ព័ត៌មានទាន់ហេតុការណ៍៖

តុលាការ​ឃុំ​ខ្លួន​ឧកញ៉ា​និង​គូកន​ ករណី​ជួញដូរ​គ្រឿងញៀន​ជាង​៥៦​គីឡូក្រាម​

ចែករំលែក៖

​ភ្នំពេញ ៖ ឧកញ៉ា​គ្រឿងញៀននិង​ គូកន​ម្នាក់ទៀត​ពាក់ព័ន្ធ​បទល្មើស​​ជួញដូរ​គ្រឿងញៀន​ជាង​៥៦​គីឡូក្រាម នៅ​​ថ្ងៃទី​២៣ ​ខែ​ឧសភា ឆ្នាំ២០១៧ ត្រូវបាន​ចៅក្រម​ស៊ើបសួរ​សាលាដំបូង​រាជធានី​ភ្នំពេញ​ ចេញ​ដីកា​សម្រេច​​ឃុំខ្លួន​ដាក់​ពន្ធនាគារ​បណ្ដោះអាសន្ន​ ក្រោម​ការចោទប្រកាន់​ពី​បទ​រក្សាទុក​ និង​ជួញដូរ​ដោយ​ខុសច្បាប់​នូវ​សារធាតុ​ញៀន។

ជន​ត្រូវ​ចោទ​ម្នាក់​ឈ្មោះ ស៊ី ឡា​ឡយ ហៅខាំ​ឡយ ភេទ​ប្រុស អាយុ​៤២​ឆ្នាំ មាន​ងារ​ជា​ឧកញ៉ា និង​ម្នាក់​ឈ្មោះ លួ​ន សុ​ផា ភេទ​ប្រុស អាយុ​៣០​ឆ្នាំ។

មន្ទីរ​ប្រឆាំង​គ្រឿងញៀន​ក្រសួងមហាផ្ទៃ កាល​​ព្រឹក ​ថ្ងៃទី​២០ ខែ​ឧសភា ​ឆ្នាំ​២០១៧ បាន​ធ្វើ​សន្និសីទ​សារព័ត៌មាន​ស្តីពី​ករណី​បង្ក្រាប​គ្រឿង​ញៀន​ទ្រង់ទ្រាយ​ធំ​មួយ ដែល​បាន​ចាប់ខ្លួន​មេខ្លោង​មាន​ងារ​ជា​ឧកញ៉ា​ម្នាក់ និង​ម្នាក់​ជា​ជនជាតិ​ឡាវ ព្រមទាំង​បង្ហាញ​វត្ថុតាង​ថ្នាំញៀន​ចំនួន​ជាង ​៥៦​គីឡូក្រាមផងដែរ។

​លោក​ឧ​ត្ត​ម​សេនីយ៍​ឯក ម៉ក់ ជី​តូ អគ្គ​ស្នងការ​រង​នគរបាល​ជាតិ​ បាន​ថ្លែងថា ថ្នាំញៀន​ដែល​សមត្ថកិច្ច​ចាប់យក​រួមមាន​ ៣​ប្រភេទ ១-​ហេ​រ៉ូ​អ៊ីន ២-ម៉េ​តំ​ហ្វេ​តា​មីន​ ICE និង​៣-​ម៉េ​តំ​ហ្វេ​តា​មីន​គ្រាប់ WY ។ ក្នុងនោះ​មាន​ថ្នាំញៀន​ប្រភេទ​ហេ​រ៉ូអ៊ី​ន​ចំនួន​១៥​គីឡូក្រាម ថ្នាំញៀន​ប្រភេទ​មេ​តំ​ហ្វេ​តា​មីន​ ចំនួន​១២​គីឡូក្រាម និង​ថ្នាំញៀន​ប្រភេទ​មេ​តំ​ហ្វេ​តា​មីន​គ្រាប់ ​ចំនួន​២៩​គីឡូក្រាម។

ថ្នាំញៀន​ជាង​ ៥៦​គីឡូក្រាម​នេះ ត្រូវ​បាន​ជន​សង្ស័យ​ជា​ឧកញ៉ា​បញ្ជា​ទិញ និង​នាំចូល​មកពី​ប្រទេស​ឡាវ តាម​ខេត្តស្ទឹងត្រែង និង​បាន​យកមក​ស្តុក​ទុក​ក្នុង​រាជធានី​ភ្នំពេញ ដែល​ទីតាំង​មួយកន្លែង​នៅ​ម្តុំ​ផ្សារ​ថ្មី ខណ្ឌដូនពេញ និង​មួយកន្លែង​ទៀត​នៅមុខ​វត្ត​សំរោង​អណ្តែត សង្កាត់​ភ្នំពេញ​ថ្មី ខណ្ឌ​សែន​សុខ។

កិច្ច​ប្រតិ​ប​ត្តិការ​បាន​ធ្វើឡើង​កាលពី​ល្ងាច​ថ្ងៃទី​១៨ រហូត​ម៉ោង​១​យប់​ ឈាន​ចូលដល់​ថ្ងៃទី​១៩ ខែ​ឆ្នាំ​ឧសភា ២០១៧នេះ ក្រោម​ការដឹកនាំ​ផ្ទាល់​ពី​សំណាក់​លោក​ឧ​ត្ត​ម​សេនីយ៍​ឯក ឡឹ​ក វណ្ណៈ នាយក​មន្ទីរ​ប្រឆាំង​គ្រឿងញៀន​ក្រសួង​ង​មហាផ្ទៃ។

យោង​តាម​ប្រភព​ព័ត៌មាន​ពី​ក្រុម​អ្នកបច្ចេកទេស​បាន​បង្ហើប​ឲ្យ​ដឹងថា ថ្នាំញៀន​ដែល​សមត្ថកិច្ច​ចាប់​យក​ជា​វត្ថុតាង​ចំនួន​ជាង​៥៦​គីឡូក្រាម​នេះ បើ​គិត​ជា​ទឹកប្រាក់​តម្លៃ​នៅ​ទីផ្សារ​ងងឹត​ក្នុង​ព្រះរាជាណាចក្រ​កម្ពុជា ​ប្រមាណ​ជាង​២​លាន​ដុល្លារ​អាមេរិក តែបើ​នៅ​ក្រៅ​ប្រទេស​មានតម្លៃ​លើស​នេះ​ទៀត៕ ចេស្តា


ចែករំលែក៖