នាយករដ្ឋមន្ត្រីថៃរក្សាការឡោមព័ទ្ធចាប់ព្រះចៅអធិការវត្តជាប់សង្ស័យលាងលុយខ្មៅ

នាយករដ្ឋមន្ត្រីថៃលោក ប្រាយុទ្ធ ចាន់ អូចា បានបញ្ជាក់ថា បើទោះបីមានហេតុ ការណ៍បាតុករម្នាក់បានធ្វើអត្តឃាតនៅ មុខវត្តរារាំងការចូលចាប់ខ្លួនព្រះចៅអធិការ Dhammachayo ពីសំណាក់ក្រុមប៉ូលិស ទាហាន តែការស្វែងរកចាប់ខ្លួនគឺជាការចាំបាច់ ដូច្នេះកម្លាំងទាហាននៅតែបន្តសកម្មភាពដដែល។

កាលពីថ្ងៃទី២៧ ខែកុម្ភៈ ប្រព័ន្ធឃោសនារបស់ថៃបានដកស្រង់សម្តីនាយករដ្ឋ មន្ត្រី ប្រាយុទ្ធ ចានអូចា បញ្ជាក់ថា ការអនុ វត្តមាត្រាទី៤៤នៃរដ្ឋធម្មនុញ្ញក្នុងការឡោមព័ទ្ធវត្ត Dhammakaya ជារឿងចាំបាច់ត្រូវ តែធ្វើ។

បណ្តាញព័ត៌មានថៃបានដកស្រង់ព័ត៌មានពីក្រុមស្រាវជ្រាវថៃ DSI បានបញ្ជាក់ ថា ក្រុមជ្រុលនិយមប្រមាណ៣០នាក់បានលាយឡំជាមួយក្រុមសាសនិកដើម្បីបំផុស បំផុលបង្កអំពើហិង្សាប្រឆាំងនឹងការឡោមព័ទ្ធវត្តខាងលើ។

អនុប្រធាន DSI លោក Songsak Raksaksakul បានឲ្យដឹងថា ក្រុមជនជ្រុលនិយមទាំងនោះធ្លាប់ចូលរួមនៅក្នុងការធ្វើបាតុកម្មប្រឆាំងរដ្ឋាភិបាលក្នុងទីក្រុងបាងកកនាពេលកន្លងមក។ នៅពេលនេះក្រុមអ្នកស្រាវជ្រាវបានស្វែងរកភស្តុតាងដើម្បីចាប់ខ្លួនអ្នកទាំងនោះ។

បើទោះបីជារដ្ឋាភិបាលមិនបានប្រកាសថា ជាក្រុមណាប៉ុន្តែសកម្មភាពខាងលើ បានបង្ហាញយ៉ាងច្បាស់ថា គឺក្រុមអាវក្រហម ដែលគាំទ្រអតីតនាយករដ្ឋមន្ត្រីលោក ថាក់ស៊ីន និងលោកស្រី យីងឡាក់ស៊ី ណា វ៉ាត្រា។

នៅក្នុងព្រឹត្តិការណ៍មួយផ្សេងទៀត ដែលពាក់ព័ន្ធនោះដែរ កាលពីយប់ថ្ងៃទី ២៦ ខែកុម្ភៈ ទាហានដែលយាមនៅជុំវិញ វត្តបានឃាត់ខ្លួនអតីតមន្ត្រីប៉ូលិសឈ្មោះ Rungroj Bhaekanant ធ្លាប់កាន់តំណែងជាស្នងការប៉ូលិសខេត្តអយុធ្យានៅពេល ដែលលោកបានធ្វើដំណើរនៅក្បែរវត្តគួរ ឲ្យសង្ស័យ។ នៅពេលត្រួតពិនិត្យរថយន្តគេរកឃើញមានអាវការពារគ្រាប់២ និង មានស្លាកបដាបង្ហាញពីការសោកស្តាយ ចំពោះបាតុករម្នាក់ធ្វើអត្តឃាតកាលពីថ្ងៃទី២៥ ខែកុម្ភៈ៕ ម៉ែវ សាធី