សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ជនសង្ស័យម្នាក់ បានធ្វើសកម្មភាពឆក់ទូរស័ព្ទដៃពីនារីជនជាតិបរទេសម្នាក់ បានសម្រេចហើយព្យាយាមជិះម៉ូតូរត់គេចខ្លួន ក៏ត្រូវកម្លាំងព្រហ្មទណ្ឌក្រសួងមហាផ្ទៃ ជិះប្រដេញធ្វើឲ្យជនសង្ស័យភ័យស្លន់ស្លោ ជ្រុលទៅបុករថយន្តមួយគ្រឿង បណ្ដាលឲ្យដួលភ្លាមនោះសមត្ថកិច្ចចាប់ក្របួចជាប់តែម្តង ។
ករណីឃាត់ខ្លួនចោរឆក់ខាងលើនេះ បានធ្វើឡើងកាលពីវេលាម៉ោង៨និង៣០នាទីយប់ថ្ងៃអង្គារ ៤កើត ខែមិគសិរ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១១ ខែធ្នូ ឆ្នាំ២០១៨ ត្រង់ចំណុចផ្សារ៧មករា តាមបណ្ដោយផ្លូវលេខ២៨៧កែងនិងផ្លូវលេខ៦១៤ ស្ថិតក្នុងសង្កាត់បឹងកក់ទី២ ខណ្ឌទួលគោក រាជធានីភ្នំពេញ ។
មន្រ្តីនគរបាលព្រហ្មទណ្ឌក្រសួងមហាផ្ទៃ បានឲ្យដឹងថា ជនសង្ស័យដែលឃាត់ខ្លួននោះ ឈ្មោះ សុវណ្ណ ឧត្តមរង្សី ភេទប្រុស អាយុជាង២០ឆ្នាំ មុខរបរនិងទីកន្លែងស្នាក់នៅមិនពិតប្រាកដ ។ចំណែកនារីរងគ្រោះមិនស្គាល់អត្តសញ្ញាណ គ្រាន់តែដឹងថា ជាជនជាតិបរទេស ។
មន្រ្តីដដែលបានបន្តថា នៅមុនពេលឃាត់ខ្លួនជនសង្ស័យខាងលើនេះ គឺជនសង្ស័យបានធ្វើសកម្មភាពឆក់ទូរស័ព្ទដៃពីនារីជាជនជាតិបរទេសម្នាក់ នៅត្រង់ចំណុចគល់ស្ពានអាកាសផ្សារដីហុយផ្នែកខាងលិច តាមបណ្ដោយផ្លូវសហព័ន្ធរុស្សី ស្ថិតក្នុងសង្កាត់អូបែកក្អម ខណ្ឌសែនសុខ ។ ភ្លាមនោះកម្លាំងសមត្ថកិច្ចក៏បានធ្វើការជិះដេញតាមពីក្រោយជនសង្ស័យ និងទាក់ទងហៅកម្លាំងតាមវិទ្យុទាក់ទងឲ្យជួយធ្វើការអន្តរាគមន៍ស្ទាក់ចាប់ រហូតដល់ចំណុចកើតហេតុ ជនសង្ស័យបានជិះម៉ូតូទៅបុករថយន្តមួយគ្រឿងទៀតត្រូវកម្លាំងសមត្ថកិច្ចចាប់ឃាត់ខ្លួនភ្លាមៗតែម្តង។
តាមប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញជនសង្ស័យម្នាក់បើកបរម៉ូតូមួយគ្រឿងម៉ាកហុងដាស្គូពី ពណ៌ខ្មៅ ធ្វើដំណើរតាមបណ្តោយផ្លូវលេខ៦១៤ ក្នុងទិសដៅពីលិចទៅកើតក្នុងល្បឿនយ៉ាងល្បឿនទាំងសភាពភ័យស្លន់ស្លោ ហើយមានកម្លាំងសមត្ថកិច្ចស្លៀកពាក់ស៊ីវិល និងឯកសណ្ឋានជិះម៉ូតូ៤ទៅ៥គ្រឿងបានជិះដេញតាមពីក្រោយជនសង្ស័យ ។ លុះមកដល់ចំណុចកើតហេតុ ជនសង្ស័យបានជ្រុលចង្កូតទៅបុករថយន្តមួយគ្រឿងម៉ាកហាយឡែនឌ័រ ពណ៌ទឹកប្រាក់ បើកបរតាមបណ្ដោយផ្លូវលេខ២៨៧ ក្នុងទិសដៅពីជើងទៅត្បូង បណ្តាលឲ្យរថយន្តខូចខាតក្រពឹតផ្នែកខាងមុខចំហៀងខាងស្តាំ ចំណែកម៉ូតូជនសង្ស័យខូចខាតបែកចង្កៀងផ្នែកខាងមុខ ដោយឡែកជនសង្ស័យត្រូវបានកម្លាំងសមត្ថកិច្ចដែលជិះដេញតាមពីក្រោយចាប់ឃាត់ខ្លួន ។
ក្រោយពេលកើតហេតុជនសង្ស័យរួមទាំងវត្ថុតាងត្រូវបានកម្លាំងសមត្ថកិច្ចព្រហ្មទណ្ឌក្រសួងមហាផ្ទៃនាំខ្លួនយកទៅសួរនាំដើម្បីកសាងសំណុំរឿង និងចាត់ការតាមច្បាប់ ៕ស តារា
