សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប៖ បុរសសរសៃប្រសាទវ័យប្រមាណជាង៣០ឆ្នាំម្នាក់ លង់ទឹកសា្លប់ត្រូវបានអ្នកនេសាទទៅបង់សំណាញ់ប្រទះឃើញអណ្តែតទឹកនៅក្នុងបរិវេណ កំពង់ផែស៊ូជីញ ភ្នំក្រោម រួច ទូរស័ព្ទប្រាប់សមត្ថកិច្ចនគរបាលប៉ុស្តិ៍សង្កាត់ចុងឃ្នៀស បង្កឱ្យមានការភ្ញាក់ផ្ញើលទាំងព្រឹក។
ហេតុការណ៍អ្នកនេសាទប្រទះឃើញនោះ បានកើតឡើងនៅវេលាម៉ោង៧និង៣០នាទីព្រឹក ថ្ងៃទី១០ ខែឧសភា ឆ្នាំ២០១៧ ស្ថិតនៅ បរិវេណ កំពង់ផែស៊ូជីញ ភ្នំក្រោម ក្នុងភូមិទី៦ សង្កាត់ចុងឃ្នៀស ក្រុង/ខេត្តសៀមរាប។
នគរបាលបានប្រាប់ថា ពលរដ្ឋម្នាក់ឈ្មោះ ស៊ឹម ឆង ភេទប្រុស អាយុ៣៣ឆ្នាំ មុខរបរអ្នកនេសាទ រស់នៅភូមិកើតហេតុខាងលើ បានជិះទូក ទៅបង់សំណាញ់នៅម្តុំកំពង់ផែស៊ូជីញ ស្រាប់តែប្រទះឃើញ សាកសពអណ្តែតទឹកនៅជិត ទូករបស់គាត់ ខណៈពេលនោះម្ចាស់ទូកក៏បាន ខលទូរស័ព្ទ មកប្រាប់សមត្ថកិច្ចនគរបាលប៉ុស្តិ៍សង្កាត់ចុងឃ្នៀស ពេលនោះកម្លាំងជំនាញក៏បានចុះទៅដល់កន្លែងកើតហេតុភ្លាមៗផងដែរ។
ប្រភពបានបន្តថា កម្លាំងនគរបាលបានអូសយកសាកសព ជនរងគ្រោះ មកលើ រួច រាយការណ៍ទៅសមត្ថកិច្ចជំនាញ ដើម្បីចុះមកពិនិត្យសាកសព ក្រែង ល មានករណីផ្សេងកើតឡើង។
ក្រោយពីពិនិត្យ និង ធ្វើកោសល្យវិច័យ ទៅលើដងខ្លួនជនរងគ្រោះ រួចមក កម្លាំងជំនាញបានសន្និដ្ឋានថា សាកសពជនរងគ្រោះនេះ ពិតជាស្លាប់ដោយសារលង់ទឹកស្លាប់ ពិតប្រាកដមែន ប្រហែលជាង២ថ្ងៃ មកហើយ ដោយសារ នៅលើដងខ្លួនជនរងគ្រោះ ហើម អស់ហើយ ពុំមែនជាករណីឃាតកម្មនោះទេ ។
ជនរងគ្រោះ មិនត្រូវបានប្រជាពលរដ្ឋណាម្នាក់ ស្គាល់អត្តសញ្ញាណនោះទេ គ្រាន់តែដឹងថា ជនរងគ្រោះ មានប្រពន្ធកូននៅស្រុកស្ទោង ខេត្តកំពង់ធំ មកធ្វើកម្មករនៅក្នុង ឃុំកោះជីវាំង ស្រុកឯកភ្នំ ខេត្តបាត់ដំបង តែប៉ុណ្តោះ ចំពោះឈ្មោះអ្វីនោះនៅមិនទាន់ស្គាល់នៅឡើយទេ ព្រោះមនុស្សនេះ មានសតិមិនសូវគ្រប់។
បច្ចុប្បន្នសាកសពជនរងគ្រោះ ត្រូវបានសមត្ថកិច្ចយកទៅកប់ចោល នៅទួលប្រាសាទក្បាល គន្ទាគម ក្នុងភូមិទី៥ សង្កាត់ចុងឃ្នៀស ក្រុង/ខេត្តសៀមរាប ៕ ប៊ុន រិទ្ធី
