សារព័ត៌មាន នគរវត្ត តែងតែនាំមុខគេជានិច្ច
កិច្ចព្រមព្រៀង Brexit ដែលលោកស្រី May បានខិតខំចរចាជាមួយមេដឹកនាំសហភាពអឺរ៉ុប នាពេលកន្លងមកនេះ បានទទួលបរាជ័យក្នុងសំឡេងឆ្នោត ២០២ គាំទ្រទល់នឹង ៤៣២ប្រឆាំង ដែលបង្កឲ្យមានការអំពាវនាវបោះឆ្នោតស្ទង់ទំនុកចិត្តភ្លាមៗ ពីសំណាក់ប្រធានគណបក្សប្រឆាំងលោក ជែរែមី ខ័រប៊ីន (Jeremy Corbyn)។
ដោយសារតែ កិច្ចព្រមព្រៀង Brexit ខាងលើត្រូវសភាអង់គ្លេសទាត់ចោល លោកស្រី ត្រូវដាក់គម្រោង Plan B ទៅកាន់សភា បើសិនជារួចខ្លួនពីការបោះឆ្នោតស្ទាបស្ទង់ទំនុកចិត្ត ហើយបន្ទាប់ពីនោះ គឺមានជម្រើសតែ ០៤ប៉ុណ្ណោះ គឺអង់គ្លេសដើរចេញពីសហភាពអឺរ៉ុបដោយពុំមានកិច្ចព្រមព្រៀងរវាងគ្នា, អង់គ្លេសចរចាឡើងវិញជាមួយសហភាពអឺរ៉ុប, ការរៀបចំប្រជាមតិឡើងវិញពី Brexit, និងចុងក្រោយគឺលុបគម្រោង Brexit ចោលតែម្តង ដោយអង់គ្លេសនឹងនៅតែជាសមាជិកសហភាពអឺរ៉ុបដដែល។
ប៉ុន្តែ ជាលទ្ធផល ការបោះឆ្នោត ដោយមាន សំឡេងគាំទ្រ ៣២៥ និងប្រឆាំង៣០៦ តំណាងរាស្ត្រ អង់គ្លេសបានបង្ហាញនូវទំនុកចិត្ត ចំពោះរដ្ឋាភិបាលរបស់លោកស្រី Theresa May ។ ការផ្តល់ទំនុកចិត្តខាងលើធ្វើឡើង ក្រោយរយៈពេល២៤ម៉ោងដែលសភា មិនបោះឆ្នោតអនុម័តទៅលើសំណើ Brexit ដែលលោកស្រី May បានស្នើឡើង ធ្វើឲ្យគម្រោងចាកចេញពីអឺរ៉ុបធ្លាក់នៅក្នុងភាពចលាចល។
ក្រោយលទ្ធផលបោះឆ្នោតផ្តល់ទំនុកចិត្ត ដែលបានប្រកាសជាសាធារណៈ ដោយទទួលបានការស្វាគមន៍ពីតំណែងរាស្ត្រគណបក្សប្រឆាំង លោកស្រី May បញ្ជាក់ថា សភា មានភារកិច្ច ក្នុងការស្វែងរកដំណោះស្រាយ បំពេញទៅតាមលទ្ធផលនៃការបោះឆ្នោតប្រជាមតិ កាលពីឆ្នាំ២០១៦ស្តីពីការចាកចេញ ពីអឺរ៉ុប ។
លោកស្រី May មានប្រសាសន៍ក្រោយការបោះឆ្នោតប្រជាមតិថា«យើង ពេញចិត្តចំពោះ សភាដែលបន្តផ្តល់ទំនុកចិត្តលើរដ្ឋាភិបាល យើងសូមសន្យាថានឹងបន្ត ខិតខំដើម្បីអង់គ្លេសកាន់តែមានភាពរុងរឿង។ ខ្ញុំជឿជាក់ថា សមាជិករដ្ឋសភា នឹង ចូលរួមចែករំលែកនូវភារកិច្ច ក្នុងការកំណត់គោលដៅ ជួយឲ្យរដ្ឋាភិបាល ទទួលបានជោគជ័យ ក្នុងការអនុវត្តតាមគោលបំណងចងបានរបស់ពលរដ្ឋ »៕
