ព័ត៌មានទាន់ហេតុការណ៍៖

ប្រជាពលរដ្ឋរស់នៅតាមផ្លូវ៧៧បេតេ ភូមិចំរើនផល សង្កាត់បឹងទំពុនទី១ សុំឲ្យអាជ្ញាធរជួយបង្រួមផ្លូវតាមផ្ទះអ្នកមាន

ចែករំលែក៖

ភ្នំពេញ៖ ប្រជាពលរដ្ឋរស់នៅតាមបណ្តោយផ្លូវ៧៧បេតេ ស្ថិតនៅក្នុងភូមិចំរើនផល សង្កាត់បឹងទំពុនទី១ ខណ្ឌមានជ័យ អំពាវនាវឲ្យអាជ្ញាធរសង្កាត់ជាប់ឆ្នោតថ្មី ក៏ដូចជាថ្នាក់ខណ្ឌជួយ​បង្រួមផ្លូវលេខ៧៧បេតេនេះឲ្យតូចទៅតាមអ្វីដែល​មន្ត្រីអ្នកមានអំណាចម្នាក់បាន​ពង្រីក​ផ្ទះមកលើផ្លូវ ធ្វើឲ្យផ្លូវរួមតូច ។ ដូច្នេះអាជ្ញាធរគួរតែអំពាវនាវ​ឲ្យប្រជាពលរដ្ឋពង្រីកផ្ទះមកលើផ្លូវ ដូចដែលមន្ត្រីម្នាក់នោះបានធ្វើ ។

ប្រជាពលរដ្ឋនិយាយថា មន្ត្រីនគរបាល​មានអំណាច មានស័ក្តិយសធំម្នាក់នៅក្រសួងមហាផ្ទៃ​បានសាងសង់របងផ្ទះ​រំលោភមកលើចំណីផ្លូវសាធារណៈ ។ អាជ្ញាធរសង្កាត់បានចុះទៅហាមឃាត់សំណង់រំលោភច្បាប់នោះយ៉ាងហោចណាស់២ដង ប៉ុន្តែដោយសារតែអ្នកទៅហាមឃាត់មានស័ក្តិយសតូចជាងអ្នកល្មើសច្បាប់ ដូច្នេះ ការហាមឃាត់នេះគ្មានប្រសិទ្ធភាពទេ ។ ពាក្យចាស់លោកពោលថា «ឆ្កែចេះតែព្រុះ មនុស្សចេះតែដើរ» អាជ្ញាធរចេះតែ​ហាមឃាត់ រីឯអ្នកមានអំណាចម្នាក់នោះ​ចេះតែបំពានយ៉ាងដូច្នោះឯងទៅ ។

ដោយសារតែការហាមប្រាមរបស់អាជ្ញាធរមិនមានប្រសិទ្ធភាព ប្រជាពលរដ្ឋដែលមានលំនៅឋាននៅលើកំណាត់ផ្លូវ​ខាង​លើអំពាវនាវឲ្យអាជ្ញាធរជួយសម្រួលសម្របតាម​អ្នកមានអំណាចនោះទៅ គឺអនុញ្ញាតឲ្យប្រជាពលរដ្ឋដែលមាន​លំនៅឋានតាមបណ្តោយផ្លូវនេះ​ធ្វើរបងផ្ទះលយឲ្យស្មើនឹងលំនៅឋានរបស់មន្ត្រីម្នាក់នោះទៅ ។ ដើម្បីឲ្យស្មើភាពគ្នានៅ​ក្នុងចំណោមប្រជាពលរដ្ឋដែលមានលំនៅឋានតាមបណ្តោយផ្លូវ៧៧បេតេ អ្នកភូមិបានអះអាងថា អាជ្ញាធរគួរតែរៀបចំ សម្របសម្រួលឲ្យប្រជាពលរដ្ឋគ្រប់ផ្ទះ​សង់​ផ្ទះមកលើចិញ្ចើមផ្លូវ​ស្មើនឹងផ្ទះមន្ត្រីម្នាក់នោះ ។

មន្ត្រីសាលាខណ្ឌមានជ័យម្នាក់បានឲ្យដឹងថា អាជ្ញាធរជំនាញបានចុះទៅហាមឃាត់ការសង់ផ្ទះ​មកលើចិញ្ចើមផ្លូវនោះដែរ ប៉ុន្តែ​ម្ចាស់ផ្ទះមិនអើពើ ព្រោះគាត់មានអំណាចធំ ។ ទាល់តែអ្នកទៅហាមឃាត់មានអំណាចធំជាងម្ចាស់ផ្ទះ ទើបគេរំពឹងថា ម្ចាស់ផ្ទះនេះស្តាប់ ។ មន្ត្រីខាងលើនិយាយថា គួរតែ​ឲ្យថ្នាក់ដឹកនាំសាលារាជធានីភ្នំពេញចុះទៅហាមឃាត់ ។ ប៉ុន្តែយ៉ាងណាក៏ដោយ ទម្រាំរឿងនេះដឹងឮដល់អាជ្ញាធររាជធានីភ្នំពេញ សំណង់លើចិញ្ចើមផ្លូវនោះសង់រួចរាល់ហើយ ។

ប្រជាពលរដ្ឋរំពឹងថា អាជ្ញាធរសង្កាត់, ខណ្ឌ និងសាលារាជធានីភ្នំពេញអាចនឹងព្រមព្រៀងឲ្យប្រជាពលរដ្ឋដែលមានលំនៅឋានតាមផ្លូវលេខ៧៧បេតេ សង់លំនៅឋានមកលើលំនៅឋានស្រប និងស្មើគ្នា​នៅលើផ្លូវ​ខាងលើ ។ គេជឿថាអាជ្ញាធរមិនអាច​ឲ្យម្ចាស់ផ្ទះ​នោះ​វាយកម្ទេច​សំណង់របស់ខ្លួនឡើយ ។ ដូច្នេះដើម្បីឲ្យសមភ្នែក ប្រជាពលរដ្ឋដែលមានលំនៅឋានតាមផ្លូវនេះ គួរតែខិតខំរកប្រាក់ដើម្បីធ្វើផ្ទះ​លយមកមុខលើចិញ្ចើមផ្លូវដូចផ្ទះមន្ត្រីម្នាក់នោះដែរទៅ៕ ហេង សូរិយា

 


ចែករំលែក៖