សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ស្ត្រីមេម៉ាយម្នាក់មកលោតទឹកសម្លាប់ខ្លួនពីលើស្ពានជ្រោយចង្វា ប៉ុន្តែមិនទាន់បានលោតផង ត្រូវបានអ្នកធ្វើដំណើរជួយឃាត់ទាន់ ។ ហេតុការណ៍នេះ បង្កឲ្យមានការភ្ញាក់ផ្អើលឡើង កាលពីម៉ោង៤និង៣០នាទីរសៀលថ្ងៃទី១៣ ខែតុលា នៅលើស្ពានជ្រោយចង្វាថ្មី ស្ថិតក្នុងសង្កាត់-ខណ្ឌជ្រោយចង្វា ។
សមត្ថកិច្ចបានឲ្យដឹងថា ស្រ្តីដែលប៉ងធ្វើអត្តឃាតមានឈ្មោះយឹម អឿន អាយុ៤២ឆ្នាំ ស្នាក់នៅសង្កាត់អូរឫស្សីទី១ ខណ្ឌ៧មករា ក្រុងភ្នំពេញ។
ប្រភពព័ត៌មាននៅកន្លែងកើតហតុបានឲ្យដឹងថា នាម៉ោងជាង៤រសៀល គេឃើញស្ត្រីរូបនេះធ្វើដំណើរតាមម៉ូតូឌុបឡើងស្ពានក្នុងទិសដៅពីខាងលិចទៅខាងកើត ខណៈមកជិតដល់កណ្តាលស្ពាន ស្រាប់តែចុះពីម៉ូតូរួចតោងបង្កាន់ដៃស្ពានបំរ៉ុងលោតចុះទៅក្នុងទន្លេ ភ្លាមនោះក៏មានជនជាតិកូរ៉េ និងអ្នកធ្វើដំណើរឆ្លងកាត់លើស្ពាន ក៏នាំគ្នាជួយឃាត់ទាន់ រួចបញ្ជូនទៅប៉ុស្តិ៍នគរបាលជ្រោយចង្វាដើម្បីសាកសួរ ។ នៅចំពោះមុខមន្ត្រីនគរបាល ស្ត្រីរូបនេះនិយាយទាំងទឹកភ្នែកថា មូលហេតុដែលធ្វើឱ្យគាត់គិតខ្លីដោយសារតែមានជំងឺប្រចាំកាយ ។
គាត់ជាស្ត្រីមេម៉ាយមានកូនចំនួន៣នាក់(ស្រី១ប្រុស២)ហើយរយៈពេលប្រមាណ៤ទៅ៥ខែនេះ គាត់មានជំងឺបេះដូងរីក ទោះបីក្រុមគ្រួសារ និងកូនៗនាំទៅព្យាបាលយ៉ាងណា ក៏មិនធូស្រាលឡើយ ។ ដោយសារតែព្យាបាលអស់ប្រាក់នាំលំបាកដល់កូនៗ ទើបគាត់គិតខ្លីទើបហៅម៉ូតូឌុបជិះមកលោតទឹកសម្លាប់ខ្លួនតែម្តង ។ បន្ទាប់ពីនាំទៅសាកសួរ នគរបាលក៏បានអប់រំ និងទាក់ទងហៅកូនៗឲ្យមកទទួលយកត្រឡប់ទៅផ្ទះវិញ ៕ជ្រោយពេជ្រ
