សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ កាលពីថ្ងៃទី ១៣ ខែកក្កដា ឆ្នាំ ២០២១កន្លងមកនេះកម្លាំងការិយាល័យនគរបាលព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តបាត់ដំបង បានបញ្ជូនជនសង្ស័យចំនួន ២នាក់ទៅកាន់សាលាដំបូងខេត្តដើម្បីអនុវត្តនីតិវិធីក្រោយការស្រាវជ្រាវហើយឃាត់ខ្លួនបានពីបទលួចនិងទទួលផលចោរកម្មនាថ្ងៃទី ១២ ខែកក្កដា។
សមត្ថកិច្ចជំនាញនៃស្នងការដ្ឋាននគរបាលខេត្តបានឲ្យដឹងថាជនសង្ស័យដែលឃាត់ខ្លួនមានឈ្មោះ រុំ ភិរក្ស ភេទប្រុស អាយុ ២៩ឆ្នាំ មានទីលំនៅភូមិ១៣មករា សង្កាត់ព្រែកព្រះស្តេច ក្រុងបាត់ដំបងបានធ្វើសកម្មភាពលួចម៉ូតូចំនួន ១គ្រឿងកាលពីរំលងអធ្រាត្រថ្ងៃទី ០១ ខែមិថុនា ឆ្នាំ២០២១ នៅត្រង់ចំណុចក្រុមទី ១៣ ភូមិតាកុក ឃុំនរា ស្រុកសង្កែ និងទី ២ ឈ្មោះ ឆន សួរ ភេទប្រុស អាយុ ៣៤ឆ្នាំ មានទីលំនៅខេត្តពោធិ៍សាត់ មកស្នាក់នៅបណ្តោះអាសន្នក្នុងសង្កាត់ទួលតាឯក ក្រុងបាត់ដំបង ជាអ្នកទទួលទិញម៉ូតូ(ទទួលផលចោរកម្ម)ពីក្រុមជនសង្ស័យ។
សមត្ថកិច្ចដដែលបានបន្តថា ជនសង្ស័យដែលលួចម៉ូតូបន្ទាប់ពីបានឃាត់ខ្លួនយកមកសួរនាំបានឆ្លេីយសារភាពចំពោះមុខសមត្តកិច្ចជំនាញថា ខ្លួននិងបក្ខពួកម្នាក់ទៀតពិតជាបានធ្វេីសកម្មភាពលួចយកម៉ូតូមួយគ្រឿងរបស់ជនរងគ្រោះប្រាកដមែន។ ចំណែកឯម្នាក់ជាអ្នកទទួលទិញម៉ូតូក៏បានទទួលស្គាល់ថា ខ្លួនពិតជាបានទិញម៉ូតូពីចោរម្នាក់នេះ ក្នុងតម្លៃម៉ូតូ ៣០០ដុល្លារ តែម៉ូតូខាងលើនេះខ្លួនបានលក់បន្តទៅឲ្យអ្នកខេត្តកំពង់ឆ្នាំងបាត់ទៅហេីយ។
ក្រោយមកសមត្ថកិច្ចជំនាញការិយាល័យនគរបាលព្រហ្មទណ្ឌកម្រិតធ្ងន់នៃស្នងការដ្ឋានខេត្តបាត់ដំបង បានសម្រេចរៀបចំកសាងសំណុំរឿងបញ្ជូនជនសង្ស័យទាំង ២នាក់ទៅកាន់អយ្យការអមសាលាដំបូងខេត្តបាត់ដំបងចាត់ការតាមនីតិវិធី៕
ដោយ៖ ស សារ៉េត
