សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ: នារីម្នាក់ ដេកជិតម៉ូតូមួយគ្រឿងនិងមានស្មារតីវង្វេងវង្វាន់ នៅលើឃឿនតាមចិញ្ចើមផ្លូវតែម្នាក់ឯងសង្ស័យត្រូវថ្នាំសណ្តំ ត្រូវសមត្ថកិច្ចប៉ុស្តិ៍នគរបាលរដ្ឋបាលភ្នំពេញថ្មី ល្បាតក្នុងមូលដ្ឋានឃើញ។
ហេតុការណ៍នេះកើតឡើងកាលពីម៉ោងជិត២៤ ថ្ងៃទី២៥ ខែតុលា ឆ្នាំ២០១៨ តាមបណ្ដោយផ្លូវម៉ុងរិទ្ធី ស្ថិតក្នុងសង្កាត់ភ្នំពេញថ្មី ខណ្ឌសែនសុខ ។
ប្រភពពត៌មានពីសមត្ថកិច្ចប៉ុស្តិ៍នគរបាលរដ្ឋបាលភ្នំពេញថ្មីបានឲ្យដឹងថា នៅមុនពេលកើតហេតុ កម្លាំងពួកគាត់បានជិះល្បាតនៅក្នុងមូលដ្ឋាន។ ខណៈមកដល់ចំណុចកើតហេតុក៏ប្រទះនារីម្នាក់ដេកនៅលើដីជិតម៉ូតូមួយគ្រឿងម៉ាក ZOOMER-X ពណ៌ស្វាយលាយខ្មៅ ពាក់ស្លាកលេខ ភ្នំពេញ1FT-9310 ។ ពេលនោះកម្លាំងពួកគាត់ក៏បានចូលទៅដាស់សួរនាំ តែនារីនោះមានសភាពវង្វេងវង្វាន់បាត់បង់ស្មារតី និយាយមិនដឹងរឿងហាក់ដូចជាត្រូវគេដាក់ថ្នាំសណ្តំ។ បន្ទាន់មកកម្លាំងសមត្ថកិច្ចក៏បានព្យាយាមយកទូរសព្ទដៃរបស់នារីរងគ្រោះដើម្បីទាក់ទងរកសាច់ញាតិ តែដោយទូរស័ព្ទអស់ថ្ម ទើបមិនអាចទាក់ទងទៅរកសាច់ញាតិបាន ហើយក៏មានប្រជាពលរដ្ឋដែលនៅក្បែរខាងនោះ បានជួយយកក្រូចឆ្មារ និងមើមខ្ទឹម មកឲ្យនារីរងគ្រោះបៀម និងញីមុខដើម្បីឲ្យស្វាងឡើងវិញ។
ប្រហែលជាងមួយម៉ោងក្រោយមក នារីនោះក៏មានស្មារតីតិចៗឡើងវិញ ហើយក៏ទាមទារម៉ូតូពីសមត្ថកិច្ចជិះត្រឡប់ទៅផ្ទះវិញនៅឯម្តុំអធិការដ្ឋាននគរបាលខណ្ឌទួលគោកដោយខ្លួនឯង តែកម្លាំងសមត្ថកិច្ចមិនព្រមប្រគល់ម៉ូតូឲ្យនារីរងគ្រោះនោះទេ ព្រោះឃើញស្ថានភាពរបស់នាងមានភាពទន់ខ្សោយដូចជាមនុស្សស្រវឹងស្រា ឈរទប់ខ្លួនមិននឹង។
បើតាមសម្តីពីនារីរូបនេះបានប្រាប់ទាំងសភាពវង្វេងវង្វាន់ថា រូបនាងមានឈ្មោះ រង្សី អាយុ២៤ឆ្នាំ ស្នាក់នៅម្តុំបឹងសាឡាង ក្បែរអធិការដ្ឋាននគរបាលខណ្ឌទួលគោក ហើយមុនពេលកើតហេតុសង្សាររបស់នាងបានជិះឌុបរូបនាងមកដល់ចំណុចកើតហេតុ រួចសង្សាររបស់នាងក៏ចាកចេញពីទីនោះដោយទុកនាងចោលនៅកន្លែងកើតហេតុតែឯង។
បន្ទាប់ពីកើតហេតុដោយនារីរងគ្រោះ ទាមទារតែទៅផ្ទះរបស់ខ្លួនវិញដែលនៅម្តុំបឹងសាឡាងក្បែរនិងអធិការដ្ឋាននគរបាលខណ្ឌទួលគោក ហើយកម្លាំងសមត្ថកិច្ចប៉ុស្តិ៍នគរបាលរដ្ឋបាលភ្នំពេញថ្មីក៏ព្រម ជូននារីរូបនោះទៅផ្ទះរបស់នាងវិញ ដែលនៅតាមបណ្តោយផ្លូវ២៦១ ក្បែរ នឹងអធិការដ្ឋាននគរបាលខណ្ឌទួលគោក ស្ថិតក្នុងសង្កាត់បឹងសាឡាង ខណ្ឌទួលគោក។ ខណ:ដែលទៅដល់គឺសោទ្វារផ្ទះដែលនារីរស់នៅខាងលើ ប្រាប់ថាជាផ្ទះរបស់ខ្លួននោះគឺចាក់មិនត្រូវនោះទេ ហើយដោយអស់ជម្រើសកម្លាំងសមត្ថកិច្ចក៏បានដឹកនារីរងគ្រោះទៅសម្រាក់នៅគ្លីនិកឯកជនហុងហាក់ ដើម្បីឲ្យគ្រូពេទ្យពិនិត្យនិងព្យាបាល រង់ចាំនារីខាងលើនោះដឹងខ្លួនឡើងវិញហើយទាក់ទងទៅសាច់ញាតិនៅពេលក្រោយ៕ ជ្រោយពេជ្រ
