ព័ត៌មានទាន់ហេតុការណ៍៖

ទូកក្បូនដឹកឈើគ្រឿងផ្ទះមានលិខិតអនុញ្ញាត តែគ្មានប្រសិទ្ធភាព ត្រូវសមត្ថកិច្ចចាប់ដដែល

ចែករំលែក៖

ខេត្តស្ទឹងត្រែងៈ ទូកក្បូនដឹកឈើគ្រឿងផ្ទះមួយគ្រឿង ត្រូវបានជំនាញរដ្ឋបាលព្រៃឈើខេត្ត សហការជាមួយនគបាលប្រឆាំងបទល្មើសសេដ្ឋកិច្ចខេត្ត បង្ក្រាប ខណៈក្រុមឈ្មួញកំពុងដឹកចេញពីចំណុចភូមិញ៉ើញចុះ ឆ្លងកាត់ក្រោមស្ពានសេកុង ឆ្ពោះទៅកាន់ស្រុកសំបូរ ខេត្តក្រចេះ។

ករណីចាប់ទូកដឹកឈើខាងលើនេះ បានធ្វើឡើងកាលពីវេលាម៉ោង១១និង៤៨នាទីយប់ ថ្ងៃទី២០ ខែសីហា ឆ្នាំ២០១៨ ត្រង់ចំណុចគល់ស្ពានសេកុងត្រើយម្ខាង សង្កាត់សាមគ្គី ក្រុងស្ទឹងត្រែង ខេត្តស្ទឹងត្រែង។

ពាក់ព័ន្ធនឹងការដឹកជញ្ជូនឈើគ្រឿងផ្ទះខាងលើនេះផងដែរ ម្ចាស់ឈើបានឲ្យដឹងថា មុន និងពួកគាត់ហ៊ានដឹកឈើនេះ ពួកគាត់បានរត់ច្បាប់នៅខេត្តក្រចេះ ដោយមានស៊ីញ៉េបោះត្រាចេញពីភូមិ ឃុំ រួចហើយ។ ប៉ុន្តែពេលដឹកចេញពីខេត្តស្ទឹងត្រែង គឺគាត់ពុំស្គាល់អ្នកណាឡើយដោយសំអាងថា ខ្លួនមានក្រដាស់ស្នាមត្រឹមត្រូវ។

ម្ចាស់ឈើបន្តថា ឈើរបស់ពួកគាត់ បានទិញស្តុកនៅភូមិញ៉ឺននោះ មានចំនួន១៥ម៉ែត្រគូប។ ប៉ុន្តែឈើ ដែលពួកគាត់បានដឹកមកនេះ គឺមានមិនដល់១០ម៉ែត្រគូបទេ គឺមានប្រហែលជា៨ ម៉ែត្រគូបប៉ុណ្ណោះ។ ដោយពួកគាត់លើកឡើងថា ឈើដែលគាត់ផ្ញើគេទុកនោះ ត្រូវបានចោរលួចអស់មួយចំនួនទៅហើយ។

បច្ចុប្បន្ននៅល្ងាចនេះ ជំនាញរដ្ឋបាលព្រៃឈើខេត្ត កំពុងសាងពីទូកដាក់រថយន្តកែឆ្នៃដឹកជញ្ជូនយកមក រក្សាទុកនៅរដ្ឋបាលព្រៃឈើ នៅគល់ស្ពានសេកុង តែនៅពុំទាន់ដឹងពីចំនួន និងម៉ែត្រគូបនៅឡើយទេ ចំណែកទូក និងម៉ាស៊ីននោះយកទៅរក្សាទុកក្នុងខណ្ឌរដ្ឋបាលព្រៃឈើខេត្ត ៕ មាស សុផាត


ចែករំលែក៖