សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់បានស្លាប់ភ្លាមៗនៅកន្លែងកើតហេតុ និងម្នាក់ទៀតរងរបួសធ្ងន់ កំពុងសង្គ្រោះបន្ទាន់នៅគ្លីនិកឯកជនសង្ស័យអ្នកបើកបរម៉ូតូក្នុងល្បឿនលឿនពេក ខ្វះការប្រុងប្រយ័ត្ន ហើយចាប់ហ្វ្រាំងទាំងបង្ខំដួលខ្លួនឯង ។
គ្រោះថ្នាក់ចរាចរនេះបានកើតឡើង កាលពីវេលាម៉ោង១ និង៥០នាទីរំលងអធ្រាត្រ ឈានចូលថ្ងៃទី១៩ ខែកុម្ភ: ឆ្នាំ២០១៩ ត្រង់ចំណុចទល់មុខវត្តសុវណ្ណមុនីវង្ស (ហៅវត្តអន្លង់ក្ងាន) តាមបណ្ដោយផ្លូវហាណូយ ស្ថិតក្នុងភូមិអន្លង់ក្ងាន សង្កាត់ឃ្មួញ ខណ្ឌសែនសុខ ។
តាមប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុ គេបានឮសំទ្បេងម៉ូតូដួលអូសយ៉ាងខ្លាំង ពេលនោះក៏មានប្រជាពលរដ្ឋដែលរស់នៅជិតកន្លែងកើតហេតុ នាំគ្នាចេញពីក្នុងផ្ទះមកមើល ស្រាប់តែឃើញបុរសទាំងពីរនាក់ខាងលើ កំពុងដេកដួលស្តូកស្តឹងនៅលើផ្លូវដោយមានរងរបួសឈាមស្រោចពេញខ្លួន រួមទាំងម៉ូតូមួយគ្រឿងម៉ាក ហុងដាភីស៊ីអ៊ិច ពណ៌ស ពាក់ស្លាកលេខ ភ្នំពេញ1HE-9856 ដែលរងការខូចខាតផ្នែកខាងមុខយ៉ាងដំណំ ។ ភ្លាមៗនោះប្រជាពលរដ្ឋ ក៏បានរាយការណ៍ទៅរថយន្តសង្គ្រោះបន្ទាន់ និងសមត្ថកិច្ចមូលដ្ឋាន ឲ្យចុះមកធ្វើការអន្តរាគមន៍ជួយសង្គ្រោះ ។ បន្ទាប់មកក៏មានរថយន្តសង្គ្រោះបន្ទាន់ របស់គ្លីនិកឯកជនសម្ភពរស្មីបានមកដល់ដឹកបុរសម្នាក់ ដែលរងរបួសបែកច្រមុះសន្លប់ស្ដូកស្ដឹងយកទៅសង្គ្រោះភ្លាមៗ ។ ដោយទ្បែកជាអរកុសលបុរសម្នាក់ទៀត គឺរងរបួសរយះ.កនិងបែកក្បាល បានដាក់ខ្យល់ស្លាប់ភ្លាមៗនៅកន្លែងកើតហេតុ ។
នគរបាលជំនាញផ្នែកចរាចរ បានឲ្យដឹងថាជនរងគ្រោះទាំងពីរនាក់ បានបើកបរម៉ូតូខាងលើ ធ្វើដំណើរពីត្បូងទៅជើងតាមបណ្ដោយផ្លូវភ្នំពេញហាណូយ ក្នុងល្បឿនយ៉ាងលឿន ។ លុះមកដល់ចំណុចកើតហេតុទំនង ជាអកហ្សើនិងអ្វីមួយ រួចក៏ចាប់ហ្វ្រាំងទាំងបង្ខំទើបធ្វើអោយដួលបោកនិងថ្នល់អូសជិត២០០ម៉ែត្រតែម្ដងទៅ ។
សពជនរងគ្រោះ មានឈ្មោះ ហុីម វណ្ណា អាយុ៣៦ឆ្នាំ មុខរបរកម្មក មានស្រុកកំណើតភូមិកោះតូច ឃុំឈើខ្មៅ ស្រុកកោះធំ ខេត្តកណ្តាល ។ ដោយឡែកជនរងគ្រោះម្នាក់ទៀតដែលរងរបួសធ្ងន់មិនទាន់ស្គាល់អត្តសញ្ញាណនោះទេ ។
ក្រោយពេលកើតហេតុសមត្ថកិច្ច ជំនាញចុះបានធ្វើការវាស់វែង យកម៉ូតូរបស់ជនរងគ្រោះ ទៅរក្សាទុកនៅអធិការដ្ឋាននគរបាលខណ្ឌសែនសុខដើម្បីរង់ចាំប្រគល់ទៅសាច់ញាតិជនរងគ្រោះ នៅពេលក្រោយ ។
ដោយឡែកសព ត្រូវបានសមត្ថកិច្ចដឹកយកទៅតម្កល់នៅក្នុងវត្តទឹកថ្លា ដើម្បីស្វែងរកសាច់ញាតិឲ្យមកទទួលយកទៅធ្វើបុណ្យទៅតាមប្រពៃណី៕ តុង សីហា
