សារព័ត៌មាន នគរវត្ត តែងតែនាំមុខគេជានិច្ច
ខេត្តព្រៃវែង ៖ កម្លាំងអធិការរដ្ឋាននគរបាលស្រុកព្រះស្ដេច បានសហការជាមួយកម្លាំងជំនាញនគរបាល ខេត្តព្រៃវែង ដឹកនាំដោយលោកឧត្តមសេនីយ៍ត្រី ពៅ ជីវី ស្នងការរងទទួលព្រហ្មទណ្ឌខេត្តព្រៃវែង ចុះស្រាវជ្រាវបានឃាត់ខ្លួនជនសង្ស័យម្នាក់ពាក់ព័ន្ធករណីរំលោភសម្លាប់កុមារីអាយុ៥ឆ្នាំ កាលពីថ្ងៃអង្គារ ៣កើត ខែពិសាខ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី១៧ ខែមេសា ឆ្នាំ២០១៨ ។
សមត្ថកិច្ចបានឲ្យដឹងថា ជនសង្ស័យត្រូវបានកម្លាំងនគរបាលឃាត់ខ្លួននៅ ថ្ងៃពុធ ៤កើត ខែពិសាខ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី១៨ ខែមេសា ឆ្នាំ២០១៨ ។
សមត្ថកិច្ចបន្តថាជនសង្ស័យឈ្មោះ ពេជ ពិសី ភេទប្រុស អាយុ២៥ឆ្នាំ នៅភូមិសទ្ធា ឃុំរំចេក ស្រុកព្រះស្ដេច ខេត្តព្រៃវែង។ ចំណែកកុមរីរងគ្រោះ ឈ្មោះ ចាន់ ស្រីដេត អាយុ៥ឆ្នាំ នៅភូមិសទ្ធាឃុំរំចេក ស្រុកព្រះស្តេច ដែលមានឪពុកឈ្មោះ ពុត ចាន់ អាយុ៤៨ឆ្នាំ និងម្តាយឈ្មោះ រស់ ហេន អាយុ៣២ឆ្នាំ នៅភូមិសទ្ធាឃុំរំចេក ស្រុកព្រះស្ដេច។
សូមរំលឹកថាៈកុមារីម្នាក់ទើបតែមានអាយុ៥ឆ្នាំ ត្រូវបានជនល្មោភកាម ចាប់រំលោភរួចសម្លាប់ចោលយ៉ាងអាណោចអាធ័មកាលពីថ្ងៃទី១៧ ខែមេសា ឆ្នាំ២០១៨ វេលាម៉ោង១៤និង៣០នាទី។
សមត្ថកិច្ចបានឲ្យដឹងថាមុនពេលកើតហេតុមានប្រជាពលរដ្ឋ ប្តឹងរាយការណ៍ ថាមានសាកសពក្មេងដេកស្លាប់ នៅចំណុចមាត់ស្រះខាងត្បូង ឈៀងខាងកើតក្នុងវត្តសទ្ធា ភូមិសទ្ធា ឃុំរំចេក ស្រុកព្រះស្ដេច ។ សមត្ថកិច្ចជំនាញបានចុះត្រួតពិនិត្យ ធ្វើកោសល្យវិច័យលើខ្លួនសាកសពឈ្មោះ ចាន់ ស្រីជេត ភេទស្រី អាយុ៥ឆ្នាំ នៅភូមិសទ្ធា ឃុំរំចេក ស្រុកព្រះស្តេច ទើបសន្និដ្ឋានថា ជនរងគ្រោះស្លាប់ដោយការរំលោភសម្លាប់ ។
ជនសង្ស័យឃាត់ខ្លួននៅអធិការដ្ឋាននគរបាលស្រុកព្រះស្ដេច ដើម្បីកសាងសំណុំរឿងចាត់ការតាមច្បាប់ ៕
