សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ បុរសជនជាតិចិនម្នាក់ បានដួលផ្កាប់មុខដោយមិនដឹងមូលហេតុ ហើយត្រូវបានរថយន្តគ្លីនិក៨៨៨ មកដឹកយកទៅសង្រ្គោះនៅគ្លីនិកមិត្តភាព ប៉ុន្តែក្រោយមកជនរងគ្រោះបានស្លាប់នៅលើរថយន្តសង្គ្រោះតែម្តងដោយសារបែកលលាដ៏ ធ្ងន់ធ្ងរ។
ហេតុការណ៍នេះ បានកើតឡើង នៅវេលាម៉ោង២ រំលងអាធ្រាត្រឈានចូលថ្ងៃសុក្រ ១៣រោច ខែមិគសិរ ឆ្នាំ ច សំរឹទ្ធិស័ក ព.ស.២៥៦២ ត្រូវនឹង ថ្ងៃទី៤ ខែមករា ឆ្នាំ២០១៩ នៅចំណុចទ្រូងផ្លូវ២ធ្នូ ទល់មុខដំណាក់ស្តេច ក្នុងក្រុម៣០ ភូមិ៣ សង្កាត់៣ ក្រុងព្រះសីហនុ ។
បើតាមការពិនិត្យរបស់សមត្ថកិច្ចជំនាញ បានឲ្យដឹងថា ជនរងគ្រោះឈ្មោះ ZHU YONGAN ឆ្នាំកំណើត ២៨ ធ្នូ ១៩៨៣ កាន់លិខិតឆ្លងដែនលេខ ED6906046 មានសុពលភាព ២ កក្កដា ២០២៨ មុខរបរកម្មករជាងឈើ នៅបុរីគុជអាស៊ី ក្នុងសង្កាត់៣ ក្រុងព្រះសីហនុ។
សមត្ថកិច្ចដដែល បានបញ្ជាក់ថា តាមការសន្និដ្ឋាន សាកសពស្លាប់ដោយសារការប៉ះទង្គិចចំក្បាលធ្ងន់ធ្ងរខ្លាំងពេក ទើបគ្រូពេទ្យសង្រ្គោះមិនទាន់។ បច្ចុប្បន្នសាកសពបានយកទៅតម្កល់ទុក នៅមន្ទីរពេទ្យបង្អែកខេត្ត រង់ចាំការសម្រេចពីស្ថានទូតចិនប្រចាំកម្ពុជាទាក់ទងក្រុមគ្រួសារនៅប្រទេសចិន មកទទួលយកសពទៅធ្វើបុណ្យតាមប្រពៃណី ៕ សហការី
