សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ប្តីប្រពន្ធមួយគូបន្ទាប់ពីចាប់ដៃនឹងគ្នារៀបការបានគ្នាតែមិនទាន់បាន១ឆ្នាំផងដោយសាររស់នៅជាមួយគ្នាមិនចុះសម្រុងនឹងគ្នារករឿងឈ្លោះប្រកែកគ្នាមិនចេះចប់ ទើបសាច់ញាតិបងប្អូនខាងស្រីនាំនាងជាប្រពន្ធគេចឲ្យផុតពីមុខប្តីមួយរយៈបែរជាប្តីប្រទះឃើញបង្កជាហឹង្សាវាយគ្នាផ្អើលដល់សមត្ថកិច្ចចុះឃាត់ខ្លួនកាលពីវេលាម៉ោង៧យប់ ថ្ងៃសៅរ៍ ៣កើត ខែផល្គុន ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី១៧ ខែកុម្ភៈ ឆ្នាំ២០១៨ នៅភូមិព្រៃសាលា សង្កាត់កាកាប២ ខណ្ឌពោធិសែនជ័យ ។
សមត្ថកិច្ចបានអោយដឹងថា ភាគីជាប្តីដែលតែងតែរករឿងប្រពន្ធឈ្មោះ ជ័យ ចាន់ ភេទប្រុស អាយុ៣៨ឆ្នាំ មុខរបរកម្មករសំណង់ ស្នាក់នៅបន្ទប់ជួលជាន់ទី២ នៅភូមិព្រៃសាលា សង្កាត់កាកាប២ ខណ្ឌពោធិសែនជ័យ ។
ចំណែកភាគីខាងប្អូនថ្លៃទី១ឈ្មោះ ស៊ឹម សឿន ភេទប្រុស អាយុ៣៧ឆ្នាំ មុខរបរកម្មករសំណង់, ទី២-ឈ្មោះ ជុំ សារ៉ាត់ ភេទប្រុស អាយុ៤៧ឆ្នាំ មុខរបរកម្មករសំណង់, ទី៣-ឈ្មោះ ស៊ឹម សន ភេទប្រុស អាយុ២៧ឆ្នាំ និងទី៤-ឈ្មោះ ស៊ឹម សិន ភេទស្រី អាយុ៣៨ឆ្នាំ ទាំង៤នាក់ស្នាក់នៅបន្ទប់ជួលជាន់ទី៣ ក្នុងភូមិព្រៃសាលា សង្កាត់កាកាប២ ខណ្ឌពោធិសែនជ័យ ។
តាមប្រភពព័ត៌មានពីប្អូនថ្លៃបានឲ្យដឹងថា ដោយសារមើលឃើញទង្វើបងថ្លៃចេះតែរករឿងប្រពន្ធស្ទើររៀងរាល់ថ្ងៃទើបទ្រាំលែងបានក៏យកបងស្រីទៅលាក់ទុកនៅកន្លែងផ្សេង ដើម្បីកុំឲ្យប្តីចេះតែរករឿងពេកស្រាប់តែមកដល់យប់ថ្ងៃទី១៧ ខែកុម្ភៈ រឿងរ៉ាវសម្តីមិនចេះចប់មិនចេះហើយទើបឈានដល់ផ្ទុះហិង្សាដាក់គ្នាវាយទៅមកគ្មានអ្នកចាញ់ ហើយក៏គ្មានអ្នកឈ្នះមានតែអ្នករងរបួសគឺទាំង៥នាក់តែម្តង ។
ករណីខាងលើ ខណៈដែលបន្តបណ្តែតបណ្តោយថ្វីត្បិតតែសាច់ញាតិបងប្អូននឹងគ្នាមែនតែហិង្សា ដែកទីបជ្រុងវាយសំពងទៅមក ទើបកម្លាំងនគរបាលប៉ុស្តិ៍កាកាប២ចុះទៅឃាត់មនុស្សទាំង៥នាក់មកសាកសួរនៅប៉ុស្តិ៍៕ សុខាសែនជ័យ
