ព័ត៌មានទាន់ហេតុការណ៍៖

មេដឹកនាំមហាអំណាចពិភពលោកទាំងពីរ អាមេរិក-ចិន នឹងជួបពិភាក្សានៅខែវិច្ឆិកានេះ

ចែករំលែក៖

សារព័ត៌មានរ៉យទ័របានដកស្រង់សម្តីមន្ត្រីជាន់ខ្ពស់អាមេរិក បានបញ្ជាក់នៅ ថ្ងៃទី១៥ខែតុលាថា ប្រធានាធិបតីអាមេរិក លោក ដូណាល់ ត្រាំ និងប្រធានាធិបតីចិន លោក ស៊ី ជីនពីង អាចនឹងជួបគ្នានៅអំឡុង ពេលចូលរួមកិច្ចប្រជុំកំពូល G20 នៅខែ ក្រោយនេះ ខណៈមហាយក្សសេដ្ឋកិច្ច ទាំងពីរ កំពុងមានទំនាក់ទំនងមិនល្អនឹងគ្នា ដោយសារតែសង្រ្គាមពាណិជ្ជកម្ម។

លោក Larry Kudlow ជាទីប្រឹក្សាសេដ្ឋ កិច្ចរបស់លោក ដូណាល់ ត្រាំ បាន បញ្ជាក់ប្រាប់សារព័ត៌មាន Fox News កាលពីថ្ងៃអាទិត្យ (ម៉ោងនៅអាមេរិក) ដូច្នេះថា៖«ប្រធានាធិបតីទាំងពីរអាចនឹងជួបគ្នាក្នុងឱកាសចូលរួមក្នុងកិច្ចប្រជុំកំពូល G20 នៅឯទីក្រុង Buenos Aires ប្រទេស អាហ្សង់ទីន នៅខែវិច្ឆិកាខាងមុខនេះ»។ ប៉ុន្តែទន្ទឹមគ្នា លោកក៏បានទទួលស្គាល់ដែរ ថាកិច្ចចរចាដោះស្រាយពាណិជ្ជកម្មរវាងចិន នឹងសហរដ្ឋអាមេរិក ហាក់ដូចជាមិនមានការរីកចម្រើនទាល់តែសោះ ខណៈ ប្រទេសទាំងពីរ នៅតែបន្តគំរាម និង ដំឡើងពន្ធដាក់គ្នាទៅវិញទៅមក ដែលកំពុងបង្កជាការព្រួយបារម្ភថាជម្លោះនេះអាច នឹងធ្វើឱ្យប៉ះពាល់ដល់សេដ្ឋកិច្ចពិភពលោក។

សូមជម្រាបថា បច្ចុប្បន្ន ទំនាក់ទំនង រវាងចិន នឹងសហរដ្ឋអាមេរិកកំពុងមានភាពតានតឹងខ្លាំង ក្រោយលោក ដូណាល់ ត្រាំ ប្រកាសដំឡើងពន្ធលើមុខទំនិញនាំចូលពីចិនជាបន្តបន្ទាប់ នៅក្នុងបរិបទដែលប្រទេសទាំងពីរកំពុងមើលមុខគ្នាមិនចំស្រាប់ ជុំវិញជម្លោះនៅឯតំបន់សមុទ្រចិនខាងត្បូង៕ ម៉ែវ សាធី


ចែករំលែក៖