សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នៅព្រឹកថ្ងៃទី១២ ខែមីនា ឆ្នាំ២០១៩ នេះ នគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញ បញ្ជូនអ្នកឧកញ៉ា គិត ធាង ម្ចាស់មជ្ឈមណ្ឌលកម្សាន្តរ៉ុក មកតុលាការ ដេីម្បីសាកសួរករណីគ្រឿងញៀនដ៏ច្រើនសម្បើម ។ ពេលនេះ តុលាការកំពុងសាកសួរអ្នកឧកញ៉ា គិត ធាង ។
សូមបញ្ជាក់ថា អ្នកឧកញ៉ា គិត ធាង ត្រូវបានសមត្ថកិច្ចចាប់ខ្លួនកាលពីព្រលប់ថ្ងៃទី១១ ខែមីនា ឆ្នាំ២០១៩ តាមដីការបស់តុលាការ បន្ទាប់ពីមានប្រតិកម្មយ៉ាងខ្លាំងក្លាពីសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ។
មជ្ឈមណ្ឌលកម្សាន្តរ៉ុក ត្រូវបានសមត្ថកិច្ចចម្រុះបង្ក្រាបទ្រង់ទ្រាយធំ កាលពីយប់រំលងអាធ្រាត្រឈានចូលថ្ងៃទី២៣ ខែកុម្ភៈ ឆ្នាំ២០១៩ ដោយឃាត់ខ្លួនជនសង្ស័យជាង៣០០នាក់ និង គ្រឿងញៀនជិត៥០គីឡូក្រាម ។
មាត្រា៤៤ កថាខណ្ឌទី២ ច្បាប់ស្តីពីការត្រួតពិនិត្យគ្រឿងញៀនឆ្នាំ២០១២ ចែងថា”អំពើជួលទីកន្លែង ផ្តល់ទីកន្លែង ឬ អំពើផ្សេងទៀតដែលបង្កលក្ខណៈងាយស្រួលដល់ការប្រេីប្រាស់ដោយខុសច្បាប់នូវសារធាតុញៀន គឺ ជាបទសម្រួលឱ្យប្រេីប្រាស់ដោយខុសច្បាប់នូវសារធាតុញៀន ត្រូវផ្តន្ទាទោស៥ឆ្នាំទៅ១០ឆ្នាំ និង ពិន័យជាប្រាក់ពី១០លានរៀលទៅ២០លានរៀល ៕ ចេស្តា
