ភ្នំពេញ៖ ជនជាប់ចោទពីរនាក់ជាមន្ត្រីនគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ ត្រូវបានលោកព្រះរាជអាជ្ញារង ខាំ សុផារី ជាតំណាងអយ្យការ នាពេលសវនាការ សន្និដ្ឋានថា ពិតជាបានប្រព្រឹត្តបទល្មើសអំពើពុករលួយប្រាកដមែន សូមឱ្យចៅក្រមសម្រេចតាមច្បាប់ ។
ក្រោយបញ្ចប់សវនាការនៅល្ងាចថ្ងៃទី០៧ ខែធ្នូ ឆ្នាំ២០១៧ នេះ លោកចៅក្រម លាង សំណាត់ អនុប្រធានសាលាដំបូងរាជធានីភ្នំពេញ ពុំទាន់សម្រេចយ៉ាងណានៅឡើយទេ ពោលគឺ បានលើកពេលប្រកាសសាលក្រមទៅរសៀលថ្ងៃទី១៨ ខែធ្នូ ឆ្នាំ២០១៧ ខាងមុខនេះវិញ ។
សាលាដំបូងរាជធានីភ្នំពេញ បើកសវនាការជំនុំជម្រះលើជនជាប់ចោទពីររូបមានឈ្មោះ ឯម កុសល និង ឈ្មោះ ហ៊ុយ ហឿន ជាប់ចោទពីបទ”វិតិក្រម តាមមាត្រា៥៩២ និង មាត្រា៥៩៣ នៃក្រមព្រហ្មទណ្ឌ និង មាត្រា៣២ ច្បាប់ស្តីពីការប្រឆាំងអំពើពុករលួយ ។
នាពេលសវនាការ ជនជាប់ចោទ ឈ្មោះ ឯម កុសល បដិសេធថា ខ្លួនពុំបានប្រព្រឹត្តដូចការចោទប្រកាន់នោះទេ សូមឱ្យតុលាការរកយុត្តិធម៌ ។
ចំណែក ឈ្មោះ ហ៊ុយ ហឿន សារភាពថាខ្លួនពិតជាបានទៅទារលុយតាមទីកន្លែងចំនួន៣០កន្លែងពិតមែនហើយមួយកន្លែងចាប់ពី៣០ដុល្លារ៥០ដុល្លារដល់១០០ដុល្លារ ហើយធ្លាប់បានចុះតាមខេត្តមួយចំនួនដូចជាខេត្តកំពង់ស្ពឺ ត្បូងឃ្មុំ ប៉ៃលិន កំពង់ធំ និងខេត្តកណ្តាល ដោយសរុបក្នុងមួយខែប្រមូលបានលុយ២០០០ដុល្លារដល់៣០០០ដុល្លារ ហើយទារបានរយៈពេល៦ខែមកហើយ។ ចំណែកឈ្មោះ ឯម កុសល គឺបានចុះទៅជាមួយដែរពេលធ្វើការតែរឿងបានផលប្រយោជន៍គេមិនបានដឹងទេ។
អង្គភាពប្រឆាំងអំពើពុករលួយ ACU បានចេញសេចក្តីប្រកាសមួយស្តីពីការឃាត់ខ្លួនលោក ហ៊ុយ ហឿន នាយរងផ្នែកសិទ្ធិអ្នកនិពន្ធ និងសិទ្ធិប្រហាក់ប្រហែល ការិយាល័យកម្មសិទ្ធិបញ្ញា (ក៣) នាយកដ្ឋាននគរបាលប្រឆាំងបទល្មើសសេដ្ឋកិច្ច នៃក្រសួងមហាផ្ទៃ បានដើរទារប្រាក់ពីក្រុមហ៊ុន សហគ្រាស បុគ្គលឯកជនផ្សេងៗនៅរាជធានីភ្នំពេញ។
នៅក្នុងសេចក្តីប្រកាសរបស់ ACU បានឲ្យដឹងដែរថា ឈ្មោះ ឯម កុសល ឋានន្តរសក្តិវរសេនីយ៍ទោ មន្រ្តីនគរបាលប្រឆាំងបទល្មើស ក៏បានចូលរួមក្នុងសកម្មភាពទារប្រាក់នេះផងដែរ៕ចេស្តា
សារព័ត៌មាន នគរវត្ត តែងតែនាំមុខគេជានិច្ច
