ព័ត៌មានទាន់ហេតុការណ៍៖

ទិន្នផលកសិកម្មកូរ៉េខាងជើងធ្លាក់ចុះ ធ្វើឲ្យពលរដ្ឋប្រឈមកង្វះស្បៀងអាហារ

ចែករំលែក៖

ទិន្នផលកសិកម្មកូរ៉េខាងជើង បានធ្លាក់ចុះនៅក្នុងឆ្នាំ នៅក្នុងឆ្នាំនេះ ធ្វើឲ្យពលរដ្ឋប្រឈមនឹងកង្វះស្បៀងអាហារ​យ៉ាងខ្លាំង ។ ជាមួយគ្នានេះ ក្តីសង្ឃឹមពីការរួចផុតទណ្ឌកម្ម របស់អាមេរិក នៅក្នុងជំនួបពិភាក្សា នៅប្រទេសវៀតណាម​ ប៉ុន្តែមិនទទួលបានជោគជ័យ​ ឡើយ ។ នៅពេលនេះ អាមេរិកបានប្រកាសថានឹងបង្កើនការដាក់ទណ្ឌកម្មទៅលើកូរ៉េខាងជើងបន្ថែមទៀត ប្រសិនបើប្រទេសនេះបន្ត កម្មវិធីមីស៊ីល និងបរមាណូ ។

តាមរបាយការណ៍របស់អង្គការសហប្រជាជាតិ ពលរដ្ឋ​កូរ៉េខាងជើង ជាង​១១ពាន់នាក់ប្រឈមកង្វះស្បៀងអាហារ ក្រោយផលិតផលកសិកម្មធ្លាក់ចុះ ។ កុមារៗនៅក្នុងចំណោមនោះ គ្មានការរីកលូតលាស់ធំធាតុ តាមធម្មជាតិនោះឡើយ ក៏ព្រោះតែកង្វះអាហារូបត្ថម្ភនេះផងដែរ ។

របាយការណ៍អង្គការសហប្រជាជាតិ ចេញផ្សាយកាលពីថ្ងៃទី៦ ខែមីនា ឆ្នាំ២០១៩ បញ្ជាក់ថា តាមការប៉ាន់ប្រមាណ ពលរដ្ឋប្រហែល ១១ លាននាក់នៅកូរ៉េខាងជើង ស្មើប្រហែល៤៣ភាគរយ នៃពលរដ្ឋសរុបក្នុងប្រទេសនេះ ស្ថិតក្នុងកង្វះអាហារូបត្ថម្ភ របបអាហារហូបចុកមិនគ្រប់គ្រាន់រៀងរាល់ថ្ងៃ ។

ប្រធានអង្គការ UN ប្រចាំនៅកូរ៉េខាងជើង លោក Tapan Mishra បញ្ជាក់ថា កង្វះអាហារូបត្ថម្ភនេះ គំរាមកំហែងយ៉ាងខ្លាំងដល់ការលូតលាស់របស់កុមារ តាមធម្មជាតិរបស់វា ។ ជាក់ស្តែងកុមារម្នាក់ ក្នុងចំណោម៥នាក់ បានក្រឹន មិនធំធាតុនោះឡើយ ដោយសារតែកង្វះអាហារូបត្ថម្ភដ៏រីករាលដាលនេះ ។

លោក Mishra បញ្ជាក់ថា កាលពីឆ្នាំមុន UN បានអំពាវនាវរកជំនួយមនុស្សធម៌ ១១១ លានដុល្លារ សម្រាប់ជួយដល់មនុស្ស ៦ លាននាក់នៅកូរ៉េខាងជើង ដែលត្រូវការជំនួយបំផុត ប៉ុន្តែបានលទ្ធផលត្រឹម១៤ភាគរយប៉ុណ្ណោះ នៃគម្រោងថវិកាសរុប ។ នេះជាការផ្តល់ជំនួយដ៏ទាបបំផុត នៅក្នុងពិភពលោក ។

លោក Stephane Dujarric អ្នកនាំពាក្យ UN ថ្លែងកាលពីថ្ងៃទី៦ ខែមីនាថា អង្គការសហប្រជាជាតិ ក្រុមមនុស្សធម៌នៅក្នុងប្រទេសកូរ៉េខាងជើង អំពាវនាវរកជំនួយ ប្រហែល ១២០ លានដុល្លារ ដើម្បីសង្គ្រោះអាយុជីវិតជាបន្ទាន់ដល់មនុស្សប្រហែល៣.៨លាននាក់ ។

កាលពីខែមុន រដ្ឋាភិបាលកូរ៉េខាងជើង បានស្នើឲ្យអង្គការមនុស្សធម៌អន្តរជាតិ ជួយចំពោះបញ្ហាកង្វះខាតអាហារូបត្ថម្ភនេះផងដែរ ។ មានការរំពឹងថា នៅក្នុងឆ្នាំ២០១៩នេះ ការផ្តល់ជំនួយមនុស្សធម៌ ធ្វើយ៉ាងម៉េចឲ្យបានប្រហែល១,៤លានតោន ទើបគ្រប់គ្រាន់ ។ ជំនួយទាំងនោះ មានដូចជាអង្ករ, ស្រូវសាលី, ដំឡូង និងសណ្តែកសៀងផងដែរ ។

ជាមួយគ្នានេះដែរ ទីប្រឹក្សាសន្តិសុខជាតិ​​របស់លោក ដូណាល់ ត្រាំ គឺ លោក ចន បូលតុន (John Bolton) បានឲ្យដឹងថា សហរដ្ឋអាមេរិក​​នឹង​គិតគូរដាក់ទណ្ឌកម្ម​ថែមទៀតលើប្រទេស​កូរ៉េខាងជើង ប្រសិនទីក្រុងព្យុងយ៉ាង​មិនព្រមបោះបង់ ​កម្មវិធីអាវុធនុយក្លេអ៊ែរ​​របស់​ខ្លួន​ចោល​ទេ​នោះ។

ឆ្លើយតបជាមួយបណ្តាញ​សារព័ត៌មាន​អាមេរិក Fox Business Network លោក Bolton បានបញ្ជាក់យ៉ាងដូច្នេះថា «ទីក្រុងវ៉ាស៊ីនតោននឹង​ពិនិត្យមើលថា តើ ទីក្រុង​ព្យុងយ៉ាង​គោរព​តាមការសន្យា​​​របស់ខ្លួន អំពីការបោះបង់​ចោលកម្មវិធីអាវុធ​នុយក្លេអ៊ែរ ព្រមទាំងអ្វីៗ​ផ្សេងទៀត ដែល​ពាក់ព័ន្ធជាមួយ​​វា​ដែរ ឬយ៉ាងណា…»។

លោក Bolton បានបន្តថា «ប្រសិនបើពួកគេមិន​ព្រមធ្វើតាមពាក្យសន្យារបស់​ខ្លួនទេនោះ ​ខ្ញុំគិតថា​លោកប្រធានាធិបតី ដូណាល់ ត្រាំ បានបញ្ជាក់​ច្បាស់ៗរួច​ហើយថា ពួកគេ​នឹង​មិនទទួលបានការបន្ធូរបន្ថយ​ទ​ណ្ឌកម្មសេដ្ឋកិច្ច​ដ៏ធ្ងន់ធ្ងរ​ ដែលបានដាក់​​ទៅ​លើ​ពួក​គេឡើយ ខណៈបើតាម​ពិត​ទៅនោះពួកយើងនឹង​ពិចារណាដាក់ទណ្ឌកម្ម​ឲ្យខ្លាំងថែម​ទៀត»។ ​

ក្នុងថ្ងៃជា​មួយគ្នានេះ ក៏មានសេចក្តី​រាយការណ៍​ផងដែរថា កូរ៉េខាងជើង​បាន​សាងសង់​ផ្នែកមួយចំនួន​ឡើងវិញ នៃទីតាំង​បាញ់​​គ្រាប់​មីស៊ីល ដែលខ្លួនបានចាប់​ផ្តើមរុះរើចោល ក្រោយពីខ្លួនធ្លាប់បានសន្យា​ថា មិនធ្វើដូច្នោះ​ក្នុងអំឡុង​ជំនួបកំពូលលើកទីមួយ ជាមួយ​​ប្រធានាធិបតីអាមេរិក លោក ដូណាល់ ត្រាំ កាលពីពាក់កណ្តាលឆ្នាំមុន។ ការសាងសង់​នេះ​ត្រូវគេ​អះអាងថា ទំនង​ជាធ្វើឡើង​កាលពី​ចន្លោះថ្ងៃទី១៦ ខែកុម្ភៈ និងថ្ងៃទី០២ ខែមីនា រីឯទីតាំងបាញ់​មីស៊ីលនោះ មាន​ឈ្មោះថា តុងឆាងរី (Tongchang-ri)។

គួរជម្រាបថា ការធ្វើអត្ថាធិប្បាយ​របស់លោក Bolton បានកើតមាន​បន្ទាប់ពី​កិច្ចប្រជុំកំពូលកាលពី​ថ្ងៃទី២៧-២៨ ខែកុម្ភៈ​​​រវាង​​លោក ត្រាំ និង​លោក គីម នៅ​វៀតណាម បានបញ្ចប់ទៅ​ដោយបាតដៃទទេ ដោយសារភាព​មិនចុះសម្រុងគ្នា​ជុំវិញឆន្ទៈរបស់​កូរ៉េខាងជើង​ក្នុងការបោះបង់​ចោលកម្មវិធីនុយក្លេអ៊ែរ​របស់ខ្លួន និងឆន្ទៈរបស់​អាមេរិកក្នុងការបន្ធូរបន្ថយ​ទណ្ឌកម្ម ៕


ចែករំលែក៖