សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ បទល្មើសនេសាទដែលប្រើប្រាស់ឧបករណ៍ខុសច្បាប់បាននិងកំពុងដំណើរការជាចំហរជារឿងរាល់ថ្ងៃនៅបឹងទន្លេសាប ក្នុងភូមិសាស្ត្រខេត្តពោធិ៍សាត់ ។ មន្ត្រីជំនាញ ត្រូវគេរាយការណ៍ថា ជាអ្នកដែលចាំទទួលផលប្រយោជន៍ពីក្រុមអ្នកនេសាទល្មើសច្បាប់ទាំងនោះ ។ ថ្នាក់ដឹកនាំខេត្តក៏បានជំរុញឲ្យមានការបង្ក្រាបបទល្មើសនេសាទនេះដែរ ប៉ុន្តែមើលទៅហាក់ដូចជាមិនមានប្រសិទ្ធភាពអ្វីឡើយ ។
ប្រភពព័ត៌មានបានឲ្យដឹងថា មន្ទីរកសិកម្មខេត្តពោធិ៍សាត់បានបែងចែកកម្លាំងឲ្យចាំបង្ក្រាបបទល្មើសនេសាទនៅតំបន់បឹងទន្លេសាបក្នុងភូមិសាស្ត្រស្រុកក្រគរ ស្រុកកណ្តៀង…នោះដែរ ប៉ុន្តែវាហាក់ដូចជាគ្រាន់តែនាំគ្នាទៅយកលុយពីឈ្មួញធ្វើសកម្មភាពខុសច្បាប់នោះទៅវិញ ។ សកម្មភាពនៃការអូសអួនកែច្នៃចម្ងាយរាប់រយម៉ែត្រ ក្នុងល្បឿនដូចបើករថយន្តលើគោកនោះកំពុងបំផ្លាញធនធានធម្មជាតិនៅក្នុងបឹងទន្លេសាបយ៉ាងខ្លាំងក្លា ។ មិនថារដូវបិទ ឬបើកនេសាទនោះឡើយ បទល្មើសកើតឡើងជាចំហរ ហើយពួកមន្ត្រីជលផលត្រូវគេរាយការណ៍ថា សប្បាយរីករាយនឹងទទួលបានលាភសក្ការពីពួកអ្នកនេសាទល្មើសច្បាប់ទាំងនោះ ។
មន្ត្រីសំខាន់ៗ ដូចជាលោកស្វាយ សំអាត នាយផ្នែករដ្ឋបាលជលផលក្រគរស្តីទី, លោក លឹម សុក្រិត នាយសង្កាត់រដ្ឋបាលជលផលកណ្តៀង និងលោកឆាយ មន នាយរងខណ្ឌរដ្ឋបាលជលផលពោធិ៍សាត់… បណ្តាឥស្សរជនទាំង៣រូបនេះត្រូវគេអះអាងថាបានពាក់ព័ន្ធនឹងផលប្រយោជន៍ក្នុងបទល្មើសនេសាទនៅបឹងទន្លេសាបយ៉ាងជ្រៅ ។
លោក ស្វាយ សំអាត មិនលើកទូរស័ព្ទអ្នកកាសែតនោះទេ កាលពីព្រឹកមិញ ។ លោកឆាយ មន អះអាងថា ឆ្លើយមិនបានទេរឿងបទល្មើសនេសាទនៅបឹងទន្លេសាបនោះ ។
លោកលឹម សុក្រិត ដែលទើបត្រូវបានតែងតាំងជានាយសង្កាត់រដ្ឋបាលជលផលកណ្តៀងថ្លែងថា បទល្មើសទាំងអស់ ទាល់តែសួរមេៗថ្នាក់លើ ។ ការឆ្លើយរបស់លោកលឹម សុក្រិតទទួលស្គាល់ថា បទល្មើសនៅក្នុងដែនសមត្ថកិច្ចរបស់ខ្លួន ពិតជាកើតមានមែន ហើយខ្លួនក៏ទទួលបានប្រយោជន៍ពីបទល្មើសនោះដែរ ។ ប៉ុន្តែខ្លួនទើបតែមកកាន់កាប់តំណែងថ្មី ដូច្នេះ មេថ្នាក់លើជាអ្នកដែលទទួលបានផលប្រយោជន៍មុន ។ តាមយោបល់របស់លោកលឹម សុក្រិត ថ្នាក់លើរបស់ខ្លួនពុករលួយច្រើនក្នុងរឿងបទល្មើសនេសាទនេះ ដូច្នេះអ្នកកាសែតគួរតែសួរទៅថ្នាក់លើទៅប្រសើរជាង ។
បទល្មើសនេសាទនៅក្នុងបឹងទន្លេសាបមិនថា នៅក្នុងតំបន់អភិរក្ស ឬអតីតឡូត៍នេសាទនោះទេ សព្វថ្ងៃនេះសកម្មភាពនៃការអូសអួនហ៊ុំកំពុងកើតមានយ៉ាងសកម្មទាំងថ្ងៃទាំងយប់ ។ គេរាយការណ៍ថា អួនហ៊ុំប្រវែងរាប់រយ រាប់ពាន់ម៉ែត្រធ្វើសកម្មភាពប្រមូលយកផលនេសាទរាប់តោនក្នុងមួយម៉ោងៗ ដែលសកម្មភាពនេះ ត្រូវគេមើលឃើញថា បង្កមហន្តរាយយ៉ាងធ្ងន់ ដល់មច្ឆជាតិ និងធនធានធម្មជាតិនៅក្នុងបឹងទន្លេសាប ។
អាជ្ញាធរខេត្តពោធិ៍សាត់ហាក់ដូចជាផ្តេកផ្តួលរឿងបទល្មើសនេសាទនេះ ។ អគ្គនាយកដ្ឋានរដ្ឋបាលជលផលមិនខ្វល់អំពីបញ្ហានៃការរលាយហិនហោចធនធានធម្មជាតិនៅបឹងទន្លេសាបនោះឡើយ ។ មេជលផលមិនដែលបានបង្ហាញស្នាដៃអ្វីជាដុំកំភួនក្នុងការបង្ក្រាបបទល្មើសនេសាទម្តងណាឡើយ មិនថាតែ នៅបឹងទន្លេសាប ឬសមុទ្រនោះទេ ។ យ៉ាងណាក៏ដោយគេរំពឹងថា ក្រសួងមហាផ្ទៃមិនបណ្តោយឲ្យមានបទល្មើសនេសាទជាលក្ខណៈបើកចំហរកើតមានបន្តទៀតនៅក្នុងភូមិសាស្ត្រខេត្តពោធិ៍សាត់នោះទេ ។ មិនតែប៉ុណ្ណោះ ក្រសួងមហាផ្ទៃគួរចាត់វិធានការចំពោះមន្ត្រីអសកម្មជំនួសក្រសួងកសិកម្មផង ៕ ហេង សូរិយា
