ព័ត៌មានទាន់ហេតុការណ៍៖

បុរសម្នាក់ជិះម៉ូតូបត់មិនប្រយ័ត្នត្រូវរថយន្តសាំយ៉ុងបុកស្លាប់នៅហ្នឹងកន្លែងកើតហេតុ

ចែករំលែក៖

ខេត្តសៀមរាប៖ រថយន្តសាំយ៉ុង១៥កៅអី ដឹកអ្នកដំណើរបើកបុកបុរសម្នាក់កំពុងជិះម៉ូតូបត់ឆ្លងថ្នល់ មិនបានមើលមុខក្រោយ បណ្តាលឲ្យដួលបោកក្បាលស្លាប់ភ្លាមៗនៅហ្នឹងកន្លែង។

ហេតុការណ៍នេះបង្កឲ្យមានការភ្ញាក់ផ្អើលពេញផ្លូវជាតិលេខ៦កាលពីវេលាម៉ោង១៣និង៥០នាទី​ ថ្ងៃទី២១ ខែកញ្ញា ឆ្នាំ២០១៧ ក្នុងភូមិដូនរាជ្យ ឃុំគោកធ្លកក្រោម ស្រុកជីក្រែង ខេត្តសៀមរាប​ ។

មន្ត្រីនគរបាលស្រុកជីក្រែងបានប្រាប់ថា ​ពល​រដ្ឋរាយការណ៍មកសមត្ថកិច្ចភ្លាមៗនោះ កម្លាំងជំនាញរបស់អធិការស្រុក បានចុះទៅដល់កន្លែងកើតហេតុ ខណៈនោះអ្នកបើកបររថយន្ត បានរត់គេចខ្លួនបាត់ មិនស្គាល់អត្តសញ្ញាណនោះទេ ដោយបន្សល់ទុក រថយន្តម៉ាកសាំយ៉ុង ពណ៌ស ពាក់ស្លាកលេខ ភ្នំពេញ 2V 9750 មួយគ្រឿងជាមួយ ម៉ូតូម៉ាកC125 ពណ៌ខ្មៅពាក់ស្លាកលេខ កំពង់ធំ 1C 6405 នៅកន្លែងកើតហេតុ ដោយជនរងគ្រោះ អ្នកបើកបរម៉ូតូឈ្មោះ ស៊ា រក្សា ភេទប្រុស អាយុ១៩ឆ្នាំ រស់នៅភូមិដូនរាជ្យ ឃុំគោកធ្លកក្រោម ស្រុកជីក្រែង ខេត្តសៀមរាប ។

សមត្ថកិច្ចអះអាងថា គ្រោះថ្នាក់នេះកើតឡើងដោយសារមូលហេតុ អ្នកបើកបរម៉ូតូ បត់ឆ្លងថ្នល់ពីត្បូងទៅជើងមិនបានមើលឆ្វេងស្តាំ ទើបឲ្យរថយន្តបុកស្លាប់។

ក្រោយមកកម្លាំង ក៏បានវាស់វែង ហើយសមត្ថកិច្ចប្រគល់សាកសពជនរងគ្រោះ ឲ្យក្រុមគ្រួសារយកទៅធ្វើបុណ្យតាមប្រពៃណី ចំណែក រថយន្ត និង ម៉ូតូ កម្លាំងជំនាញបានយកមករក្សាទុកនៅអធិការដ្ឋាននគរបាលស្រុកជីក្រែង ដើម្បីទុកដោះស្រាយទៅតាមផ្លូវច្បាប់៕ ប៊ុនរិទ្ធី


ចែករំលែក៖