ព័ត៌មានទាន់ហេតុការណ៍៖

មន្រ្តីក្រសួងធនធានទឹកម្នាក់ ប្តឹងទៅតុលាការ២ករណី ក្រោយនគរបាលមន្ទីរប្រឆាំងគ្រឿងញៀនក្រសួងមហាផ្ទៃ ចាប់បុរសម្នាក់ញាត់ចូលរថយន្ត វាយ៥ដៃ រួចថាច្រឡំមនុស្ស

ចែករំលែក៖

​ភ្នំពេញ​៖​ បុរស​ម្នាក់​ជាមន្រ្តីក្រសួង​ធនធានទឹក បាន​នឹង​ដាក់​ពាក្យបណ្តឹង​ទៅ​សាលាដំបូងរាជធានីភ្នំពេញ​ ចំនួន​២​ករណី​ ១.​ការ​អនុវត្ត​ច្បាប់​ខុស​នីតិវិធី​ ទី​២.​ អំពើ​ហិង្សារ​ដោយ​ចេតនា​ ទៅ​លើ​ក្រុម​មន្ត្រី​ន​របាល​ មន្ទីរ​ប្រឆាំង​គ្រឿងញៀន​ នៃ​អគ្គស្នងការ​នគរបាល​ជាតិ​ ដែល​បាន​ចាប់​រូប​គាត់​ ហើយ​ប្រើ​អំពើ​ហិង្សា​ថែម​ទៀត​ កាលពី​វេលា​ម៉ោង​​១១​យប់​ ថ្ងៃសុក្រ ៤កើត ខែមាឃ ឆ្នាំ​ច​ សំរឹទ្ធិស័ក​ ព.ស២៥៦២​ ត្រូវនឹងថ្ងៃ​ទី​៨​ ខែកុម្ភៈ​ ឆ្នាំ​២០១៩​ នៅចំណុចម្តុំ​ស្ពាន​អាកាស​ក្បាលថ្នល់​ ជិត​ស្ថានីយប្រេងឥន្ទនៈ​សូ​គី​មិច ក្នុងមូលដ្ឋានខណ្ឌចំការមន ។​

យោងតាម​ប្រភពព័ត៌មាន​ពី​កន្លែង​កើតហេតុ ​បានឱ្យ​ដឹង​ថា ​មុន​ពេល​កើតហេតុ​ មាន​មនុស្ស​មួយ​ក្រុមស្លៀកពាក់ស៊ីវិល ដោយ​ជិះ​រថយន្ត​មួយ​គ្រឿងប្រភេទទូរីស​ ដែល​ត្រូវ​បាន​គេ​ស្គាល់​ថា​ជាក្រុម​មន្ត្រី​នគរបាល​ប្រយុទ្ធ​ប្រឆាំង​គ្រឿងញៀន​ នៃ​អគ្គស្នងការ​នគរ​ជាតិ​​ បាន​មកធ្វើសកម្មភាពចាប់​បុរស​​ម្នាក់ ​ញាត់​ចូល​រថយន្ត​យ៉ាងប្រញាប់រួចដឹក​បញ្ជូនទៅ​អគ្គស្នងការ​នគរបាល​ជាតិ​ ដោយសង្ស័យ​ពាក់ព័ន្ធ​ករណី​គ្រឿងញៀន​ ។​

ប្រភពដដែលបន្តទៀតថា បុរស​រង​គ្រោះ​​មានឈ្មោះ​ ឡាយ​ ប៊ុ​ន​ថូ​ អាយុ​៣១​ឆ្នាំ​ ស្នាក់​នៅ​ សង្កាត់​ទួល​ទំពូង​២​ ផ្លូវ​៤៧៦​ ខណ្ឌចំការមន​ ធ្វើការ​នៅ​ក្រសួង​ធនធានទឹក​ នៅ​នាយកដ្ឋាន​ការ​ត្រួតពិនិត្យ​ ធ្វើ​អាជីវកម្ម​ នឹង​អា​ភិ​រក្ស​ ត្រូវ​នគរបាល​ចាប់​នៅ​ម្តុំ​ស្ពាន​អាកាស​ក្បាលថ្នល់​ ជិត​ស្ថានីយប្រេងឥន្ទនៈ​សូ​គី​មិច ក្នុងមូលដ្ឋានខណ្ឌចំការមន ។​

បើតាមសម្តី​បុរស​រង​គ្រោះ​ បានឲ្យដឹងថា មុនពេលកើតហេតុ គាត់មិនដឹងថាមានរឿងអ្វីនោះទេ ខណៈរូបគាត់កំពុងតែឈរនៅមុខផ្ទះ ស្រាប់តែត្រូវ​ក្រុម​មន្ត្រី​នគរបាល​នៃ​មន្ទីរ​ប្រឆាំង​គ្រឿងញៀន​ បាន​មកធ្វើសកម្មភាពចាប់​បុរស​​ម្នាក់ ​ញាត់​ចូល​រថយន្ត​យ៉ាងប្រញាប់រួចដឹក​បញ្ជូនទៅ​អគ្គស្នងការ​នគរបាល​ជាតិ​ និងបាន​ប្រើ​អំពើ​ហិង្សា​លើ​រូប​គាត់​ចំនួន​៥​ដៃ​ថែមទៀត នៅពេលដែលរូបគាត់សួររកហេតុផល ។​ បន្ទាប់ពីដឹករូបគាត់​មក​យក​មន្ទីរ​ប្រឆាំង​គ្រឿងញៀន​​ ស្រាប់តែមន្ត្រី​នគរបាល​បាន​ហៅ​មនុស្ស​ម្នាក់​មក​ចង្អុលបង្ហាញថា​ តើ​បុរស​ម្នាក់ ​​នឹង​មែន​?​ ហើយមនុស្ស​ម្នាក់នឹង​ដែល​មន្ត្រី​នគរបាល​ដែល​ឲ្យ​ចង្អុលបង្ហាញ​មុននោះ បាន​ឆ្លើយ​ថា​មិនមែន​បុរស​ដែល​គាត់​នាំមក​ហ្នឹង​ទេ ប៉ុន្តែគាត់គ្រាន់​តែពាក់​អាវ​ស​ ដូច​គ្នា​ប៉ុណ្ណោះ​។​

ក្រោយ​ពី​ដឹង​ថា​ចាប់​ច្រឡំ​មនុស្ស​ មន្ត្រី​នគរបាល​ទាំងអស់​ បាន​សុំ​ទោស​គាត់ដោយគ្រាន់តែនិយាយដាសុំទោសដែល​ចាប់​ច្រឡំ​ ។​ ភ្លាមនោះបុរស​រងគ្រោះបាន​ឆ្លើយ​ថា​ គា​ត់​មិន​អាច​ទទួល​បាន​ទេ​ ព្រោះ​មន្ត្រី​នគរបាល​ជា​អ្នក​អនុវត្ត​ច្បាប់​ ត្រូវ​តែ​ស៊ើ​ប​អង្កេត​ឱ្យ​បាន​ច្បាស់សិនទើបចាប់មនុស្ស​ ម្ត៉េចក៏សមត្ថកិច្ចធ្វើការ​អនុវត្ត​ខុសនីតិវិធីបែប​នេះទៅវិញ​ គឺ​ធ្វើ​ឱ្យ​ប៉ះពាល់​ដល់​កិត្តិយស​របស់​គាត់​ខ្លាំង​ណាស់​ ដូច្នេះគាត់នឹង​ដាក់​ពាក្យបណ្តឹង​ទៅ​សាលាដំបូងរាជធានីភ្នំពេញ​ ចំនួន​២​ករណី​ ១.​ការ​អនុវត្ត​ច្បាប់​ខុស​នីតិវិធី​ ទី​២.​ អំពើ​ហិង្សារ​ដោយ​ចេតនា​ ទៅ​លើ​ក្រុម​មន្ត្រី​ន​របាល​ មន្ទីរ​ប្រឆាំង​គ្រឿងញៀន​ នៃ​អគ្គស្នងការ​នគរបាល​ជាតិ​ទាំងនោះ តាមច្បាប់ ។

ពាក់ព័ន្ធ​ករណី​មន្ត្រី​នគរបាល​មន្ទី​ប្រឆាំង​គ្រឿងញៀនក្រសួងមហាផ្ទៃ​ ដែល​តែងតែ​ចាំ​មនុស្ស​ច្រឡំ​ជា​ញឹកញាប់​ នៅ​រសៀល​ថ្ងៃ​ទី​៩​ ខែកុម្ភៈ​ ឆ្នាំ​២០១៩​ ភ្នាក់ងារកាសែតនគរវត្តមិនអាចសុំការទំនាក់ទំនងបានទេ ព្រោះខាងមន្ទីរគ្រឿងញៀនមានផ្នែកច្រើនពេក ៕ស តារា


ចែករំលែក៖