង ជាមួយនឹងកំណាត់ដើមអំពិលបារាំងនោះឲ្យទៅរដ្ឋបាលព្រៃឈើចាត់ចែងបន្ត ។ ប៉ុន្តែនាយផ្នែករដ្ឋបាលព្រៃឈើភ្នំក្រវាញ អះអាងថា មិនអាចទទួលបានទេ ពីព្រោះគ្មានកំណត់ហេតុត្រឹមត្រូវ និងជាឈើក្នុងស្រុក ដែលច្បាប់មិនហាមឃាត់ ។
លោកតាន់ គារិទ្ធ អធិការនគរបាលស្រុកភ្នំក្រវាញ អះអាងថា ការចាប់រថយន្តបាកុងដឹកកំណាត់ដើមអំពិលបារាំងនេះ គឺអនុវត្តតាមបទបញ្ជាថ្នាក់លើ ហើយឥឡូវយើងសម្រេចប្រគល់ឲ្យមេព្រៃចាត់ការបន្ត ។ លោកបន្តថា ការចាប់នេះ គឺអនុវត្តតាមបទបញ្ជាដោយមិនអនុញ្ញាតឲ្យមានការចរាចរណ៍ឈើនោះឡើយ ។ ប៉ុន្តែមន្ត្រីរដ្ឋបាលព្រៃឈើផ្នែកភ្នំក្រវាញ អះអាងថា ប្រសិនបើនគរបាលមានឯកសារ ឬកំណត់ហេតុ ហើយប្រគល់ឲ្យមេព្រៃភ្លាមៗ នោះគេទទួលយកបាន ផ្ទុយទៅវិញ ចាប់ដើមអំពិលបារាំងតាំងពីថ្ងៃទី២២ ខែមេសា ទើបស្រែកថា ប្រគល់ឲ្យមេព្រៃនៅយប់ថ្ងៃទី២៧ ខែមេសា ដោយគ្មានឯកសារអ្វីទាំងអស់នោះ គឺខាងមេព្រៃមិនអាចទទួលបានឡើយ ។
ការចាប់រថយន្តបាកុងដឹកកំណាត់ដើមអំពិលបារាំងនេះ ញាំងឲ្យមានការរិះគន់ពីមហាជន ក៏ដូចជាម្ចាស់រថយន្តបាកុង និងម្ចាស់ដើមអំពិលបារាំង ។ គេអះអាងថា ការទិញលក់ដើមអំពិលបារាំងនោះ មានការទទួលស្គាល់ពីម្ចាស់ដើមឈើ និងអាជ្ញាធរមូលដ្ឋាន ។ រីឯការដឹកជញ្ជូនចេញពីតំបន់មួយទៅតំបន់មួយ ក៏មានការអនុញ្ញាតពីថ្នាក់ដឹកនាំខេត្តផងដែរ ។ ដូច្នេះការចាប់ដើមអំពិលបារាំងនោះ គឺជាការប៉ុនប៉ងជំរិតទារប្រាក់របស់សមត្ថកិច្ចនគរបាលប៉ុស្តិ៍រកាត ជាមួយនឹងនគរបាលស្រុកភ្នំក្រវាញ ។ ការនេះធ្វើឲ្យខាតផលប្រយោជន៍ ពេលវេលារបស់អាជីវករដែលរកស៊ី ហើយទីបំផុតរឿងនេះនឹងត្រូវអូសបន្លាយពេលតទៅទៀត ។ សង្ឃឹមថា អាជ្ញាធរខេត្តពោធិ៍សាត់នឹងដោះស្រាយរឿងនេះឲ្យជ្រះស្រឡះក្នុងពេលឆាប់ៗ ៕ ប៉ឹម ពិន
