សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ ទណ្ឌិតដែលធ្លាប់ជាប់ពន្ធនាគារ២០ឆ្នាំ ពីបទរំលោភសេពសន្ថវៈរួចសម្លាប់ជនរងគ្រោះ នឹងត្រូវសាលាដំបូងខេត្តកណ្ដាល កាត់ទោសមួយករណីទៀត នាព្រឹកថ្ងៃទី៣១ ខែឧសភា ខាងមុខនេះ ។
មន្ត្រីតុលាការ ថ្លែងថា សវនាការនេះដឹកនាំដោយកញ្ញា អ៊ី ម៉ាណូកា ជាប្រធានក្រុមប្រឹក្សាជំនុំជម្រះ លោក ផូង វណ្ណ និង លោកស្រី ពេជ ម៉ារ៉ែន ជាសមាជិក ព្រមទាំងលោក សេង រិទ្ធី ជាតំណាងអយ្យការ ។
ជនជាប់ចោទឈ្មោះ នាង ប៊ុនធឿន អាយុ៥៧ឆ្នាំ ជាប់ចោទចំនួនពីរបទល្មើស គឺ រួមភេទជាមួយអនីតិជនអាយុក្រោម១៥ តាមមាត្រា៤២ច្បាប់ស្តីពីការបង្ក្រាបអំពើជួញដូរមនុស្សនិងការធ្វើអាជីវកម្មផ្លូវភេទ និងបទប៉ុនប៉ងរំលោភសេពសន្ថវៈ តាមមាត្រា២៧និង២៣៩នៃក្រមព្រហ្មទណ្ឌ ។
លោក រស់ សាវិន ប្រធានការិយាល័យប្រឆាំងការជួញដូរផ្លូវភេទ និងការពារអនីតិជន ខេត្តកណ្តាល ធ្លាប់បានឲ្យដឹងថា ជនសង្ស័យធ្លាប់ជាប់ពន្ធនាគារត្រពាំងថ្លុងចំនួន២០ឆ្នាំពីបទរំលោភសម្លាប់ និងបានចេញពីគុកក្នុងអំឡុងឆ្នាំ២០០៤ ហើយកាលពីអំឡុងខែធ្នូ ឆ្នាំ២០១៥ ជនសង្ស័យបានប៉ុនប៉ងរំលោភក្មួយស្រីសាច់ថ្លៃម្នាក់អាយុ១៩ឆ្នាំ ។ ប៉ុ ន្តែ ពុំបានសម្រេច រួចក្រោយមកក៏បានរំលោភក្មួយស្រីម្នាក់ទៀតឈ្មោះ អាយុ១០ឆ្នាំ រហូតបានសម្រេច៣លើក ៕ ចេស្តា
